¿Tiku lichuwinamakgolh xatlan tamakatsin?

«Na xapulh taliʼakgchuwinanit nawan xlikatlanka nkatuxawat.» (MATEO 24:14)

XLIKALANKA Katiyatni, xtatayananin Jehová lichuwinamakgolh xatlan tamakatsin. Chu pulaklhuwa la tlawakgo:

Katachuwinankgo latamanin. Chuna la Jesús chu xtamakgalhtawakgen, xtatayananin Jehová ankgo kalitachuwinankgo latamanin xatlan tamakatsin (Lucas 8:1; 10:1). Ni lakpuwankgo pi wa latamanin naminkgo kaputsakgo. Wata, xtatayananin Jehová tiku liwakaya akgtujun millones, ankgo lichuwinankgo akgatunu chiki, ktiji, katachuwinankgo kteléfono chu pulaklhuwa la tlawakgo xlakata nalichuwinankgo xTamapakgsin Dios. Kata nema titaxtulh liwaka mil quinientos millones horas lichuwinankgolh Dios.

Chu nikaj kalitachuwinakgolh xlakata xTamapakgsin Dios, na kamasiyanikgolh “xlipaks ntu kalimapakgsilh” Jesús (Mateo 28:20). Na kamakgalhtawakgamakgolh kxchikkan liwaka akgtsayan millones latamanin chu ni kamatajikgo.

Xtatayananin Jehová lichuwinankgo Dios xlikalanka Katiyatni, kʼ236 países. Putum latamanin katachuwinankgo xanikuta xalanin chu kaniwa: klaktsu kachikinin chu laklanka kachikinin, chu tiku wilakgolh kakiwin niku lu lakgamakgat chu niku lu kakgawiwi la kSiberia chu kdesierto xalak África chu asta klaklanka kasipijni xalak Himalaya. Nitu matajinankgo wata limaxtukgo xkilhtamakujkan chu limaklakaskinkgo tuku kgalhikgo xlakata nalichuwinankgo xatlan tamakatsin. ¿Tuku xlakata chuna tlawakgo? Xlakata paxkikgo Dios chu latamanin.

Limaklakaskinkgo likgalhtawakga. Makatunu número xla uma revista nema wanikan Makatsinina. Lichuwinan xTamapakgsin Jehová tlawamaka liwaka tipuxamatiy millones chu kʼ188 tanu tanu tachuwin. Chu revista ¡Despertad!, nema na lichuwinan xTamapakgsin Dios, natlawamaka tipuxum millones chu kʼ83 tanu tanu tachuwin.

Xlakata latamanin tlan naʼakgatekgskgo Biblia, xtatayananin Jehová tlawakgo libros, folletos, tratados, DVD, CD xaʼaudio chu MP3, kʼ540 tanu tanu tachuwin. Umakgolh akgkaw kata nema titaxtunita, tamaʼakgpitsinit liwaka 20,000 millones, tlan nawanaw pi xkalakgchalh maktutu chatunu latamanin tiku wilakgolh xlikalanka Katiyatni.

Xtatayananin Jehová na tlawakgonit chu matlawinankgonit Biblias. Biblia Traducción del Nuevo Mundo de las Santas Escrituras, nema tlawakgonit xtatayananin Jehová chu maʼakgpitsikgo, tatlawanit kʼ96 tanu tanu tachuwin, makgapitsi xamaktuminika o ni xatakgatsin. Asta la uku tamaʼakgpitsinita 166 millones.

Tamakxtumit xla kstalaninanin Cristo. Akgatunu semana, xtatayananin Jehová tamakxtumikgo xpukgalhtawakgakan. Ni kaj watiya ankgo kakninanikgo Dios, na masiyakgo la nalinaw kilatamatkan la wan Biblia. Anta mastakan tanu tanu taʼakgchuwin nema takilhtinit kBiblia chu makxtum likgalhtawakgakgo revista Makatsinina chu atanu likgalhtawakga nema na takilhtinit kBiblia. Kʼumakgolh tamakxtumit xtatayananin Jehová na kamasinikan la nakalitachuwinankgo amakgapitsi xlakata xalakwan xalaksasti tamakatsin.

