Xtachuna la Pedro, ni kataxlajwaniw

1. ¿Tuku tlawalh Pedro akxni akxilhli pi Jesús tlawalh akgtum milagro xlakata xchipakgolh lhuwa skiti?

PEDRO tantaskaka lu xliskujnit xlakata nachipa skiti pero nitu xchipanit. Lu kaks lilakawa akxni Jesús wanilh: «Kalipi barco anta niku pulhman, chu kamakapitit mintsalhkan xlakata nachipayatit skiti» (Luc. 5:4). Maski Pedro ni lu xkanajla pi x’amakgo chipakgo skiti, tlawalh tuku wanilh Jesús. Lu lhuwa skiti chipakgolh chu asta xtsalhkan xtaxtitmakgo. Akxni Pedro chu tiku anta xtawilakgo akxilhkgolh pi uma akgtum milagro xwanit «lu kaks lakawankgolh». Pedro pixlanka wa: «Kakintapanuni Malana, xlakata akit makglakgalhina chixku» (Luc. 5:6-9). Pedro xmakgkatsi pi nipara tsinu xlakgchan nataya kxlakatin Jesús.

2. ¿La nakinkamakgtayayan komo nalilakpuwanaw xliʼakxilhtit Pedro?

² Pedro xlikana tuku wa, «makglakgalhina chixku» xwanit. Biblia masiya pi makglhuwa wa chu tlawalh tuku nitlan nema alistalh nitlan limakgkatsilh. ¿Nachuna makgkatsiya la Pedro? ¿Akglhuwata kata lu liskujnita xlakata nalakgmakgana akgtum nixatlan tayat? Komo chuna, ni kataxlajwani. Xliʼakxilhtit Pedro tlan namakgtayayan. Kalilakpuwanti uma: Dios tlan xtitlawalh pi ni xtitsokgwilika kBiblia putum tuku nitlan tlawalh uma apóstol, pero matsokgwilininalh xlakata wi tuku nakinkamasiyaniyan (2 Tim. 3:16, 17). Akxni lilakpuwanaw tuku Biblia lichuwinan xlakata Pedro, chatum chixku tiku xtlawa tuku nitlan chu xmakgkatsi chuna la akinin, akxilhaw pi Jehová ni kgalhkgalhi pi akinin nikxni natlawayaw tuku nitlan. Xla lakaskin pi ni nataxlajwaniyaw, chu chuntiya naliskujaw ni natlawayaw tuku nitlan.

3. ¿Tuku xlakata talakaskin pi ni nataxlajwaniyaw?

³ ¿Tuku xlakata lu xlakaskinka ni nataxlajwaniyaw? Xlakata akxni wi tuku lu liskujaw natlawayaw, tlan namakgantaxtiyaw. Kalichuwinaw akgtum liʼakxilhtit. Max akglhuwa kata natalakaskin xlakata chatum tlakgna liwana natlakgnan. Max xapulana nitlan katitakgaxmatli la natlakgnan, pero komo chuntiya namakgatawakga, alistalh lu tlan natlakgnan. Chu maski lu makgatawakganita, max namin kilhtamaku nitlan katitlakgnalh. Pero maski chuna, ni taxlajwani. Chuntiya liskuja. Nachuna kitaxtu kimpalakatakan. Maski lakpuwanaw pi makgatlajanitaw tuku lakpuwanaw chu tuku tlawayaw, max namin kilhtamaku nakinkamakgatlajaparayan, pero ni anta tamakgxtakgaw. Putum akinin wanaw chu tlawayaw tuku alistalh nitlan limakgkatsiyaw. Pero komo ni nataxlajwaniyaw, Jehová nakinkamakgtayayan chuntiya natayaniyaw (1 Ped. 5:10). Kalichuwinaw tuku makgtayalh Pedro ni nataxlajwani. Talakgalhaman nema Jesús limasiyanilh apóstol Pedro, kinkamakgpuwantiniyan chuntiya naskujnaniyaw Jehová.

TUKU TUWA TITAXTULH PEDRO CHU TASIKULUNALIN NEMA MAKGLHTINALH

4. ¿Tuku xlakpuwan Pedro, chu tuku tlawalh Jesús xlakata tlan xmamakgkatsinilh? (Lucas 5:5-10).

