Makgapitsi latamanin tuwa makgkatsikgo napaxkikgo Dios, xlakan akxilhkgo la tiku nila akgatekgsnikan, tiku makgat wi o tiku nitlan likatsi. Kaʼakxilhti tuku wankgo makgapitsin:

• «Maski xakskini tamakgtay Dios, lu makgat xwi xakmakgkatsi. Xakakxilha pi nila lakgchankan chu nitu makgkatsi.» (Marco, Italia.)

• «Xakskujnaniputun Dios pero lu makgat xwi xakakxilha. Xaklakpuwan pi xaluku, tiku kaj watiya xkinkamalakgaxokgeputunan. Xaklakpuwan pi ni paxkinan.» (Rosa, Guatemala.)

• «Akxni aktsujku xakwanit xaklakpuwan pi Dios kajwatiya xakxilha kintalakgalhinkan xlakata nakinkamalakgaxokgeyan. Alistalh ktsukulh akxilha pi lu makgat xwi, la chatum mapakgsina, pero ni kalilakgaputsa latamanin.» (Raimunda, Canadá.)

¿Chu wix la lakpuwana? ¿Nila paxkikan Dios? Lhuwa latamanin tiku wankgo pi kanajlakgo, akglhuwata siglo katlawanikanit uma takgalhskinin. Kkata 500 asta 1500 akxni xminita Jesús atsinu ni putum latamanin, ni xtlawanikgo oración Dios. ¿Tuku xlakata? Xlakata xpekuanikgo. Historiador Will Durant wa: «¿La natlawani chatum makglakgalhina oración Dios tiku lu makgat wi chu nitlan likatsi?».

¿Tuku tlawanit pi chuna nalakpuwankgo latamanin? ¿Tuku xaxlikana masiya Biblia xlakata Dios? ¿Tlakg ni tuwa xpaxkiw komo xkatsiw xaxlikana?

TUKU WANKGO LATAMANIN

«Nina klakkaxlayaw komo Dios kgalhi xtukuwani. Komo xkgalhilh ni xkatsiw tuku wanikan.» (Makgalhtawakgena David Cunningham, kxlibro Theological Studies.)

WANTUKU WAN BIBLIA

Dios wa: «Akit Jehová. Wa uma kintukuwani» (Isaías 42:8). Jehová akgtum tachuwin xahebreo wamputun «Xla Tlawa Pi Chuna Nala» (Génesis 2:4, nota).

Jehová lakaskin pi namaklakaskinaw xtukuwani. Biblia wan: «Kamaklakaskintit xtukuwani. Kamasiyatit kkachikinin la likatsi. Kalichuwinantit pi xtukuwani talhman wi» (Isaías 12:4).

Jesús maklakaskilh xtukuwani Dios chu kamasiyanilh kstalaninanin. Akgtum kilhtamaku tlawanilh oración xTlat, wanilh: «Ktlawanit pi nalakgapaskgo mintukuwani chu na nakmasiya». ¿Tuku xlakata tlawalh? Wa: «Lakimpi wa ntapaxkit ntu nkilipaxki, kaʼananikgolh; chuj chi nkit kaktawilanikgolh» (Juan 17: 26).

TUKU XLAKATA MILIKATSIT

Teólogo Walter Lowrie tsokgli: «Chixku tiku ni lakgapasa xtukuwani Dios xlikana ni lakgapasa[...] chu nila paxki komo kaj lilakgapasa la akgtum litliwakga».

Chatum chixku wanikan Victor, putum semanas xʼan kxtakanjla pero nitu xkatsi xlakata Dios. Xla wan: «Akxni kkatsilh pi Dios wanikan Jehová, xtachuna la komo kiwanika, xla wanikan Jehová. La uku xaklakgapasnit tiku xkilitachuwinankanit. Chu kakxilha la chatum kiʼamigo».

Jehová, katalakatsuwini «tiku [lakpuwankgo] xtukuwani» chu wan: «Nakkalimasiyani tapaxkit, la chatum chixku tiku limasiyani tapaxkit xkgawasa tiku skujnani» (Malaquías 3: 16, 17). Dios kasikulunatlawa tiku maklakaskinkgo xtukuwani. Biblia wan: «Xampi xlipaks wanti xmapakuwilh xtukuwani nkimPuchinakan  [Jehová], naʼakgaputaxtuy» (Romanos 10:13).

