Tiku lichuwinankgo xTamapakgsin Dios makatsininankgo

Tekgsli tapaxuwan kxlatamat

JESÚS wan pi kalakgapasa xborregos (Juan 10:14). Komo chatum lataman kgalhi akgtum tlan naku, paxki tuku xaʼakgstitum chu putsa takaksni nakalakgapasputun kstalaninanin Jesús. Nakgalhi tapaxuwan kxlatamat, chuna la titaxtulh chatum puskat xalak Bélgica. Wa uma tuku titaxtulh:

«Akxni xtatayananin Jehová lakgatlakgkgolh kimalakcha, akit lu xaklipuwama chu xaklakpuwama kiʼakstu nakimakgnikan. Lu klakgatilh akxni kiwanikgolh pi putum taʼakglhuwit nema anan kkakilhtamaku xʼama lakgsputa, pero ni klakgatilh pi Dios wa tiku xtlawalh uma. Akgtsayan kata lata ni xakan kpusikulan, xlakata xakxkajni putum tuku nitlan xtlawakan anta. Kʼakgatekgsli pi putum tuku xkiwanikgo xtatayananin Jehová xaxlikana xwanit, chu liwana kakxilhli pi nila latamayaw komo ni wa Dios nakinkapulalinan.

»Lu nitlan pero, nina makgas lata xkinkilakgapaxialhnankgonitanchi xtatayananin Jehová nialhla kkatachuwinalh. Lu nitlan klimakgkatsilh. Xakxkuli akgtiy caja xla cigarro akgatunu kilhtamaku, chu asta ktsukulh klimaklakaskin drogas. Xlakata lu xaktachuwinamputun kintata tiku xninita tlawalh pi xaklimaklakaskilh taskuwan. ¡Lu nitlan tuku kitaxtulh! Akgatunu tsisni, akxni kiʼakstu xaktawila, xakmakgkatsi la demonios xkimakgapekuankgo. Chu uma akglhuwa papaʼ makgapalalh. Akxni xtsiswan lu xakpekuan komo kaj kiʼakstu xaktawilalh.

»Akgtum kilhtamaku akxni kalh talakgchokgo, lakatanu niku klakalh chu kchalh niku xtlawamaka akgtum lanka pukgalhtawakga. Lu kaks klilakawa akxni kakxilhli pi lhuwa latamanin xtaskujmakgolh anta. Akxni ktalakatsuwilh, kakxilhli pi xtatayananin Jehová tiku xtlawamakgolh akgtum Pukgalhtawakga. Chu klakapastakli akxni xkilakgapaxialhnankgo kkinchik, chu klakpuwa pi lu lipaxuw xwa komo putum latamanin xlatamakgolh chuna la xlakan.

»Xlikana xaklakaskin pi xkilakgapaxialhnamparakgolh, wa xlakata ktachuwinalh chatum tiku anta kskujma. Ktlawanilh oración Dios, chu akgkaw kilhtamaku alistalh publicador tiku xaktachuwinanit lakgatlakgli kimalakcha. Kiwanilh pi xaklitakgalhtawakgapa Biblia, chu kmakglhtinampa takgalhtawakga. Kiwanilh pi xakalh ktamakxtumit, chu kalh kPukgalhtawakga. ¡Nikxni xakakxilhnit la xlalimasiyanikgo tapaxkit! Makgan xakkaputsama latamanin tiku lu xpaxuwakgolh chu xlalimasiyanikgo tapaxkit, chu la uku xakkatekgsnit.

»Lata uma kilhtamaku ankgalhin kkan ktamakxtumit. Max akgtutu semanas alistalh nialh kxkulilh. Kkamakgalh putum libros nema xlichuwinankgo taskuwan chu tatlakgni nema xlichuwinankgo demonios, chu kmakgkatsilh pi demonios nialh tsukukgolh kimakglhuwikgo. Ktsukulh lilatama tastakyaw nema Jehová kinkamaxkiyan kxtachuwin, chu akgtutu papaʼ alistalh ktsukulh lichuwinan xalaktlan tamakatsinin. Ktamunulh akgchaxan papaʼ alistalh, chu xliʼakgtiy kilhtamaku precursora auxiliar klitaxtulh.

»Lu kpaxtikatsini Jehová xlakata putum tuku tlawanit kimpalakata. La uku kkgalhi takgalhkgalhin kkilatamat. Chuna, xtukuwani Jehová akgtum torre litaxtu nema tliwakglh ya nema kimputatsekgni litaxtulh (Proverbios 18:10). Kmakgkatsi chuna la salmista tiku tsokgwililh: “¡Xlakata tawilakan akgtum kilhtamaku kminchik tlakg tlan nixawa natawilakan akgtum mil kilhtamaku alakatanu! Akit ktayaputun kxkilhtin xchik kiDios nixawa naktawila kchiki niku tlawakan tuku nitlan”».

Uma puskat kgalhilh takgalhkgalhin kxlatamat. Chu putum latamanin tiku naputsakgo Jehová xliputum xnaku na tlan nakgalhikgo takgalhkgalhin.