⁴ Biblia ni wan tuku xlakata Pedro xlakpuwan pi «makglakgalhina chixku» xwanit chu na ni wan tuku talakgalhin xlilakpuwama (kalikgalhtawakga Lucas 5:5-10). Max Pedro xtlawanit tuku lu nitlan. Jesús akxilhli pi Pedro xpekuan, max xlakata xmakgkatsi pi nitula tlan xtlawa. Pero na xkatsi pi Pedro tlan nikxni xmakgxtakgli Dios. Wa xlakata lakgalhamalh chu wanilh: «Nialh kapekuanti». Pedro nikxni patsankgalh pi Jesús lipawa. Alistalh xla chu xtala, Andrés, nialh skitinanin litaxtukgolh xlakata tlan kstalanikgolh Mesías. Uma kaliminilh lhuwa tasikulunalin (Mar. 1:16-18).

5. ¿Tuku tasikulunalin makglhtinalh Pedro xlakata ni mastalh talakaskin namakgatlaja xtapekua chu xlakata kstalanina Jesús litaxtulh?

⁵ Xlakata Pedro kstalanina Cristo xwanit, lhuwa tuku akxilhli nema kaks malakawaninan. Akxilhli la Jesús kamapaksalh tiku xtatatlakgo, kalaktamakxtulh demonios tiku xkalaktanuma chu asta kamalakastakwanilh tiku xnikgonita (Mat. 8:14-17; Mar. 5:37, 41, 42).b Nachuna, anta xwi akxni Jehová masiyalh tatlankit nema x’ama kgalhi Jesús kxTamapakgsin. Uma lakgpalilh xlatamat (Mar. 9:1-8; 2 Ped. 1:16-18). Chuna, Pedro akxilhli tuku nikxni xlakpuwanit pi x’ama akxilha. ¡Max lu lipaxuwalh xlakata ni mastalh talakaskin xmakgatlajalh tuku nitlan xmakgkatsi! Komo nichuna xtitlawalh ni xtimakglhtinalh putum uma tasikulunalin.

6. ¿Lakapala makgatlajalh Pedro tuku nitlan xmakgkatsi chu tuku nitlan xlakpuwan?

⁶ Maski Pedro lhuwa tuku x’akxilhnit chu xkgaxmatnit, talakaskilh chuntiya naliskuja xlakata namakgatlaja tuku xlakpuwan chu tuku nitlan xmakgkatsi. Kalichuwinaw makgapitsi liʼakxilhtit. Akxni Jesús kawanilh pi xtalakaskin napatinan chu naniy xlakata xmakgantaxtilh tuku xlichuwinankanit pi x’ama la, Pedro wanilh pi nichuna x’ama akgspula (Mar. 8:31-33). Makglhuwa, Pedro chu amakgapitsi apóstoles lalima’akglhuwikgolh xlakata tiku tlakg xlakaskinka xlitaxtu (Mar. 9:33, 34). Xaʼawatiya katsisni akxni Jesús latamalh kKatiyatni, Pedro ni machokgolh xtasitsi chu chukuʼaktinilh xtakgen chatum chixku (Juan 18:10). Chu watiya uma katsisni mastalh talakaskin pi tapekua xmakgatlajalh chu makgtutu wa pi ni xlakgapasa Jesús (Mar. 14:66-72). Chu alistalh lu tasalh (Mat. 26:75).

7. Akxni Jesús xlakastakwananita, ¿tuku maxkilh talakaskin nalimasiyani Pedro?

⁷ Pedro lu xtaxlajwaninit, pero Jesús nikxni lakpuwa pi nialh x’ama tatliwakglhpara. Akxni xlakastakwananita, Jesús maxkilh talakaskin Pedro xlimasiyanilh pi lu xpaxki. Wanilh pi xkakuentajtlawalh kstalaninanin (Juan 21:15-17). Pedro xatapaxuwan makgamakglhtinalh uma taskujut. Wa xlakata anta xwi kJerusalén kPentecostés chu wa tiku na xapulana lilaksakka espíritu santo.