TUKU WANKGO LATAMANIN

Diccionario Akal crítico de teología wan: «Trinidad, chatum Dios tiku watiya xaTlat, xaKgawasa chu Espíritu Santo». Diccionario abreviado del cristianismo wan: «Católicos, ortodoxos, anglicanos chu protestantes wa uma tuku kanajlakgo».

WANTUKU WAN BIBLIA

Jesús, xKgawasa Dios, nikxni wa pi xtachuna xwanit la xTlat. Wata wa: «Klakgan xaTlat, sampi wa xaTlat, tlakg xatlanka, ni xawa nkit» (Juan 14:28). Wanilh chatum kstalanina: «Klakgan nkinTlat ntalhman, chu wixin minTlatkan, kiDios, chu wixin miDioskan» (Juan 20:17).

Espíritu santo ni chatum lataman. Xapulana kstalaninanin Cristo «tilitatsamakgolh spiritu santo» chu Jehová wa: «Kit xataxajni nakmaxkikgoy xlipaks tachixkuwitat kispíritu» (Hechos 2:1-4, 17). Xʼespíritu santo Dios ni Trinidad, wa xlitliwakga Dios nema liskuja.

TUKU XLAKATA MILIKATSIT

Karl Rahner chu Herbert Vorgrimler tiku lakputsananikgo Biblia, wankgo xlakata Trinidad: «Nila katsikan xlakata uma, o maski xwanka tuku wamputun nila liwana xʼakgatekgska». ¿Tlan paxkikan tiku ni lakgapaskan chu nila tamakgachakgxi? Ni. Wa xlakata tamasiy xlakata Trinidad tlawa pi nila napaxkikan Dios.

Marco, tiku lichuwinaw kxapulana artículo, wan pi Trinidad xtlawa pi nila xtalakatsuwinilh Dios. «Xaklakpuwan pi Dios ni xlakaskin nalakgapaskan, uma xtlawa pi nila xlakgapaska chu nila nalakgtalakatsuwikan». Pero, «Dios liwana lakkaxwili tuku tlawa» (1 Corintios 14:33, TNM). Dios ni kinkatatsekgniyan, lakaskin kalakgapaswi. Jesús wa: «Akinin kkakninaniyaw tuku klakgapasaw» (Juan 4:22).

Marco wan: «Akxni kkatsinilh pi Dios ni akgtum Trinidad, tlakg tlan ktalalilh». Komo nakanajlayaw pi Dios lama uma natlawa pi tlakg nituwa napaxkiyaw. Biblia wan: «Wanti ni paxkinan, ni lakgapasa Dios; sampi wa Dios, tapaxkit» (1 Juan 4:8).

TUKU WANKGO LATAMANIN

«Akxni nikgo tiku tlawakgo tuku nitlan, tunkun ankgo kpupatin niku putum kilhtamaku kalimapatinikan “lhkuyat nema nikxni sputa”» (Catecismo de la Iglesia Católica). Makgapitsi tiku pulalinkgo takanajla, wankgo pi pupatin kaj tamakgatlinikan Dios chu Dios tamakgatlini lataman.

WANTUKU WAN BIBLIA

«Tiku nalakgalhinan wa nani.» (Ezequiel 18:4.) Tiku nikgonit «nialh tuku katsikgo» (Eclesiastés 9:5). Komo lataman niy chu nialhtu katsi, ¿la tlan napatinan «[k]lhkuyat nema nikxni sputa» o nila natalakatsuwini Dios?

Anta kBiblia, tachuwin xahebreo chu xagriego akxni tamatitaxti «pupatin» wamputun kalinin. Akgtum liʼakxilhtit, akxni Job xkgalhi akgtum tajatat chu lu xmapatinima wanilh Dios: «Komo xkimatsekgti kkalinin» (Job 14:13, Nueva Versión Internacional). O la wan La Sagrada Biblia, de Guillermo Jünemann,«kʼinfierno». Job ni xtawilaputun kpupatin wata kaj nialh xpatinamputun.

TUKU XLAKATA MILIKATSIT

Akxilhkan Dios pi nitlan likatsi tlawa pi ni natalakatsuwiniputunaw. Rocío tiku xalak México wa: «Akxni aktsujku xakwanit kimasiyanika pi xwi pupatin. Lu xakpekuani Dios nila xakkanajla pi xkgalhi lakwan tayat. Xaklakpuwan pi putum kilhtamaku xsitsi chu lu nitlan xlikatsi».

