Kamakgtayayaw latamanin niku lama «guerras lakatsu chu lakgamakgat»

K’uma xa’awatiya kilhtamaku ni kaks lilakawanaw pi lama «guerras lakatsu chu lakgamakgat» (Mateo 24:6). Maski lhuwa kinatalankan patinamakgo xlakata uma, putum kilhtamaku makgamakglhtinamakgo tamakgtay nema maklakaskimakgo. Tlan kmakgkatsiw akxni kgaxmatwi Xlipulaktutu tamakatsin xla Lakgkgolotsin tiku Pulalinankgo (2022) pi anta k’Europa del Este lakkaxwilika nakamakgtayakan natalan tiku titaxtumakgo guerra anta k’Ucrania. ¿Tuku tlawamaka xlakata namakgtayanankan maski lama guerra? ¿La litamakgtayamakgo uma natalan xalak Ucrania?

¿Tuku maklakaskimakgo? ¿La kamalakgachanimaka?

24 xla febrero kata 2022, akxni tsukulh guerra, Comité de Coordinadores mastalh talakaskin pi xlimaklakaskinka tumin xlakata tlan xkamakgtayaka natalan. Sucursal xalak Ucrania tsukulh tamawa tuku xtalakaskin, chu 27 Comités de Socorro kamakgpitsinikgolh natalan.

Nachuna, natalan tiku wilakgolh niku pulalinankan kintaskujutkan tsukukgolh lakgpuwankgo la tlan xmakgtayakgolh sucursal xalak Ucrania. Comité de Coordinadores chu Comité de Publicación xla Lakgkgolotsin tiku Pulalinankgo lakgayawakgolh Departamento Mundial de Compras xlakata akxtum xkataskujkgolh natalan xla Sucursal xalak Ucrania chu Polonia, xlakata xlakkaxwilikgolh tuku x’amakgo tlawakgo. Chali chali, lhuwa natalan xla departamentos de Compras, Envíos chu Asuntos Legales xalak umakgolh sucursales akxtum xkataskujkgo chatum tiku makgtapakgsi Comité de Sucursal xalak Ucrania chu makgapitsi natalan xla Departamento Mundial de Compras, xlakata xlakkaxwilikgolh la x’amakgo skujkgo.

Jay Swinney xla Departamento Mundial de Compras wan: «Pulana kilikatsitkan xwanit tuku xmaklakaskinkgo natalan. Xkamaxkiputunaw liwat chu atanu tuku xmaklakaskinkgo. Pero ni kajwatiya xkilikatsitkan xwanit tuku xmaklakaskinkgo, na kilikatsitkan xwanit la tlan xkamalakgachaniw chu tunkun xkalakgchalh anta k’Ucrania».

9 xla marzo kata 2022, xkatsikan tuku x’amaka malakgachakan. Laksakka namujukan kcajas tuku xtalakaskin la liwa chu skiti nema tajuma klata, cereales, arroz, stapu, lichakgan chu kapsnat. Ama kilhtamaku xlakpuwankan pi tlan xlitamawaka putum uma kaj 65 dólares chu xka’akchanilh akgtati semanas chatunu lataman. Komo max lhuwa mil natalan x’amakgo maklakaskinkgo uma, Comité de Coordinadores matlanilh pi xlimaklakaskinka lhuwa tumin xlakata xkamalakgachanika. Pero ¿la x’amakgo makgpitsikgo?

13 xla marzo, chatiy natalan xalak Polonia wi tuku tlawakgolh: lata ksucursal xalak Polonia asta k’Ucrania linkgolh tuku xmaklakaskinkgo natalan, lakatsu k’akgtum kachikin wanikan Leópolis (Lviv). Akxni nina xchan uma kilhtamaku, natalan xla sucursal xalak Ucrania chu Polonia kamakgtayakgolh xlakata chuna tlan xkitaxtulh. Makaxtlawaninankgolh kapsnat xlakata mapakgsinanin xkamaxkikgolh talakaskin natanukgo k’Ucrania chu xkatsikgolh pi xamakgo makgtayankgo, kuentajtlawakgolh pi xputlawkan xtasiyalh pi xlinkgo tamakgtay chu makgapisti natalan xala anta laksakkgolh akgtum tiji niku lakapala tlan xchankgolh chu xmakgstokgwilikgolh tuku xlinkgo anta k’Ucrania.Tuku xlinkgo mastakgolh kLeópolis chu ni cha’alh akgtum kihtamaku xkamakgpitsikanita Comités de Socorro, chu natalan tlan taspitparakgolh kPolonia chu nitu ka’akgspulalh. Chuna kitaxtulh xlakata Jehová kasikulunatlawalh chu xlakata tlan tuku lakkaxwilikgolh.

