¿Xlilat nakatlawaniyaw oración santos?

Biblia kinkamaxkiyan xatakgalhtin

Ni xlilat. Biblia masiya pi kajwatiya kilitlawanitkan oración Dios chu tuku naskiniyaw naliskinaw kxtukuwani Jesús. «Jesús kawanilh xtamakgalhtawakgen. Wixin chuna katlawatit miʼoracionkan: Kintlatikan tiku wilapi kʼakgapun, katamasantujlilh mintukuwani» (Mateo 6:9, Biblia de América [BA]). Jesús nikxni masiyalh pi kilitlawanitkan oración chatum santo, chatum ángel o atanu komo ni wa Dios.

Jesucristo na wa: «Akit tiji, xaxlikana chu latamat. Nitila lakgchan xaTlat komo ni kimpalakata» (Juan 14:6, BA). Kajwatiya Jesús tlan kinkapalakachuwinanan kxlakatin Dios (Hebreos 7:25).

¿Xlilat natlawaniyaw oración Dios chu nachuna santos?

Pulaktum xLipulakkaw Limapakgsin nema Dios mastalh, wan: «Akit, Malana miDios, akit chatum Dios tiku lakgsitsinan» (Éxodo 20:5, BA). ¿Tuku wamputun pi Dios «lakgsitsinan»? Akgtum nota nema kgalhi Biblia de América wan: «Kajwatiya xla Dios litaxtu, nipara akgtum imagen [...] namakglhti tuku xla lakgchan». Dios lakaskin pi kajwatiya xla kakakninaniw, chu oración anta makgtanuma ktakaknin nema maxkikan Dios (Isaías 48:11).

Komo atanu tiku natlawaniyaw oración, max chatum ángel o chatum santo, Dios nasitsi. Libro xla Apocalipsis (Revelación) lichuwinan pi akxni apóstol Juan lakgtakilhputalh chatum ángel xlakata nakakninani, xla lakakilhnilh chu wanilh: «Nichuna katlawa, xlakata akit kaj mintaskujni chu xtaskujni minatalan, tiku chuntiya palakachuwinamakgo Jesús. Kajwatiya Dios milikakninanit» (Revelación 19:10, BA).