Tuku wan Biblia xlakata Dios chu la wilakgolh tiku nikgonita lakgpalilh xtalakapastakni Rocío. Xla lakapastaka: «Lu tlan kmakgkatsilh, xtachuna la kimakglhtika lanka takuka. Kkatsilh pi Dios lakaskin tuku tlan nakinkakitaxtuniyan, tiku kinkapaxkiyan chu akit tlan xakpaxkilh. La uku kakxilha la chatum tlat tiku kakuentajtlawa xkamanan chu lakaskin tlan katawilakgolh» (Isaías 41:13).

Lhuwa latamanin ankgo kxtakanajlakan xlakata pekuanikgo pupatin, pero Dios ni lakaskin naskujniyaw kaj xlakata napekuaniyaw. Jesús wa: «Napaxkiya Dios [Jehová] nkimPuchinakan» (Marcos 12:29, 30). Akxni katsiyaw pi Dios tlan likatsi, lu tlan makgkatsiyaw pi chuna nakatalakkaxla la linkgolh xlatamatkan latamanin. Chuna la Elihú, xʼamigo Job, nawanaw: «¡Dios nila tlawa tuku nitlan, Tiku kgalhi putum litliwakga natlawa tuku ni xaʼakgstitum!» (Job 34:10, Nueva Versión Internacional).

Akgtum kilhtamaku Jesús lichuwinalh xTlat kJerusalén, chu lichuwinalh pi takgsanin tuku xmasiyakgo tiku xpulalinkgo takanajla xalak ama xkilhtamaku (Juan 8:12-30). Tuku wa Jesús kinkamasiyaniyan pi liwana naʼakxilhaw tuku masikan xlakata Dios la uku. Jesús wa: «Komo nakgalhakgaxpatatit kintachuwin, wixin xaxlikana kintamakgalhtawakgen, chu nakatsiyatit xaxlikana, chu xaxlikana nakalakgmaxtuyan» (Juan 8:31, 32, TNM).

Akxni wa «Komo nakgalhakgaxpatatit kintachuwin», Jesús kinkawaniyan la nakatsiyaw komo akgtum xaxlikana o ni. Akxni wi tuku nawanikana xlakata Dios, kakgalhskinka: «¿Tatalakxtumi xtamasiyat Jesús chu tuku wan Biblia?». Nachuna katlawa la tiku kgaxmatnikgolh Pablo: liwana kalikgalhtawakga tuku wan Biblia xlakata nakatsiya komo xlikana o ni (Hechos 17:11).

Chuna tlawakgolh Marco, Rosa, chu Raimunda, tiku kalichuwinawa: katakgalhtawakgakgolh xtatayananin Jehová. ¿Tuku katsinikgolh?

Marco: «Tiku xkinkamakgalhtawakgeyan xlimaklakaskin Biblia xlakata nakinkakgalhtiyan takgalhskinin nema kimpuskat chu akit xakkgalhiyaw. Ktsukuw paxkiyaw Jehová, nachuna, kintamakgaxtokgatkan tlakg tatliwakglhli».

Rosa: «Xaklakpuwan pi Biblia maktum libro xla filosofía nema xlichuwinan tiku Dios, xlimaklakaskin xtalakapastakni lakchixkuwin. Titaxtulh kilhtamaku ktsukulh tekgsa xtakgalhtin kintakgalhskinin. La uku kkatsi pi Jehová xlikana lama, tiku tlan naklipawan».

Raimunda: «Kskinilh Dios xlakata xkimakgtayalh naklakgapasa. Ni lhuwa kilhtamaku titaxtulh kinchixku chu akit ktsukuw likgalhtawakgayaw Biblia. ¡Klakgapaswi xaxlikana xlakata Jehová! Lu klipaxuwaw akxni kkatsiw pi Dios lu xapaxkina».

Biblia ni kajwatiya kinkawaniyan tuku xaxlikana xlakata Dios; nakinkawaniyan xalakwan xtayat. Nachuna, kinkamakgtayayan nalakgapasaw «wantu Dios nkinkalilakgalhamanitan» (1 Corintios 2:12). ¿Tuku xlakata ni putsaya tuku masiya Biblia xlakata Dios, tuku natlawa kKatiyatni chu tuku natlawa kilhtamaku nema aku mima? Tlan tlakg nakatsiya kʼuma kpágina www.pr418.com/es niku wan «Enseñanzas bíblicas > Preguntas sobre la Biblia». Na tlan anta naskina pi namakgalhtawakgeyan chatum xtatayana Jehová. Komo chuna natlawaya nakatsiya pi tlan paxkikan Dios.