Maski tlan kakitaxtunilh, natalan kajwatiya makgpitsikgolh akgtum tonelada xla tamakgtay (1 tonelada estadounidense). Pero xtsankgajku xmakgpitsika atanu 200 toneladas (220 toneladas estadounidenses). ¿La x’amaka linkgokan chu lakapala xmakgpitsika?

«Minkachikin xatapaxuwan natamakamastaniyan»

Akxni lhuwa latamanin kxlikalanka katiyatni likgalhtawakgakgolh jw.org pi guerra xkatlawanima tuku nitlan kinatalankan, tunkun makgtayanamputunkgolh. Tiku lakgamakgat wilakgo mastakgolh tumin xlakata tlan xlimakgtayanankgolh taskujut nema tlawamakgo xtatayananin Jehová, chuna tlawakgolh xlakata xkatsikgo pi tlan x’amaka limaklakaskinkan uma tumin. Makgapitsi tiku lakatsu lamakgo limakgtayanankgolh xkilhtamakujkan, xtuminkan chu xlitliwakgakan. Wa uma makgapitsi li’akxilhtit.

Anta kPolonia, lhuwa natalan lakkaxwilikgolh lhuwa mil cajas niku xtajuma tuku talakaskin, chu lhuwa laktsu kamanan, kamakan tlawakgolh dibujos. Bartosz Kościelniak, tiku makgtapakgsi Departamento de Compras xla Sucursal xalak Polonia, wan: «Salmo 110:3 lichuwinan pi xkachikin Jehová xatapaxuwan x’ama tamakamastani, makglhuwa xaklikgalhtawakganit uma tachuwin pero nikxni xakakxilhnit la xkgantaxtu asta akxni kka’akxilhli lhuwa ciento latamanin pi lu xmakgtayanamputunkgo».

Chatum tala tiku kgalhi akgtum empresa, masakuaninalh lhuwa putlaw chu lakgxokgolh gasolina nema xtalakaskilh. Xla wan: «Chuna kkalimasiyani kinatalankan chu Jehová pi lu kkapaxki. Lu kpaxuwa xlakata kmakgtayanalh». Xlakata tlan xmakgpitsika putum umakgolh tamakgtay mastaka liwaka 7.700 litros xla gasolina chu natalan mastakgolh xkilhtamakujkan chu xlitliwakgatkan xlakata matlawinankgolh putlaw atsinu 48.000 kilometros.

Xlakata xtapaxkitkan chu palha xtaskujutkan tiku makgtayanankgolh, 28 xla marzo, 15 kilhtamaku alistalh lata xapulana akxni ankgolh k’Ucrania, xmakgpitsikanita 100 toneladas (110 toneladas estadounidenses) xla liwat, likuchun chu atanu tuku maklakaskinkan chali chali. Chu komo lhuwa natalan chu makgapitsi stanananin mastakgolh tuku xtamaklakaskin ni lhuwa tumin laktlawaka. La uku, xtatayananin Jehová malakgachanitaw k’Ucrania liwaka 190 toneladas (209 toneladas estadounidenses) xla tamakgtay. ¿La makgkatsikgo natalan tiku makgamakglhtinankgolh?

Cajas xliminkgo tapaxkit

Akxni kalichinka cajas kLeópolis, Comités de Socorro kamakgpitsinikgolh tiku xmaklakaskinkgo. Lhuwa cajas kalinka kkachikinin nema liwaka 1.300 kilometros xlilakgamakgat kLeópolis. Maski lakkaxwilika pi lakapala xmakgpitsinanka, uma taskujut lilh kilhtamaku.a

Markus Reinhardt, tiku makgtapakgsi Comité de Sucursal xalak Ucrania, wan: «Xlakata tuku lama, natalan akxilhkgonit pi Jehová paxkinan chu pi lu tlan kitaxtu akxni kgalhakgaxmatkan tuku wankgo tiku makgpulalinankgo, asta akxni nina lanit tuku nitlan. Akgtum liakxilhtit, putum kinkamakgpuwantinikanitan xlakata nakgalhiyaw liwat chu chuchut nema nakinka’akchaniyan lhuwa semanas. Xlakata uma, chatum kgolotsin xla akgtum congregación xalak Kiev tiku wanikan Anton wan: “Lu paxtikatsininanaw xlakata xkachikin Dios kinkawaninitan tuku natlawayaw akxni natitaxtuyaw tuku tuwa. Xlakata kkgalhinitaw chuchut, liwat chu akgtum radio uma kinkamakgtayanitan”. Lu tlan pi natalan liwana kgalhakgaxmatnankgolh, uma mastalh kilhtamaku xlakata sucursal tlan xlakkaxwilih la x’amakgo kamakgtayakgo».

