1-3. 1) ¿Tuku xlakata Josué akgtum lu tlan liʼakxilhtit xlakata laksakli akgtum tlan tiji? 2) ¿Tuku kililakapastakatkan akxni wi tuku nalaksakaw natlawayaw?

NAKATSIKAN laksakkan wa tuku lu xlakaskinka. Akxni chatum wi tuku nalaksaka, tlan pulaklhuwa tuku natlawa chu xla nakatsi la nalin xlatamat. Kalakpuwaw pi chatum chixku wi niku tlawaʼama chu tiji niku an pulaktiy tapitsi. ¿Tuku tiji nalaksaka xlakata nachan niku amputun? Tuku nakitaxtu wa pi akgtum tiji tlakg namalakatsuwi niku champutuna chu atanu tlakg makgat nalinan.

² Anta kBiblia tekgsaw lhuwa liʼakxilhtit xla latamanin tiku nachuna titaxtukgolh. Caín, akgtum liʼakxilhtit, pulaktiy tuku tlan xlaksakli: tlan xtlawalh tuku nitlan kaj xlakata xtasitsi o xtimachokgolh xtasitsi (Gén. 4:6, 7). Chu Josué xʼama laksaka komo kskujnanilh xaxlikana Dios o xkakninanilh ni xaxlikana dioses (Jos. 24:15). Xlakata Josué ni xtamakgatliniputun Jehová, laksakli tlan tiji. Chu Caín ni wa tuku xtlawaputun chu tlawalh tuku mamakgatlinilh Dios.

³ Max wi tuku natitaxtuyaw niku pulaktiy tuku nalaksakaw natlawayaw. Ama kilhtamaku, kalakapastakti «niku chipimputuna», o tuku tlawaputuna: namalankiya Jehová putum tuku tlawaya chu ni natlawaya tuku natlawa pi makgat natawilaniya Dios (kalikgalhtawakga Hebreos 3:12). Kʼuma artículo chu nema aku mima naʼakxilhaw pulaktujun tuku ni natlawayaw xlakata ni natamakgatliniyaw Jehová.

TASKUJUT

4. ¿Tuku xlakata taskujut lu xlakaskinka klatamat?

⁴ Kstalaninanin Cristo talakaskin naputsakgo tuku maklakaskinkgo chu tuku maklakaskin xfamilia. Biblia wan pi tiku ni chuna tlawa tlakg nitlan likatsi nixawa tiku ni kgalhi takanajla (2 Tes. 3:10; 1 Tim. 5:8, nota). Liwana tasiya pi taskujut lu xlakaskinka klatamat, pero komo ni kuenta natlawayaw, natamakgatliniyaw Jehová. ¿La tlan chuna la?

5. ¿Tuku lu xlakaskinka kilikuentajtlawatkan akxni namakglhtinanaw akgtum taskujut?

⁵ Kalakpuwanti pi wix putsapat taskujut. Komo lapat niku lu tuwa tekgskan taskujut, max namakglhtinamputuna xapulana taskujut nema natekgsa, maski kaj katuwa tuku naliskuja. Pero ¿komo uma taskujut lakatsala tuku wan Biblia? ¿Chu komo lhuwa kilhtamaku o lhuwa taxtuya xlakata mintaskujut chu nialhla nalichuwinana Dios o tlawa natamakgatliniya mifamilia? Maski chuna, ¿namaklhtinana uma taskujut, xlakata nalakpuwana, tlakg tlan nakgalhiya uma taskujut nixawa nitu nakgalhiya? Kalakpuwanti pi komo nitlan nalaksaka natamakgatliniya Jehová (Heb. 2:1). Komo naputsaya taskujut o lakpuwampat nalakgpaliya mintaskujut, ¿tuku namakgtayayan tlan nalaksaka?

6, 7. 1) ¿Tuku tlan xlakapastakka xlakata taskujut? 2) ¿Tuku natlawa pi tlan natalakatsuwiniya Jehová chu tuku xlakata?

⁶ Chuna la lichuwinawa, talakaskin liwana nalakpuwanaw tuku natlawayaw kkilatamatkan. Kakgalhskinka: «¿Tuku klakaskin nakimatlawi kintaskujut?». Komo wix naliʼakxilha mintaskujut xlakata wi tuku kgalhiputuna, nakgalhiya tuku maklakaskina chu tuku maklakaskin mi familia xlakata naskujnaniya Jehová, xla nasikulunatlawa tuku natlawaya (Mat. 6:33). KinTlatkan xalak akgapun putum kilhtamaku skgalalh wi xlakata nakinkamakgtayayan akxni makgatsankgayaw kintaskujutkan o ni kgalhiyaw tumin (Is. 59:1). Biblia wan pi Jehová «malakgtaxtikgoy [...] nti maxkikgoy nkakni» (2 Ped. 2:9).

