Taskujut nema katlawakgoka akxni nina xtsuku pandemia

Akgatunu kata lhuwa mil latamanin tamunukgo. Wa xlakata tlakg maklakaskinkan edificios niku nakakninaniyaw Jehová. Chu wa xlakata, departamentos locales de Diseño y Construcción kxlikalanka katiyatni lakkaxwilikgolh natlawakgo o namasastikgo liwaka 2,700 edificios kkata 2020.a

Lu nitlan, pero pandemia xla COVID-19 malakgachokgonit umakgolh taskujut. Xlakata natalan ni xkapasalh COVID-19 chu xlakata nakakgalhakgaxmataw mapakgsinanin, Comité de Publicación xla Lakgkgolotsin tiku Pulalinankgo wankgolh pi xmalakgachokgoka umakgolh taskujut nema xlakkaxwilikanit. Pero, kkata 2020 akxni nina xtsuku pandemia tlan tlawakgoka chu kamasastika liwaka 1,700 edificios niku kakninanikan Jehová. Nachuna, kamasputuka liwaka 100 xlakaskinka taskujut ksucursales. Kalichuwinaw pulaktiy tuku tlawaka chu la litamakgtayakgonit natalan.

Sucursal xalak Camerún. Xamakgan sucursal, nema xwi kkachikin Duala, lu aktsu xwanit chu lhuwa tuku xtalakaskin pi xkaxtlawaka. Comité de Publicación lakpuwa namasasti sucursal, pero uma lu tapalaxla xʼama kitaxtu. Na lilakpuwankgolh pi tlan xtlawakgolh xasasti edificios o xtamawakgolh akgtum edificio chu xlakkaxtlawakgolh. Pero nila chuna tlawakgolh.

Ama kilhtamaku, natalan katsikgolh pi mapakgsinanin xlakkaxwilimakgo natlawakgo akgtum carretera kxnorte Duala, niku lakatsu xwi akgtum Salones de Asambleas. Xasasti carretera nema xʼamaka tlawakan xmakgtayanalh xlakata ni tuwa xchanka ksucursal chu na ni tuwa xkgalhika putum tuku xtamaklakaskin. Wa uma tuku sucursal xmaklakaskima. Wa xlakata Lakgkgolotsin tiku Pulalinankgo wankgolh pi xtlawaka xasasti sucursal kputawilh niku wi Salón de Asambleas.

Xlakata tlan xtlawakgolh makgpitsi tuku xlakkaxwilikanit, natalan contratarlikgolh akgtum empresa nema xkatlawa chiki, chu uma makgtayanalh ni lu lhuwa tumin chu ni lu lhuwa kilhtamaku namakgasputkan. Uma taskujut ni tapalaxla litlawaka nixawa la xlakpuwankanit: akgataxtulh akgtiy millón dólares. Natalan tiku skujkgo kBetel ankgolh tawilakgo kʼuma xasasti sucursal akxni nina xtsuku pandemia xla COVID-19.

La uku, betelitas xalak Camerún tlakg tlan niku wilakgo chu niku skujkgo, chu akgtum xtamaskiwin Jehová liʼakxilhkgo uma sucursal. Akgtum tamakgaxtokgat wan: «La uku tlakg kskujputunaw chu ni kpatsankgayaw uma lu xastlan tamaskiwin».

Oficina Remota de Traducción xla tachuwin tojolabal (México). Natalan tiku matitaxtikgo likgalhtawakga ktachuwin tojolabal, akglhuwa kata skujkgolh ksucursal xalak Centroamérica, kMéxico. Pero tachuwin tojolabal chuwinankan kkachikin Altamirano chu Las Margaritas, liwaka 1,000 kilómetros xlimakgat lata niku wi sucursal. Wa xlakata, traductores lu tuwa xmakgkatsikgo nakatsikgo la chuwinankgo latamanin xalak xkachikinkan. Chu sucursal na tuwa xmakgkatsi nakatekgsa natalan tiku lakatsu xlamakgo xlakata xmakgtayanankgolh namatitaxtikgo likgalhtawakga o natlawakgo grabaciones kʼuma tachuwin.

Wa xlakata, Comité de Redacción xla Lakgkgolotsin tiku Pulalinankgo wa pi umakgolh natalan xʼankgolh latamakgo niku chuwinankan tachuwin tojolabal. Wa xlakata, sucursal tamawalh chu lakkaxtlawalh akgtum edificio. Uma tlakg ni tapalaxla kitaxtulh nixawa komo xtlawaka xasasti edificio o xrentarlika akgtum.

Chatum traductor kinkalitachuwinanan la makgkatsi: «Akgkaw kata lata kskujli ksucursal, ni ktekgsli nipara akgtum familia tiku xchuwinalh kintachuwin. La uku kʼoficina niku kskujmaw wi kxlakʼitat kachikin niku chuwinankan tojolabal. Chali chali tlan kkatachuwinan latamanin kkintachuwin. Uma kimakgtayanit tlakg nakkatsini la nakchuwinan chu tlakg tlan naktlawa kintaskujut».

Tuku lakkaxwilikanit natlawakan kkata 2021

Kkata 2021, komo natatlani, liskujputunkan 75 oficinas de traducción chu amakgapitsi edificios niku namasiyakan la tlakg tlan natlawakan xtaskujut Dios. Na chuntiya naliskujkan 8 taskujut nema lakkaxwilikanit ktanu tanu sucursales, anta makgtanuma taskujut nema tlawamaka kRámapo (Nueva York) chu taskujut nema tlawamaka xlakata namalakxijkan sucursales xalak Argentina chu Italia. Nachuna, talakaskin liwaka 1,000 Pukgalhtawakga xla xtatayananin Jehová. Nachuna, anan liwaka 6,000 Pukgalhtawakga nema nialh laktlan chu natalakaskin nalakgpalikan, chu atanu 4,000 Pukgalhtawakga nema talakaskin nalakkaxtlawakan.

¿La kaxokgokan putum umakgolh taskujut? Tala Lázaro González, tiku makgtapakgsi kComité de Sucursal xalak Centroamérica, kinkalitachuwinanan. Xpalakata taskujut nema tlawaka kʼOficina de Traducción xla tojolabal, wan: «Natalan tiku wilakgolh kkachikinin nema sucursal pulalima, ni kgalhikgo lhuwa tumin. Komo natalan kxlikalanka katiyatni ni xkinkamakgtayakgon, nila xaktlawaw amakgapitsi oficinas de traducción niku tlan skujkgo natalan tiku chuwinankgo amakgapitsi tachuwin. Donaciones nema mastayatit, kinkamakgtayanitan xlakata nakkamalakgachayaw traductores lakatsu kkachikinin niku chuwinankan xtachuwinkan. Lu kkapaxtikatsiniyan putum wixin natalan xlakata xatapaxuwan maskiwinanatit mintuminkan». ¿Akxilhtit? Putum umakgolh taskujut tlan tlawakanit xlakata tumin nema xatapaxuwan mastayatit. Makgapitsi umakgolh donaciones tlan tlawakan ksitio xla internet donate.jw.org.