¿Lakaskin Dios pi kakakuentajtlawaw kinatlatnikan akxni linkgoya kata?

Takgalhtin nema masta Biblia

Kamanan tiku laklankata kgalhikgo talakgatay nakakuentajtlawakgo xnatlatnikan. Biblia wan pi uma talakgatay makgtanuma ktakanajla, kamanan pulana «kakatsinikgolh nakuentajtlawakgo tiku xalak xchikkan chu kalimasiyakgolh pi maxkikgo kakni [...] xlakata uma tlan akxilha Dios» (1 Timoteo 5:4). Akxni kamanan lu kuentajkatlawakgo xnatlatnikan, makgantaxtikgo limapakgsin nema wi kBiblia xlakata kamaxkikgo kakni (Efesios 6:2, 3).

Biblia ni liwana wan la nakakuentajtlawakan natlatni tiku linkgoya kata, pero kinkawaniyan tuku tlawakgolh makgapitsi lakchixkuwin chu lakpuskatin xala makgasa. Nachuna lichuwinan makgapitsi tastakyaw nema tlan namakgtaya tiku kuentajtlawama chatum tiku lina kata.

• ¿La kakuentajtlawakgolh makgapitsi latamanin tiku kalichuwinan Biblia xnatlatnikan tiku xlinkgoya kata?

• ¿Tuku tastakyaw masta Biblia?

• ¿Wan Biblia pi kamanan nakuentajtlawakgo xnatlatnikan kxchikkan?

¿La kakuentajtlawakgolh makgapitsi latamanin tiku kalichuwinan Biblia xnatlatnikan tiku xlinkgoya kata?

Tanu tanu tuku tlawakgolh, xlakata ni watiya tuku xtitaxtumakgolh.

• José ni lakatsu xtawi xtlat Jacob tiku xlina kata. Pero akxni matlanilh lakkaxwililh tuku xtalakaskin xlakata lakatsu xtawi. José kuentajtlawalh Jacob maxkilh liwat chu niku tlan natawila (Génesis 45:9-11; 47:11, 12).

• Rut alh latama xkachikin xputiatse chu palha skujli xlakata nakuentajtlawa (Rut 1:16; 2:2, 17, 18, 23).

• Jesús, akxni nina xniy, putsalh tiku nakuentajtlawa xtse, María, xlakata max xninita xchixku (Juan 19:26, 27).a

¿Tuku tastakyaw masta Biblia?

Akxni kakuentajtlawakan natlatni lu tlakgwankan. Biblia masta makgapitsi tastakyaw nema makgtayanankgo.

• Kakalimasiyani kakni chu ni kakamaktuju.

  Tuku wan Biblia: «Kamaxki kakni mintlat chu mintse» (Éxodo 20:12).

  La tlan namakgantaxtiyaw: Kakamaxki talakaskin minatlatni wi tuku xʼakstukan natlawakgo chu nalaksakkgo la nakakuentajtlawakan komo matlanikgo. Ni kamalakatsali chu kakamakgtaya chuna la matlaniya. Pero ankgalhin kakamaxki kakni chu ni kakamaktuju.

• Kaka’akgatekgsni chu kakatapati.

  Tuku wan Biblia: «Xliskgalala chixku tlawa pi ni lakapala nasitsi, chu tlawa pi tlan natasiya komo ni kuenta tlawa tuku nitlan tlawanikan» (Proverbios 19:11).

  La tlan namakgantaxtiyaw: Max minatlatni nawanikgoyan tuku nitlan namamakgkatsiniyan, o ni katimaxkikgon tapaxtikatsinilh xlakata tuku tlawaya xpalakatakan. Komo chuna nala, kalakpuwanti: «¿La xakmakgkatsilh akit komo ni putum tlan xaktlawalh? ¿Ni xaksitsilh?». Komo akgatekgsa tuku makgkatsikgo chu katapatiya mi natlatni tlakg tlan nakitaxtu.

• Kalakputsa tuku tlan natlawaya.

  Tuku wan Biblia: «Nitlan kitaxtu tuku tlawaputunkan komo ni pulana liwana chuwinankan, pero niku anan lhuwa stakyawananin tlan kitaxtu» (Proverbios 15:22).

  La tlan namakgantaxtiyaw: Kaputsa la tlan nakamakuchikan mi natlatni komo tatatlakgo. Kaputsa tuku tamakgtay anan kachikin niku lamakgo. Kakatachuwinanti atanu lataman tiku na kakuentajtlawamakgo xnatlatnikan tiku linkgo kata. Komo kgalhiya natalan, katatamakxtupi xlakata nakgalhchuwinanantit la nakuentajtlawayatit minatlatnikan chu ni kaj chatum tlakg tuwa namakgkatsi

  

• Kakatsi tuku tlan tlawaya chu tuku ni.

  Tuku wan Biblia: «Kgalhi liskgalala tiku ni lakpuwan pi putum tlan tlawa» (Proverbios 11:2).

  La tlan namakgantaxtiyaw: Kakatsi tuku tlan tlawaya chu tuku ni. Xlikana pi ni kgalhiyaw putum kilhtamaku chu litliwakga chu nila tlawayaw putum tuku lakaskinaw xpalakata kinatlatnikan. Komo tlakg natalakaskin tamakgtay xlakata nakuentajtlawaya minatlatni chu nila miʼakstu tlawaya, kakaskini tamakgtay atanu tiku xalak mifamilia o kaputsa tiku liskujkgo xlakata nakuentajtlawakgo tiku tatatlakgo.

• Katamakgtakgalhti.

  Tuku wan Biblia: «Nitiku lakgmakgan xmakni, wata mawi chu kuentajtlawa» (Efesios 5:29).

  La tlan namakgantaxtiyaw: Maski lakgayat nakakuentajtlawaya minatlatni, na talakaskin pi miʼakstu nakuentajtlawakana chu komo tamakgaxtokgnita na milikuentajtlawat mifamilia. Talakaskin liwana nawayana, najaxa chu tlan nalhtataya (Eclesiastés 4:6). Chu na namin kilhtamaku natalakaskin najaxa. Chu chuna, ni tuwa katimakgkatsi nakakuentajtlawaya minatlatni.

¿Wan Biblia pi kamanan nakuentajtlawakgo xnatlatnikan kxchikkan?

Biblia ni wan pi kamanan nakakuentajtlawakgo xnatlatnikan kxchikkan. Makgapitsi familias mastakgo talakaskin pi xnatlatnikan natawilakgo kxchikkan. Pero max namin kilhtamaku nalakpuwankgo pi tlakg tlan nakalinkan niku kakuentajtlawakan lakgkgolotsin. Lu tlan kitaxtu akxni familia tamakxtumikgo xlakata nalaksakkgo tuku tlakg tlan nakakitaxtuni xputumkan (Gálatas 6:4, 5).