⁷ Pero ¿komo kaj lhuwa tumin tlajaputuna? Max tlan natlajaya. Pero kalakapastakti pi alistalh uma tapalaxla kitaxtu chu nila naxokgoya (kalikgalhtawakga 1 Timoteo 6:9, 10). Komo lu xlakaskinka akxilha taskujut chu tumin, kaj natamakgatliniyaw Jehová.

8, 9. ¿Tuku kuenta xlitlawatkan xanatlatni xlakata la akxilhkgo xtaskujutkan? Kawanti tuku xlakata.

⁸ Komo wix tlat, kalakpuwanti tuku liʼakxilhtit kawilinipat minkamanan. ¿Tuku akxilhkgo minkamanan pi tlakg xlakaskinka akxilha, mintaskujut o tlan natalalipina Jehová? Komo xlakan akxilhkgo pi tlakg xlakaskinka akxilha lhuwa nalakgapaskgoyan o tumin wa tuku pulana wiliya kmilatamat, ¿max na natiyakgo nitlan tiji nema wix tiya? ¿Max ni namaxkikgoyan kakni nema mininiyan xlakata wix xatlat? Kaʼakxilhti tuku wa chatum tsumat tiku kstalanina Cristo: «Tuku akit klakapastaka wa pi kintlat putum kilhtamaku skuja. Pulana xtasiya pi lhuwa kskuja xlakata nitu xkinkatsankganin. Pero xaʼawatiya kata, wi tuku talakgpalinit. Lhuwa skuja, ni kaj xlakata natamawa tuku kmaklakaskinaw na skuja xlakata natamawa tuku lu laktapalaxla kchiki. Wa xlakata kinkalakgapaskanan la familia tiku kgalhi lhuwa tumin, chu ni kinkalakgapaskanan la familia nema kamakgtaya amakgapitsi wi tuku nalakgatayakgo kxtaskujut Dios. Tlakg xaklakgatilh pi kintlat xkinkamakgtayan xlakata takanajla nixawa xtumin».

⁹ Natlatni, ni katamakgatlinitit Jehová kaj xlakata lhuwa kilhtamaku naskujatit. Kakalimasiyanitit minkamanan pi kanajlayatit pi tuku tlakg xlakaskinka wa naskujniya Dios chu ni tumin (Mat. 5:3).

10. Kamanan, ¿tuku liwana milikatsitkan akxni wi tuku nalaksakkatit natlawayatit kmilatamatkan?

¹⁰ Komo lankata wix chu lakpuwampat tuku natlawaya kmilatamat, ¿la tlan nalaksaka tuku tlakg tlan? Chuna la akxilhnitaw, talakaskin liwana nakatsiyaw tuku tlawaputunaw. Max wi tuku liskujputuna. Pero ¿la xlilhuwa nakgalhtawakgaya chu taskujut nema kgalhiputuna? ¿Namakgtayayan tlakg natalakatsuwiniya Jehová o natamakgatliniya? (2 Tim. 4:10.) ¿Likatsiputuna la tiku kaj lipaxuwakgo xlakata tumin nema kgalhikgo kbanco o xlakata la wilakgolh xnegocios? ¿O nalipawana Dios chuna la David? Xla wa: «Pues kakgaxpattit: akit makgasa klatamanit y chi kkgolunita; pero nak wakg kilatamat nikxni kakxilhnit akgxtakgwilinit Dios chatum ti tanks lamaj, nipara ixkamanan kkakxilhnit para taskiwayan» (Sal. 37:25). Kalakapastakti pi akgtum tiji natlawa pi natamakgatliniya Jehová chu atanu natlawa pi tlakg nalipaxuwa latamat (kalikgalhtawakga Proverbios 10:22 chu Malaquías 3:10). ¿Tukuya tiji nalaksaka?a

TUKU LIPAXUWAKAN

11. ¿Tuku wan Biblia xlakata tuku lipaxuwaputunaw pero tuku talakaskin kuenta natlawayaw?

