Watchtower BIBLIOTECA KʼINTERNET

¿Xlakaskinka akxilhaw latamat chuna la akxilha Dios?

«Katamakgxtakgtit kxtapaxkit Dios»
- 5, 6. ¿La limasiya xLimapakgsin Moisés pi kgalhni xasanto chu lu lanka xtapalh? (Na kaʼakxilhti recuadro «Xlakaskinka kaʼakxilhwi xlatamat animales».)
  
  ⁵ Uma akgtiy tastakyaw nema lu xlakaskinka na tsokgwilika kxLimapakgsin Moisés. Jehová wan kLevítico 17:10, 11: «Komo chatum chixku [...] nawa katuwa kgalhni nema anan, akit naklakgmakgan ama lataman, chu xlikana nakmasputu kxitat kxkachikin. Xlakata xlatamat makni wi kkgalhni, chu akit kwilinit niku mastakan tamakamastan xlakata nalilakgmaxtukan milatamatkan, xlakata wa kgalhni tuku tlan lilakgmaxtunankan xlakata kgalhi latamat» (kaʼakxilhti recuadro «Kgalhni xapa talakgalhin».)a
  
  KGALHNI XAPA TALAKGALHIN
  
  Akxni chatum israelita ni xmakgantaxti akgtum limapakgsin, wijku tuku tlan xtatlawa. Xlakata Biblia masiya pi talakaskin kgalhni xlakata naʼanan latamat, tlan xpixchukukan tantum animal chu xmakamastanikan Dios (Levítico 4:27-31). Komo nitlan xlimakgkatsi xtalakgalhin chu nialh xtlawa, tlan xtapatika o xlixapanikan xtalakgalhin ama tamakamastan pero ni xliputum kilhtamaku.
  
  Tachuwin xalak Biblia nema matitaxtikan «taxapa», kilhchanima akxni wi tuku «tawila xlakgxokgo», la akgtum «limakgalhchuwan» (kawiliw liʼakxilhtit, akgtum limakgalhchuwan nema liwana minini tuku namakgalhchuwakan). Maski chuna, ni xʼanan tantum animal nema tlan xmakgnika xlakata putum kilhtamaku xtapatika xtalakgalhin chatum lataman. Pero xlakata xmakamastakan animales kaj wi tuku xkilhchanima, alistalh xlikana xʼama tatlawa akgtum tamakamastan nema kxapalh xliputum kilhtamaku talakgalhin (Hebreos 10:1, 4).
  
  Taxapalh talakgalhin akxni «timakamastalh Jesucristo xtiyatliwa, ntu mana watiya makgtum ntlawalh» (Hebreos 10:10). Xlatamat Cristo nema ni xkgalhi talakgalhin nema xlitaxtunit «xalilakgatit xkgalhni nCristo, xtachuna ntantum aktsu kalhnilu ntu nitu pasanit, chu na ni mpala xatalakgalhin» tlan liwana kxokgo latamat nema makgatsankgalh Adán (1 Pedro 1:19). Chuna, Dios limasiyalh pi kinkapaxkiyan chu pi lu xliskgalala, chuna tamakgantaxtilh tuku kskin limapakgsin chu tlan kgalhiw «xlipan ntamalakgtaxtin» (Hebreos 9:11, 12; Juan 3:16; Apocalipsis 7:14).

¿Xlakaskinka akxilhaw latamat chuna la akxilha Dios?

«Katamakgxtakgtit kxtapaxkit Dios»
- a Revista Investigación y Ciencia wan xlakata uma tachuwin, «xlatamat makni wi kkgalhni»: «Maski ni xtlawaniputuw kuenta tuku pulana min kkintalakapastaknikan akxni kgaxmataw uma tachuwin, uma xlikana: putum células nema litatlawanit kgalhni talakaskin xlakata tlan naʼanan latamat».