¿Xlikana lama Akgskgawini?
Biblia kinkamaxkiyan xatakgalhtin
Chuna, Akgskgawini xlikana lama. Xla chatum ángel tiku tlawalh tuku nitlan chu talalakatawakalh Dios. La uku «xmapakgsina kakilhtamaku» litaxtu (Juan 14:30; Efesios 6:11, 12). Biblia maklakaskin makgapitsi tukuwani nema limasiya la likatsi uma espíritu. Wa umakgolh makgapitsi:
Satanás, nema wamputun «lakatitayana» (Job 1:6).
Akgskgawini, nema wamputun «tiku maxkajwani xatlan xtukuwani achatum» (Apocalipsis 12:9).
Luwa, kBiblia maklakaskinkan la tiku akgskgawinan (2 Corintios 11:3).
Tiku matlawinamputun tuku nitlan (Mateo 4:3).
Xaʼakgsanina (Juan 8:44).
Ni wa kilhchanima tuku nitlan kgalhiyaw o tuku nitlan tlawayaw putum akinin
Wi tiku lakpuwankgo pi Akgskgawini wa kilhchanima tuku nitlan kgalhiyaw o tuku nitlan tlawayaw putum akinin, chu lakpuwankgo pi asta Dios na kgalhi tuku nitlan. Pero Biblia lichuwinan akgtum kilhtamaku akxni Dios tachuwinalh Akgskgawini. Xlakata Dios ni kgalhi talakgalhin chu xaskulunku, nila kgalhi tuku nitlan (Deuteronomio 32:4; Job 2:1-6). Nachuna, Akgskgawini xmatlawiputun tuku nitlan Jesús chu xla ni xkgalhi talakgalhin (Mateo 4:8-10; 1 Juan 3:5). Biblia liwana masiya pi Satanás xlikana lama chu ni wa kilhchanima tuku nitlan anan o tuku nitlan tlawayaw.
Lhuwa latamanin ni kanajlakgo pi Akgskgawini xlikana lama. Pero uma ni kaks kinkamalakawaniyan xlakata Biblia wan pi Satanás maklakaskin kaxatukawa taʼakgsanin xlakata natlawa tuku xla lakaskin (2 Tesalonicenses 2:9, 10). Chu pulaktum tuku lu tlan kitaxtuninit wa pi kamakanajli latamanin pi xla ni xlikana lama (2 Corintios 4:4).
Tuku lakpuwankgo makgapitsi xlakata Akgskgawini
Tuku ni xaxlikana: Lucifer wa atanu tukuwani nema lilakgapaskan Akgskgawini.
Tuku xaxlikana: Tachuwin xahebreo nema kmakgapitsi Biblia matitaxtikan «Lucifer» wamputun «makgxkgakganan» (Isaías 14:12). Uma tachuwin anta min kʼakgtum tamakatsinin nema kalichuwinan mapakgsinanin xalak Babilonia, chu wan pi Dios xʼama kamaktuju xlakata tlankajwa xwankgonit (Isaías 14:4, 13-20). Kʼuma tamakatsinin kalikgalhkgamanankan mapakgsinanin xalak Babilonia akxni kamasputukan chu kalimapakuwikan la tiku «makgxkgakganan».
Tuku ni xaxlikana: Akgskgawini wa taskuja Dios.
Tuku xaxlikana: Akgskgawini xtalatlawana Dios chu ni kskujni. Satanás na katalatlawa tiku skujnikgo Dios, chu wa xlakata kaputsastalani chu kalimawaka tuku ni xaxlikana (1 Pedro 5:8; Apocalipsis 12:10).