¹¹ Biblia ni tlawa pi kaj nalakgachaniyaw chu ni wan pi akxni wi tuku lipaxuwayaw kaj limakgatsankgayaw kilhtamaku. Apóstol Pablo tsokgnanilh Timoteo «nalitatliwakglha mputuminika xmakni, kgalhiy xlakgasi» (1 Tim. 4:8). Nachuna Biblia wan pi anan «kilhtamaku akxni litsinkan» chu «kilhtamaku akxni natachayawakan», chu wan pi najaxa chuna la natalakaskin (Ecl. 3:4; 4:6). Pero komo ni kuenta natlawayaw uma tuku nalipaxuwayaw max natlawa natamakgatliniyaw Jehová. Xlakata nichuna nakinkaʼakgspulayan, pulaktiy tuku kuenta kilitlawatkan: tuku laksakaw nalipaxuwayaw chu la xlilhuwa kilhtamaku nalimaxtuyaw.

12. ¿Tuku kililakapastakatkan akxni nalaksakaw tuku nalipaxuwayaw?

¹² Pulana kalichuwinaw tuku nalipaxuwayaw. Xlikana pi tlan natekgsaw tuku xatlan nalipaxuwayaw. Pero kilikatsitkan pi lhuwa talakgastan nema anan la uku Dios xkajni, latlawanikan tuku nitlan, taskuwan o talakgxtumit nema ni xlitatlawat. Wa xlakata liwana kalaksakwi tuku nalipaxuwayaw. Kakinkakgalhskinkan: «¿Tuku kimatlawi kkilatamat? ¿Tlawa pi nitlan naklikatsi, tlawa pi lu nakkatlajaputun amakgapitsin pi lipekua napaxki kinkachikin?» (Prov. 3:31). «¿Tlawa pi lhuwa tumin naklaktlawa? ¿Natlawa pi nitlan nalimakgkatsikgo amakgapitsin?» (Rom. 14:21.) «¿Tiku latamanin tlawa pi nakkatalalin?» (Prov. 13:20.) «¿Tlawa pi naktlawaputun tuku nitlan?» (Sant. 1:14, 15.)

13, 14. ¿Tuku kililakapastakatkan xlakata kilhtamaku nema limaxtuyaw xlakata tuku lilakgastananaw?

¹³ Chu kalichuwinaw xlipulaktiy: kilhtamaku. ¿Limaxtuyaw lhuwa kilhtamaku xlakata nalilakgastananaw chu nialh lhuwa kilhtamaku kgalhiyaw xlakata tuku xaʼespiritual, la akxni lichuwinanaw Dios o tamakxtumit? Komo chuna, kilhtamaku nema limaxtuyaw nalipaxuwayaw ni tlan katilimakgkatsiw. Xlikana tiku ni lu lhuwa kilhtamaku limaxtukgo tlakg lipaxuwakgo. ¿Tuku xlakata? Xlakata katsikgo pi tlawakgonita «tuku tlakg xlakaskinka» wa xlakata nitu li makgkatsikgo akxni paxuwakgo (kalikgalhtawakga Filipenses 1:10, 11).

¹⁴ Xlikana pi max lhuwa kilhtamaku wi tuku nalipaxuwaputunaw, pero uma max natlawa pi natamakgatliniyaw Jehová. Chatum tala tiku kgalhi 20 kata nema wanikan Kim wa tuku titaxtulh. Xla wan: «Akgatunu semana xakan kpaskua: viernes, sábado chu domingo. Pero la uku kkatsi pi wi tuku tlakg xlakaskinka. Akgtum liʼakxilhtit, xlakata uku precursora ktaki makgchaxan hora tsisa xlakata nakan lichuwinan Dios, wa xlakata nila kan kpaskua chu naktaspita makgtum hora o makgtiy hora tsisa. Xlikana pi ni putum paskua ni tlan, pero lhuwa kilhtamaku limakgatsankgayaw. Chuna la putum tuku tlawayaw talakaskin ni namalakatsaliyaw».

15. ¿La tlan xanatlatni nakamakgtayakgo xkamanan xlakata nalipaxuwakgo tuku tlan?

¹⁵ Xanatlatni talakaskin nakgalhikgo tuku lakaskinkgo chu tuku maklakaskinkgo xkamanan chu nachuna xlakata xtakanajlakan chu xtalakapastaknikan. Uma na kilhchanima pi nalakkaxwili tuku nalipaxuwakgo. Wa xlakata komo wix tlat, kamasta talakaskin napaxuwakgo, maski kuenta militlawat xlakata ni natalalinkgo tiku tlan xkatlawanilh tuku nitlan, ni kalakpuwanti pi putum talakgastan nitlan (1 Cor. 5:6). Komo liwana nalakkaxwiliya natekgsa tuku tlan nalipaxuwakgo mifamilia.b Chuna, wix chu mi familia nalilatapayatit tiji nema tlakg nakamalakatsuwiyan Jehová.