8. ¿Tuku lu nitlan tlawalh Pedro kʼAntioquía?

⁸ Maski Pedro xlaksakkanita, talakaskilh chuntiya naliskuja xlakata namakgatlaja tuku xlakpuwan chu tuku xmakgkatsi. Kkata 36, Pedro akxilhli chuna la Cornelio, chatum chixku tiku ni judío xwanit, makglhtinalh espíritu santo. Uma liwana limasiyalh pi «Dios ni laksakpaxkinan» chu pi latamanin xalak atanu kachikinin tlan xmakgtapakgsikgolh kcongregación xla kstalaninanin Cristo (Hech. 10:34, 44, 45). Lata uma kilhtamaku, tlawalh tuku max xapulana nikxni xlakpuwanit natlawa, tsukulh katawayan tiku ni judíos xwankgonit (Gál. 2:12). Pero makgapitsi kstalaninanin Cristo tiku judíos xwankgonit xlakpuwankgo pi judíos chu tiku ni judíos xwankgonit ni akxtum xliwayanatkan xwanit. Akxni makgapitsin tiku chuna xlakpuwankgo chankgolh k’Antioquía, Pedro nialh katawayalh natalan tiku ni judíos xwankgonit max xlakata xkapekuani natalan tiku judíos xwankgonit. Akxni apóstol Pablo akxilhli tuku nitlan xtlawama Pedro, stakyawalh kxlakatin putum natalan (Gál. 2:13, 14). Maski Pedro nitlan tuku tlawalh uma kilhtamaku, ni taxlajwanilh, chuntiya liskujli natalakgpali. ¿Tuku makgtayalh?

¿TUKU MAKGTAYALH PEDRO NATATLIWAKGLHPARA?

9. Chuna la wan Juan 6:68, 69, ¿la limasiyalh Pedro pi ni xmakgxtakgnan?

⁹ Pedro ni xmakgxtakgnan. Ni mastalh talakaskin pi wi tuku natlawa nialh naskujnani Jehová. Akgtum liʼakxilhtit, limasiyalh pi ni xmakgxtakgnan akxni Jesús kalitachuwinalh xtamakgalhtawakgen tuku ni akgatekgskgolh (kalikgalhtawakga Juan 6:68, 69). Lhuwa xtamakgalhtawakgen Jesús ni kgalhskininankgolh chu ni kgalhkgalhikgolh xkawanika tuku xkilhchanima, wata makgxtakgkgolh Jesús. Pero Pedro nichuna tlawalh. Xla wa kxlakatin amakgapitsin pi kajwatiya Jesús xkgalhi «tachuwin nema linan klatamat nema ni kgalhi xlisputni».

10. ¿La limasiyalh Jesús pi xlipawan Pedro? (Na kaʼakxilhti dibujo).

¹⁰ Jesús nikxni makgxtakglhli Pedro. Xa’awatiya katsisni akxni latamalh kKatiyatni, Jesús xkatsi pi Pedro chu amakgapitsi apóstoles x’amakgo akgxtakgmakgankgo. Maski chuna, wa pi xlipawan pi Pedro x’ama taspitpara chu nikxni x’ama makgxtakga Dios (Luc. 22:31, 32). Jesús liwana xa’akgatekgsa pi «lataman tlawaputun tuku xaʼakgstitum, pero xmakni taxlajwani» (Mar. 14:38). Wa xlakata, maski Pedro wa pi ni xlakgapasa, Jesús nikxni lakpuwa pi apóstol ni x’ama talakgpali. Akxni xlakastakwananita, Jesús tasiyanilh Pedro, max akxni xʼakstu xwi (Mar. 16:7; Luc. 24:34; 1 Cor. 15:5). Xlikana pi uma lu makgpuwantinilh apóstol natatliwakglhpara.

11. ¿Tuku tlawalh Jesús xlakata xlimasiyanilh Pedro pi Jehová x’ama kuentajtlawa?