¿La makgkatsikgolh kinatalankan akxni chilh tamakgtay? Míkola chu Zinaida tiku lamakgolh kJárcov, kinkawanikgoyan: «Xlakata kinkalilakgaputsakanan kinkamakgapaxuwayan. Paxtikatsinilh xlakata liwat chu likuchun. Tasiya pi wa Jehová tiku makgtayanama». Valentina tiku wi kwatiya uma kachikin wan: «Akxni tsukulh guerra, chu xakanaw putsayaw liwat ni ankgalhin xaktekgsaw tuku xakmaklakaskinaw xlakata lhuwa latamanin xwilakgolh. Pero Jehová xkatsi tuku xakmaklakaskinaw. Wa xlakata tlawalh pi kinatalankan xkinkaliminikgon cajas niku xtajuma tuku xakmaklakaskinaw. Akxni lu katuwa wilaw lakpuwanaw pi nialh katsiyaw tuku natlawayaw, pero uma kilhtamaku akxilhaw la Jehová chu xkachikin lu tlan kinkakuentajtlawakgoyan. Lu tlan limakgkatsikan akxni namaxkikana tamakgtay akxni lu maklakaskimpat».

Evguen chu Irina, tiku tsalataxtukgolh kkachikin Mariúpol, wankgo: «Lu kkapaxtikatsiniyan xlakata tapaxkit nema kalimasiyanitit kifamiliajkan. Tamakgtay chilh akxni xakmaklakaskinaw. Xapulana klakpuwaw pi uma cajas kaj xtajuma tuku xakamaw wayaw pero akxni kmalakkiw xliminkgo tapaxkit».

Liwana tasiya pi x’espíritu chu xtapulalit Jehová wa tiku pulalimakgo uma taskujut akxni anan «guerras lakatsu chu lakgamakgat». Chu tumin nema xatapaxuwan mastayatit anta k’obra mundial, chu nachuna ksitio xla internet donate.jw.org. ¡Lu kkapaxtikatsiniyan xlakata mintamakgtaykan!

Tunkun makgtayanaw chu ni kalipekua wiliw kilatamatkan

1. 

   24 xla febrero kata 2022: Comité de Coordinadores mastalh talakaskin pi xlimaklakaskinka tumin xlakata sucursal xalak Ucrania tlan xkamakgtayalh natalan.

2. 

   24 xla febrero asta 8 xla marzo kata 2022: Sucursal xalak Ucrania tsukulh tamawa tuku xtalakaskin chu Comités de Socorro kamakgpitsinikgolh natalan. Sucursal na lakkaxwililh namakglhtinan chu namakgpitsi tamakgtay nema makaminkgolh natalan xalak Polonia.

3. 

   9 xla marzo kata 2022: Comité de Coordinadores mastalh talakaskin pi xkalinika tamakgtay natalan xalak Ucrania.

4. 

   10 asta 12 xla marzo kata 2022: Lakkaxwilika namalakgachakan tamakgtay lata kPolonia asta kLeópolis (Ucrania).

5. 

   13 xla marzo kata 2022: Linka xapulana tamakgtay lata kPolonia asta kLeópolis.

6. 

   14 asta 16 xla marzo kata 2022: Anta kPolonia, tiku xatapaxuwan makgtayanankgo kDepartamento Local de Diseño y Construcioón lakkaxwilikgolh k’akgtum Salón de Asambleas klakatsu kkachikin Poznán xlakata namakaxkgo cajas nema mujunikgolh liwat chu atanu.

7. 

   17 xla marzo kata 2022: Akgtati kilhtamaku alistalh akxni malakgachaka xapulana tamakgtay, linkgolh 13 toneladas xla tamakgtay (14 toneladas estadounidenses) niku tapakgta Ucrania.

8. 

   21 asta 27 xla marzo kata 2022: Anta kPolonia lakkaxwilika tlakg lhuwa cajas xlakata xmalakgachaka k’Ucrania. Chu ni xchan akgtum kihtamaku xkamakgpitsikanita niku tlakg xtalakaskin.

9. 

   28 xla marzo kata 2022: Lata 9 xla marzo kata 2022, akxni lakkaxwilika pi tlan nakalinikan tamakgtay natalan xalak Ucrania, tamakgpitsinita asta la uku 100 toneladas (110 toneladas estadounidenses) xla liwat, likuchun chu atanu tuku maklakaskinkan chali chali.

Asta la uku, xtatayananin Jehová kmalakgachanitaw k’Ucrania liwaka 190 toneladas (209 toneladas estadounidenses) xla tamakgtay.