MI FAMILIA

16, 17. ¿Tuku talakgaputsit titaxtumakgo lhuwa natlatni, chu la likatsiyaw pi Jehová katsi tuku tamakgkatsi?

¹⁶ Lu tliwakga la latalalinkgo natlatni chu kamanan wa xlakata Jehová limaklakaskinit xlakata nalimasiya la kapaxki xkachikin (Is. 49:15). Wa xlakata akxni chatum xla kifamiliajkan makxtakga Jehová, nitlan limakgkatsiyaw. Chatum tala tiku xtsumat tamakxtuka kcongregación wa: «Lu nitlan xaklimakgkatsi. Akstu xkinkgalhskinkan tuku xlakata kintsumat makgxtakgli Jehová. Putum kilhtamaku xaklakpuwan pi kinkuenta xwanit».

¹⁷ Komo nachuna titaxtupat, Jehová katsi tuku lipatinampat. Xla na «katsanilh xnaku» akxni xapulana xkgawasa chu lhuwa latamanin tiku latamakgolh akxni nina xmin munkaklat makgxtakgkgolh (Gén. 6:5, 6). Tiku ni titaxtukgonit uma, max ni katsikgo la nitlan tamakgkatsi. Pero nitlan xwa, komo xmakgxtakgwi Jehová kaj xlakata chatum xalak kifamiliajkan makgxtakgnit. ¿Tuku namakgtayayan natayaniya uma tasipanit?

18. Komo chatum kgawasa makgxtakga Jehová, ¿tuku xlakata natlatni ni nawankgo pi xkuenta?

¹⁸ Ni kawanti pi minkuenta xlakata tuku lalh. Jehová kinkamaxkiyan talakaskin nalaksakaw komo skujniputunaw, chu chatunu chatunu tiku tamakamastaninit chu tamununit xla familia nalin «wantu [...] [x]takukakan» (Gál. 6:5). Tuku xaxlikana, wa pi Jehová naskini kuenta tiku lakgalhinanit chu ni wix (Ezeq. 18:20). Na ni kakalimawaka amakgapitsin. Wata kamaxki kakni tuku Jehová limaklakaskin xlakata nakastakyawa xlakskujni. Ni katataya Akgskgawini chu katataya tiku kuenta tlawakgo congregación (1 Ped. 5:8, 9).

19, 20. 1) ¿La tlan tayanikgo natlatni tiku kamakxtukanit kcongregación xkamanankan? 2) ¿Tuku tlan nakgalhkgalhikgo natlatni?

¹⁹ Chu atanu, komo wix nasitsiniya Jehová, laksakpat tiji nema natlawa natamakgatliniya. Tuku minkgawasa maklakaskin wa naʼakxilha pi xnatlatni tatayakgo Dios chu xapulana wilikgo nixawa xfamiliaskan. Chu xlakata natayaniya tuku titaxtupat, kuenta katlawa mintakanajla chu ni katamakgatlini natalan xalak congregación (Prov. 18:1). Kawani Jehová tuku makgkatsiya (Sal. 62:7, 8). Ni kalakputsa la natachuwinana tiku makgxtakgnit Jehová, akgtum liʼakxilhtit ni nalimaklakaskina correo electrónico, teléfono o mensajes (1 Cor. 5:11). Lu xlakaskinka kaʼakxilhti tuku xaʼespiritual (1 Cor. 15:58). Tala tiku pulana lichuwinaw wa: «Kkatsi pi talakaskin lu lhuwa nakskujnani Dios chu nakmatliwakglha kintakanajla. Chuna akxni kintsumat nataspitpara xkachikin Jehová, nakkgalhi litliwakga xlakata nakmakgtaya».

²⁰ Biblia wa pi tapaxkit putum tayani (1 Cor. 13:4, 7). Wa xlakata tlan kgalhkgalhiya pi akgtum kilhtamaku minkgawasa nalakgtaspitpara Jehová. Akgatunu kata lhuwa latamanin makgxtakgkgo nixatlan tayat chu taspitparakgo xkachikin Dios. Jehová ni putum kilhtamaku sitsi, wata “makgatsankgenan” o tapatinan (Sal. 86:5).

LIWANA KALAKSAKTI TUKU NATLAWAYA

21, 22. ¿La nalimaklakaskina tuku Dios maxkinitan talakaskin nalaksaka?