¹¹ Jesús limasiyanilh Pedro pi Jehová x’ama kuentajtlawa. Akxni xlakastakwananita, Jesús tlawalh akgtum milagro xlakata Pedro chu amakgapitsi apóstoles xchipakgolh lhuwa skiti (Juan 21:4-6). Uma milagro limasiyanilh Pedro pi Jehová x’ama maxki putum tuku xmaklakaskin. Uma malakapastaknilh apóstol xtamalaknun Jesús akxni kawanilh pi Jehová x’ama kakuentajtlawa tiku pulana xputsakgolh xTamapakgsin (Mat. 6:33). Xlakata xkatsi uma, Pedro tlakg xlakaskinka akxilhli nalichuwinan Dios chu ni wa naskitinan. Chuna, kPentecostés kata 33 ni pekualh chu kamakgtayalh lhuwa latamanin namakgamakglhtinankgo xalaktlan tamakatsinin (Hech. 2:14, 37-41). Chu alistalh kamakgtayalh lhuwa samaritanos chu tiku ni judíos xwankgonit kstalaninanin Cristo nalitaxtukgo (Hech. 8:14-17; 10:44-48). Putum uma limasiya pi Jehová maklakaskilh Pedro xlakata nakamakgtaya lhuwa latamanin namakgtapakgsikgo kcongregación.

TUKU KINKAMASIYANIYAN

12. ¿La kinkamakgtayayan xliʼakxilhtit Pedro komo makgasata liskujmaw namakgxtakgaw tuku nitlan?

¹² Jehová na nakinkamakgtayayan ni nataxlajwaniyaw maski namin kilhtamaku nalakpuwanaw pi uma lu tuwa, liwaka komo akglhuwata kata liskujmaw xlakata namakgxtakgaw tuku nitlan. Chu max min kilhtamaku lakpuwanaw pi tuku nitlan tlawayaw tlakg nitlan nixawa tuku tlawalh Pedro. Pero Jehová tlan nakinkamaxkiyan litliwakga xlakata ni anta natamakgxtakgaw (Sal. 94:17-19). Kalilakpuwaw xliʼakxilhtit chatum tala chixku tiku xkalakgati chu xkatatalakgxtumi xtalakchixkuwin akxni nina xlakgapasa Jehová. Maski makgxtakgli putuminika uma nixatlan xtayat, xmin kilhtamaku chuntiya xkgalhi nitlan tapuwan. ¿Tuku makgtayalh ni nataxlajwani chu chuntiya naliskuja namakgatlaja uma? Xla wan: «Jehová kimaxki litliwakga. Xlakata Jehová kilimakgtayanit xʼespíritu [...], kkatsininit pi tlan chuntiya [...] naʼanaw kxatlan tiji. Jehová kimaxkinit talakaskin nakskujnani [...], chu maski makglakgalhina akit chuntiya kimatliwakglhma».

13. ¿La tlan nastalaniyaw xliʼakxilhtit Pedro? (Hechos 4:13, 29, 31; na kaʼakxilhti dibujo).

¹³ Chuna la akxilhwi, Pedro makglhuwa kapekuanilh latamanin. Pero skinilh tamakgtay Jehová chu makgatlajalh xtapekua (kalikgalhtawakga Hechos 4:13, 29, 31). Akinin na tlan namakgatlajayaw kintapekuakan. Kaʼakxilhwi tuku titaxtulh Horst, chatum kgawasa tiku xtatayana Jehová xwanit chu latamalh akxni nazis xmapakgsinamakgo kʼAlemania. Akxni xʼan kʼescuela, xtapekua makglhuwa makgatlajalh chu wa: ¡Heil, Hitler! Pero xnatlatni ni lakakilhnikgolh, wata tatlawakgolh oración chu skinikgolh Jehová pi xmaxkilh litliwakga. Xlakata xnatlatni makgtayakgolh chu xla lipawa Jehová, titaxtulh kilhtamaku, Horst nialh pekualh chu ni makgatsankgananilh Jehová. Chu alistalh wa: «Jehová nikxni kimakgxtakgli».c

14. ¿Tuku tlan natlawakgo lakgkgolotsin xlakata nakamakgpuwantinikgo tiku taxlajwanikgonit?