Xlikalanka Katiyatni anan akgtum ciento akgtujun mil congregaciones chu watiya tuku likgalhtawakgakgo, uma tlawa pi watiya takanajla nakgalhikgo. Tlan ankgo putum tiku amputunkgo chu ni pukikan tumin. Xlikana, chuna la naʼakxilhaw komo ni xmakgantaxtikgolh tuku lichuwinankgo kanitu xlitaxtulh.

Wilikgo xaliʼakxilhtit. Xtatayananin Jehová liskujkgo xlakata nalatamakgo chuna la masiyalh Jesús chu nachuna kalikatsinikgo amakgapitsin chuna la lakaskinkgo nakalikatsinikan (Mateo 7:12). Maski kgalhikgo talakgalhin chu min kilhtamaku tlawakgo tuku nitlan, lu kamakgtayaputunkgo amakgapitsin. Wa xlakata lu liskujkgo nakalitachuwinankgo xatlan tamakatsin amakgapitsin chu putsakgo la nakamakgtayakgo.

Xtatayananin Jehová katsikgo pi ni putum xtatayananin Jehová nawankgo. Katsikgo pi nachan kilhtamaku akxni Jehová nawan pi nialh kalichuwinankgolh, chuna la wan Mateo 24:14, namin «xlikgatsputni nkatuxawat». Pero ¿tuku wamputun uma tachuwin nema wa Jesús?

[Epígrafe xla página 7]

Xtatayananin Jehová lichuwinamakgolh xatlan tamakatsin xlikalanka Katiyatni

¿Tuku uma “lisputni”?

«Akxniku nchu nachin xlikgatsputni nkatuxawat.» (MATEO 24:14)

XLIKALANKA Katiyatni talichuwinan xlisputni kakilhtamaku. Anan lhuwa películas, libros chu revistas niku kaj likgalhkgamanankgo o liwana lichuwinankgo xlakata akxni namalakgsputukan Katiyatni. Makgapitsi wankgo pi max wa namalakgsputu katiyatni chuna la talakgpalitilha kakilhtamaku, akgtum lanka guerra, tajatat, max naminacha kʼakgapun lu lanka chiwix o max extraterrestres nema naminkgoyacha alakatanu planeta.

Tiku kgalhikgo xtakanajlakan na tanu tuku wankgo. Lhuwa lakpuwankgo pi “lisputni” wa namasputu putum latamat kKatiyatni. Maktum libro wan xlakata Mateo 24:14: «Uma versículo wa tlakg xlakaskinka nema tatsokgnit kxTachuwin Dios [...;] tiku lamaw la uku max nakinkalakgchinan lanka lisputni nema lhuwa ni la kanajlayaw pi chuna nala» (El Evangelio del Reino).

Pero tiku chuna lakpuwankgo wi tuku ni katsikgo tuku lu xlakaskinka: Biblia wan pi Dios «liwana tlawalh» Katiyatni chu «ni tlawalh xlakata nitu nalilakan [wata] tlawalh xlakata anta nalatamakan» (Isaías 45:18). Wa xlakata akxni Jesús lichuwinalh lisputni, ni xwamputun pi xʼamaka malakgsputukan Katiyatni chu latamanin. Wantuku Jesús wa pi xʼamaka kamalakgsputukan tiku lixkajni likatsikgo chu ni kgalhakgaxmatkgo Dios.

Xlakata tlan naʼakgatekgsaw o namakgachakgxiya, kalichuwinaw uma. Xmalana akgtum lu xastlan chiki kamaxkinit talakaskin chalhuwa familias anta natawilakgo chu ni kamataji. Makgapitsi tlan likatsikgo tlan katalalinkgo xtalakatsu chu kuenta tlawakgo chiki. Pero amakgapitsi kaj wilikgo taʼakglhuwit. Lu katlawanikgo tuku nitlan tiku tlan likatsikgo, ni kuentajtlawakgo chiki chu ni kgalhakgaxmatkgo xmalana chiki.