²¹ Jehová kiMalakatsukinakan kinkamaxkinitan talakaskin nalaksakaw tuku natlawayaw (kalikgalhtawakga Deuteronomio 30:19, 20). Pero uma tlawa tuwa tuku nalakgatayayaw. Putum kstalaninanin Cristo nakinkakgalhskinkan: «¿Tuku tiji ktiyama? ¿Kmakgxtakgnit pi taskujut, lilakgastan o familia natlawakgo naktamakgatlini Jehová?».

²² Tapaxkit nema kinkakgalhiniyan kinTlatikan xalak akgapun nikxni sputa. Komo natamakgatliniyaw wa xlakata laksaknitaw nixatlan tiji (Rom. 8:38, 39). Pero ni talakaskin chuna nakinkaʼakgspulayan. Ni kamasta talakaskin wi tuku natlawa natamakgatliniya Jehová. Kʼatanu artículo naʼakxilhaw pulaktati tayat niku tlan nalimasiyayaw pi lakatsu tawilaniputunaw Jehová.

1, 2. 1) ¿Tukuya akgsiyat lakaskin Satanás nakanajlayaw? 2) ¿Tuku nakinkamakgtayayan natalakatsuwiniyaw Dios?

JEHOVÁ kinkatlawan chuna la xtalakatsuwiniputuw. Pero Satanás lakaskin pi akinin nalakpuwanaw: pi ni maklakaskinaw Dios. Chu malakgatuminit uma taʼakgsanin lata kilhtamaku akxni akgskgawilh Eva kjardín xla Edén (Gén. 3:4-6). Chu chuna la titaxtunit kilhtamaku, tlawanit pi atsinu ni putum latamanin nakanajlakgo uma taʼakgsanin.

² Lu paxuwayaw, akinin ni kanajlayaw xtaʼakgsanin Satanás xlakata «katsiyaw xtakgskgawimin», uma kilhchanima xliʼakgsiyat (2 Cor. 2:11). Xla lakaskin pi natiyayaw akgtum tiji nema natlawa pi natamakgatliniyaw Jehová. Pero chuna la katsiw kʼartículo nema titaxtulh, tlan nalaksakaw tuku tlan xlakata taskujut, tuku nalipaxuwayaw chu familia. Kʼuma artículo nalichuwinanaw pi komo ni lu xlakaskinka naʼakxilhaw tecnología, kuenta natlawayaw kimaknikan, tumin chu ni lanka nakinkamakgkatsikanan tlan natalakatsuwiniyaw Dios (Sant. 4:8).

TECNOLOGÍA

3. Kawili akgtum liʼakxilhtit nema litasiya pi tecnología pulaktiy litamaklakaskin tuku tlan chu tuku nitlan.

³ Lhuwa aparatos electrónicos nema aku taxtumakgo tlan kgalhikgo putum latamanin. Komo liwana kamaklakaskinkan lu makgtayanankgo, pero komo ni chuna, tlawakgo pi natamakgatliniyaw Jehová. Akgtum liʼakxilhtit. Revista nema uku kgalhtawakgapat litsokgka chu imprimirlika kcomputadoras. Uma aparatos tlan kamaklakaskinkan ktaskujut, na tlan nakatachuwinana amakgapitsin chu na tlan nalipaxuwayaw. Pero komo ni kuenta natlawayaw max lu lhuwa nakgalhiputunaw uma aparatos. Xalakgskgalalan stananin tlawakgo pi latamanin xlitamawatkan aparatos nema aku taxtumakgo. Chatum kgawasa lu xlakaskin akgtum tableta electrónica xlakata xkilh tsekg stalh xpastapu. ¡Lu xatonto!

4. ¿Tuku tlawalh chatum kstalanina Cristo xlakata namakgxtakga la xlilhuwa xlimaklakaskin xcomputadora?

⁴ Chu tlakg nitlan kitaxtu nalakgmakganaw la talalinaw Jehová kaj xlakata lhuwa maklakaskinaw tecnología. Juan,a chatum kgawasa tiku max kgalhi 30 kata, uma tuku wa: «Kkatsi pi Biblia kinkastakyawayan pi natamawayaw kilhtamaku xlakata tuku xaʼespiritual, pero akxni klimaklakaskin computadora nila kiʼakstu kimachokgokan». Atsinu ni putum kilhtamaku Juan xlimaklakaskin Internet asta makgat tsisni. Xla wan: «Akxni tlakg xaktlakgwanit nila xakmakgaxtakga naktachuwinan kiʼamigos o nakaʼakxilha videos nema ni lu lakwan». Xlakata xmakgaxtakgali uma nixatlan tayat, tlawa pi namixa xcomputadora akxni xlilhtatata (kalikgalhtawakga Efesios 5:15, 16).