¹⁴ Jehová chu Jesús nikxni lakpuwankgo pi ni katitalakgpaliw. Akxni Pedro wa pi ni xlakgapasa Cristo, xlilaksakat xwanit tuku lu xlakaskinka kxlatamat. ¿Nialh kstalanina Jesús xʼama litaxtu? ¿O chuntiya xʼama stalani Jesús? Jesús xtasaskininit Jehová pi xmakgtayalh Pedro ni namakgatsankga xtakanajla. Alistalh wanilh Pedro pi xla xtlawanit oración xpalakata chu pi liwana xkatsi pi alistalh xla xʼama kamatliwakglha xnatalan (Luc. 22:31, 32). Akxni Pedro lakapastakli umakgolh xtachuwin Jesús, max lu makgpuwantinilh. Namin kilhtamaku natalakaskin nalaksakaw tuku lu xlakaskinka. Ama kilhtamaku max Jehová nakamaklakaskin lakgkgolotsin tiku xatapaxuwan nakinkamakgpuwantinikgoyan xlakata ni namakgxtakgaw (Efes. 4:8, 11). Paul, tiku kgolotsin xalak congregación litaxtu lata makgasa, lu liskuja xlakata nakamakgtaya amakgapitsin. Akxni akxilha pi chatum tala taxlajwanima, makgpuwantini nalakapastaka pi wa Jehová tiku liminit kxkachikin. Na wani pi Jehová nikxni lakpuwan pi nialhla katiskujnanilh xlakata xla paxki chu ni katimakgxtakgli. Uma kgolotsin akxilhnit pi lhuwa natalan tiku xtaxlajwanimakgo, tatliwakglhparakgonit xlakata Jehová kamakgtayanit.

15. ¿La limasiya tuku titaxtukgolh Pedro chu Horst pi tuku wan Mateo 6:33 xlikana kgantaxtu?

¹⁵ Chuna la akxilhwi, Jehová kamaxkilh Pedro chu amakgapitsi apóstoles tuku xmaklakaskinkgo. Nachuna natlawa kimpalakatakan komo pulana nawiliyaw kkilatamatkan nalichuwinanaw xalaktlan tamakatsinin (Mat. 6:33). Akxni xtitaxtunita xliʼAkgtiy Guerra xLikalanka Katiyatni, Horst, tiku lichuwinawa, lakkaxwililh precursor nalitaxtu. Pero xlakata ni xkgalhi lhuwa tumin, lu xlilakgaputsa komo tlan xkgalhilh tuku xmaklakaskin chu tlan kskujnanilh Jehová chuna la precursor. ¿Tuku tlawalh? Maxkilh talakaskin Jehová pi xlimasiyanilh pi tlan xkuentajtlawalh, chu lakkaxwililh pi nalichuwinan xtachuwin putuminika semana akxni superintendente de circuito kalakgapaxialhnalh. Akxni sputli semana, lu kaks lilakawa akxni superintendente maxkilh maktum sobre niku xtajuma tumin, pero ni xwan tiku xmalakgachanit. Uma tumin xʼama makgtaya xlakata chuntiya precursor xlitaxtulh akglhuwa papaʼ. Horst akxilhli pi uma tamaskiwin xlimasiyanima pi Jehová xʼama kuentajtlawa. Lata uma kilhtamaku, tuku tlakg xlakaskinka akxilhli kxlatamat wa nalichuwinan xTamapakgsin Dios (Mal. 3:10).

16. ¿Tuku xlakata lu tlan nakitaxtu komo nalakputsananiyaw xliʼakxilhtit Pedro chu tuku tsokgwililh?

¹⁶ ¡Pedro max lu paxuwalh xlakata Jesús ni tlawalh tuku kskinima chu ni tapanunilh! Cristo chuntiya makgtayalh Pedro xlakata ni xmakgxtakgli Dios chu tlan liʼakxilhtit xkalitaxtunilh kstalaninanin Cristo. Lhuwa tuku tlan nakatsiniyaw chuna la Jesús makgtayalh Pedro. Kmaktiy cartas nema apóstol Pedro katsokgnanilh congregaciones xalak pulana siglo lichuwinan makgapitsi. Kʼatanu artículo nalichuwinanaw makgapitsi tuku tlakg xlakaskinka kinkamasiyaniyan umakgolh tatsokgni chu la tlan nalilatamayaw la uku.