¿Tuku xlitlawat uma chixku? ¿Nalaktilha xchiki? Chuna ni xlakkaxtlawalh xtaʼakglhuwit. Wantuku tlakg tlan xtlawalh wa nakatamakxtu tiku nitlan likatsikgo chu nakaxtlawapara xchik.

Jehová nachuna natlawa kKatiyatni. Anta kBiblia wan: «Xlakata tiku lixkajni likatsikgo nakamalakgsputukan, pero tiku lipawankgo Jehová wa nakamaxkikan katiyatni. Chu nialh lhuwa kilhtamaku, chu tiku lixkajni likatsi nialh katitawilalh, naputsaya niku xwi nialhtu wi nawan. Pero tiku tlan likatsikgo wa nakamaxkikan katiyatni, chu xlikana lu lipaxaw natawilakgo» (Salmo 37:9-11, NM).

Dios na malakpuwanilh apóstol Pedro natsokgwili umakgolh tachuwin: «Wa xpalakata xtachuwin Dios, wa akgapun, chuna ntilianalh akxni yama xamakgan, chu na chuna ntiyat, na wa ntiyat ntitasiyulh [...]. Na watiya litum nchuchut, limasputupa yama xlikatlanka [...] nkatuxawat» (2 Pedro 3:5, 6). Unu Pedro lichuwinalh Munkaklat akxni xlama Noé. Uma tuku lalh ni malakgsputulh Katiyatni, wata malakgsputulh tiku nitlan xlikatsikgo. Wantuku lalh kMunkaklat kaj «xaliʼakxilhtit», uma wamputun limasiya wantuku nakaʼakgspula tiku lixkajni likatsikgo (2 Pedro 2:6).

Pedro wan: «Wampi wa ntu nchu akgapun, chu ntiyat, [...] litamakinit lhkuyat». Komo kajwatiya uma nalikgalhtawakgayaw ni liwana katiʼakgatekgswi tuku wamputun. Pero uma texto liwana kinkamaʼakgtekgsniyan, xlakata wan «wa nti lakgachixkuwimakgankgolh Dios», o tiku lixkajni likatsikgo. Wa nakamalakgsputukan chu niwa Katiyatni. ¿Chu tuku nala alistalh? Pedro wan pi: «Xasasti akgapun [xTamapakgsin Dios kxmakan Jesucristo], chu xasasti tiyat [latamanin tiku tlan likatsikgo] xtachuna lantla nkinkawaninitan mpi namin ntani ntatlawa ntalulokgtat» o xaʼakgstitum (2 Pedro 3:7, 13).

Wantuku lichuwinan Biblia limasiya pi “lisputni” talakatsuwinita. Kaj kilikgalhtawakgatkan Mateo 24:3-14 chu 2 Timoteo 3:1-5 xlakata nakatsiyaw pi xlikana kgantaxtumaja.a

Chuna la akxilhti tachuwin nema wi kMateo 24:14 nituwa akgatekgskan. ¡Asta chatum aktsu kgawasa tlan akgatekgsa! Pero ¿tuku xlakata lhuwa tiku ni akgatekgskgo tuku wamputun? Xlakata Akgskgawini kamalakgatsinit xlakata ni naʼakxilhkgo xaxlikana tuku masiya Biblia (2 Corintios 4:4). Nachuna, Dios ni kamaxki talakaskin tiku tlanka kamakgkatsikan naʼakgatekgskgo xTachuwin wata kamakatsini tiku taktujukgo. Wa xlakata Jesús wa: «Kmaxkiyan paxkatkatsinit, wix Tata wanti xmalana akgapun, chu katiyatna, pi matsekgwilinikgonita xatlan mintalakapastakni wanti lhuwa kgalhikgoy xlakgasi, chu lakgskgalalan chixkuwin puwankgoy; wata wa maʼakgatakgsnikgonita wanti lhuwa nitu [...] xlakgasikan» (Mateo 11:25, Hua Xasasti Talaccaxlan, 1999). ¡Lu lanka talakgalhaman xlakata makgtapakgsiyaw tiku akgatekgskgo tuku wamputun xTamapakgsin Dios chu tatayakgo! Kimputumkan lhuwa tuku namakglhtinanaw.