5, 6. 1) ¿Tuku lakgayakgo natlatni? 2) ¿Tuku tlan natlawayaw xlakata kinkamanankan natalalinkgo tiku tlan xtayat?

⁵ Natlatni, maski wixin ni putum minkuenta tuku tlawakgo minkamanankan, milikatsitkan la limaklakaskinkgo computadora. Ni kamasta talakaskin naʼakxilhkgo talakgxtumit xalimaxana, takgaman niku lachipakan, taskuwan chu natalalinkgo tiku ni xlilat kʼInternet kaj xlakata ni namakglhuwikgoyan. Max nalakapastakkgo: «Komo kinatlatni ni kuenta tlawakgo tuku akit ktlawa, max tlan tuku ktlawama». Wixin milikuentajtlawatkan pi nitu natlawa pi minkamanan natamakgatlinikgo Jehová, maski laklankata. Kalakpuwanti tuku tlawa tantum osa xlakata nakuentajtlawa xlakgskgatan. ¡Chu asta animales kuenta tlawakgo nitu nakalani xlakgskgatankan! (Katamalakxtupi Oseas 13:8.)

⁶ Kakamakgtayakgotit minkamanankan natalalinkgo kstalaninanin Cristo tiku tlan liʼakxilhtit, tiku kaman chu tiku laklankata. Chu kalakapastaktit: minkamankan lakaskinkgo pi wixin nalimaxtuyatit kilhtamaku xlakata akxtum natawilayatit, natalalipinatit, nalitsinatit, nakgamananatit, naskujatit chu akxtum natalakatsuwiniyatit Jehová.b

KUENTA NATLAWAYAW KIMAKNIKAN

7. ¿Tuku xlakata ni tatatlaputunaw?

⁷ «¿La makgkatsiya?» Uma takgalhskinin nema lhuwa tlawakan wi tuku masiya. Xlakata xapulana kinatlatnikan mastakgolh talakaskin pi Satanás xtlawalh natamakgatlinikgo Jehová, kimputumkan tatatlayaw. Akgskgawini lipaxuwa kintapatinkan pues uma tlawa pi tuwa namakgkatsiyaw naskujniyaw Dios. Chu komo niyaw, nila naskujniyaw (Sal. 115:17). Wa xlakata, tlawayaw tuku talakaskin xlakata ni natatatlayaw chu lakaskinaw pi kinatalankan na ni natatatlakgo.c

8, 9. 1) ¿Tuku tlan natlawayaw xlakata ni lu namalakatsaliyaw xlakata la kuenta tlawayaw kilatamatkan? 2) ¿La kinkamakgtayayan akxni paxuwayaw?

⁸ Pero talakaskin ni namalakatsaliyaw la akxilhaw. Wi tiku lhuwa liskujkgo xlakata natlawakgo akgtum dieta, natamawakgo tuku talakaskin xlakata tlan natasiyakgo chu alistalh wilikgo nalichuwinankgo xTamapakgsin Dios. Max lakpuwankgo pi chuna makgtayakgo amakgapitsin, pero tuku xaxlikana wa pi nitlan nalichuwinanaw akgtum likuchun chu akgtum tratamiento xlakata akgtum tajatat o xlakata tlan natasiyayaw akxni nina tsuku o akxni kgalhsputnita tamakxtumit kPukgalhtawakga xla xTatayananin Jehová o salón xla asambleas. ¿Tuku xlakata?

⁹ Anaw ktamakxtumit xlakata nalichuwinanaw takanajla, tlakg napaxuwayaw, chu uma masta xtawakat espíritu santo (Gál. 5:22). Akxni kawaniyaw amakgapitsin xlakata la nakuentajtlawakgo xlatamatkan akxni wilaw ktamakxtumit, maski nakinkaskinikan o ni, tlawa pi nialh xlakaskinka naʼakxilhaw tuku xla takanajla chu max natlawa pi nialh lu napaxuwakgo makgapitsin natalan (Rom. 14:17). Chatunu chatunu xlilaksakat tuku nalikuentajtlawa xlatamat xlakata ni lu natatatla chu niti kgalhi likuchun xlakata namasputu putum tajatat. Asta tlakg xatlan makuchinanin tatatlakgo, kgolonkgo chu nikgo. Nachuna maski lhuwa nalilakgaputsayaw kilatamatkan uma ni natlawa pi tlakg nalatamayaw (Luc. 12:25). Pero «akgtum tlan naku tlawa tlan nalimakgkatsikan» (Prov. 17:22).

10. 1) ¿Tuku tlawa pi chatum lataman stlan naʼakxilha Jehová? 2) ¿Tukuya kilhtamaku nialh natatatlayaw?

¹⁰ Nachuna ni wamputun pi nitlan nakuentajtlawayaw la tasiyayaw. Pero ni talakaskin namatsekgaw tuku litasiya pi kgolomawa, wata uma litasiya pi staknitawa, nakinkamaxkikanan kakni chu pi liwana lakapastakaw. Akgtum liʼakxilhtit, Biblia wan pi «aktsasat tlan tasiya akxni latapulikanit xaʼakgstitum tiji» (Prov. 16:31). Jehová tlakg xlakaskinka akxilha tuku la likatsiyaw chu akinin nachuna kililakapastakatkan (kalikgalhtawakga 1 Pedro 3:3, 4). ¿Pi tlan nakinkatlawanikanan nakinkachukukanan chu tuku max kalipekua nawili kilatamatkan kaj xlakata stlan natasiyayaw? Maski linawa kata o la tasiyayaw, «xtapaxuwan Jehová» wa tuku xlikana stlan kinkatlawayan (Neh. 8:10). Kajwatiya kxasasti kakilhtamaku ni natatatlayaw chu ni kgolonaw (Job 33:25; Is. 33:24). Ama kilhtamaku, liskgalala chu takanajla nakinkamakgtayayan ni natamakgatliniyaw Jehová akxni natlawayaw putum tuku namatlaniyaw (1 Tim. 4:8).

TUMIN

11. ¿Tuku xlakata wanaw pi tumin akgtum akgsiyat?

¹¹ Nila wanaw pi tumin nitlan, xtachuna la nila wanaw pi nitlan nakgalhikan akgtum tlan taskujut xlakata natlajakan tumin (Ecl. 7:12; Luc. 19:12, 13). Pero «nalakgpaxkiya ntumin» tlawa pi natamakgatliniya Jehová (1 Tim. 6:9, 10). «Litakgatsankgakgoy katuwa wantu kaj xala katuxawat», uma wamputun, pi lu lilipuwankan nakgalhikan tuku maklakaskinkan xlakata latamat, chu uma tlawa nialh nalakapastakaw tuku xaʼespiritual. Nachuna la «nakgalhikgoy lhuwa tumin» o nalakpuwankan pi uma tlawa putum kilhtamaku nalipaxuwakan (Mat. 13:22). Jesús masiyalh pi niti tlan naskujni Dios chu lhuwa tuku nakgalhiputun (Mat. 6:24).

12. ¿Tukuya akgsiyat xlakata natlajakan tumin wilakgo la uku, chu la ni namakgtanuyaw?

¹² Akxni nitlan lakpuwanaw xlakata tumin tlawa pi nakgalhiyaw taʼakglhuwit (Prov. 28:20). Xlakata tlajaputunkan lhuwa tumin chu lakapala, tlawanit pi natamawakan billetes xla lotería o natlawakan negocios niku limaklakaskinkan lhuwa tumin o tlawakan negocios niku litlajakan tumin xlakata atanu, chu lhuwa tlawakgonit pi natalan xalak congregación namakgtanukgo. Chu atanu makgtanukgo klaklanka negocios xlakata kanajlakgo pi natlajakgo lhuwa tumin. Ni kamasta talakaskin pi tuku kgalhiputuna natlawa namakgatsankgaya tuku kgalhiya. Liwana kalakpuwanti: komo akgtum negocio lu tlan tasiya max nixlikana.

13. Xlakata tumin, ¿tuku tlawa pi ni akxtum tuku lakpuwan Dios chu tuku lakpuwankan kkakilhtamaku?

¹³ Komo pulana nawiliyaw «xTamapakgsin Dios, chu xtalakaskin» xla nasikulunatlawa tuku natlawayaw xlakata nakgalhiyaw tuku maklakaskinaw (Mat. 6:33; Efes. 4:28). Pero, Jehová ni lakaskin pi chuntiya nalakapastakaw tumin o tlakgwanitaw nawan akxni naʼanaw tamakxtumit kaj xlakata lhuwa skujnitaw. Kkakilhtamaku lhuwa latamanin lakpuwankgo pi kaj tlan napaxuwayaw kilhtamaku nema aku mima komo liskujaw xlakata lhuwa tumin nakgalhiyaw. Asta tlawakgo pi xkamanankan nalakpuwankgo la tlan natlajakgo tumin. Pero Jesús masiyalh pi uma talakapastakni nitlan (kalikgalhtawakga Lucas 12:15-21). Ni kalitaxtuw la Guehazí, tiku lakpuwa pi tlan lhuwa xkgalhi putum tuku xlakaskin chu chuntiya tlan xtalalilh Jehová (2 Rey. 5:20-27).

14, 15. ¿Tuku xlakata ni nalipawanaw tumin? Kalichuwinanti akgtum liʼakxilhtit.

¹⁴ Makgapitsi águilas muxtukgolh xlakata ni makgxtakgputunkgolh tantum lanka chu tsinka skiti nema xchipakgonit. ¿Na tlan chuna xakgspulalh chatum kstalanina Cristo? Alex chatum kgolotsin xalak congregación wan: «Ni lu klaktlawa tumin. Akxni lhuwa taxtu champú, kmujupara nema xʼakgataxtu xputajun». Pero Alex makgtanulh negocio niku makgatsankgalh lhuwa xtumin. Tanulh mercado xla valores xlakata xlakpuwan pi kaj ni makgas kilhtamaku nialh xʼama skuja chu tlan precursor xʼwa. Tlakg makgtanulh chu tlakg xlikgalhtawakga xlakata negocios. Xlakata tumin nema xmakinit chu tumin nema masakuanikgolh tiku skujkgo kbolsa xla valores tamawalh acciones, nema analistas wanikgolh pi alistalh xʼama taliwaka xtapalh. Pero nichuna lalh wata tlakg taktalh. Alex lakapastaka: «Akit xakkgalhiputumpara kintumin. Xaklakpuwan pi komo xakkgalhkgalhilh, acciones xʼama taliwakapara».

¹⁵ Alex lhuwa papaʼ kajwatiya uma xlakpuwan. Nialhla xlakapastaka tuku xaʼespiritual chu asta nila xaklhtata. Pero acciones nikxni taliwakakgolh. Xlakata uma makgatsankgalh putum xtumin chu stalh xchik. Xla wan: «Ktlawanilh tuku nitlan kifamilia». Pero katsinilh tuku lu xlakaskinka: «La uku kkatsi pi tiku lipawan tuku malaknu xkakilhtamaku Satanás nitlan kitaxtuni» (Prov. 11:28). Xlikana nalipawanaw kintuminkan, negocios o tuku tlan tlawayaw xlakata natlajayaw tumin kitaxtu xtachuna nalipawanaw Satanás, «xmalana katuxawat» (2 Cor. 4:4; 1 Tim. 6:17). La uku, Alex nialh lhuwa tuku putsa kxlatamat xlakata «xatlan tamakatsinin». La uku xla chu xfamilia tlakg paxuwakgo chu tlakg tlan natalalinkgo Jehová (kalikgalhtawakga Marcos 10:29, 30).

LANKA NAMAKGKATSIKANA

16. ¿Tuku tlawa pi nitlan nawan lanka namakgkatsikana?

¹⁶ Min kilhtamaku tlan kitaxtu wi tuku tlanka kinkalimakgkatsikanan. Akgtum liʼakxilhtit, tlan limakgkatsiyaw xlakata akinin xtatayananin Jehová (Jer. 9:24). Akxni ni malakatsalayaw la kinkaʼakxilhkan kinkamakgtayayan liwana nalaksakaw tuku natlawayaw chu ni tlawayaw tuku ni tlan. Pero akxni tlakg xlakaskinka akxilhaw tuku lakpuwanaw o taskujut xalak kinchikkan tlawa natamakgatliniyaw Jehová (Sal. 138:6; Rom. 12:3).

17, 18. 1) Kalichuwinanti makgapitsi latamanin tiku lichuwinan Biblia nema kalilakgapaska xlakata ni tlankajwa xlikatsikgo. 2) Xlakata lanka xmakgkatsikan, ¿tuku tlawalh chatum tala xlakata ni xtamakgatlinilh Jehová?

¹⁷ Anta kBiblia tekgsaw lhuwa liʼakxilhtit xla latamanin tiku taktujukgo chu tiku tlankajwa. Jehová sikulunatlawalh mapakgsina David xlakata putsalh napulalin Dios (Sal. 131:1-3). Pero kamalakgaxokgelh tiku lanka xkamakgkatsikan chuna la mapakgsina Nabucodonosor chu Belsasar (Dan. 4:30-37; 5:22-30). La uku na titaxtuyaw tuku liʼakxilhkan komo taktujuyaw. Raúl chatum siervo ministerial tiku kgalhi 32 kata, alh alakatanu congregación xla lakapastaka: «Xaklakpuwan pi tunkun kgolotsin xʼamaka kintlawakan, pero titaxtulh akgtum kata chu nitu lalh». ¿Xʼama lisitsi Raúl, chu xʼama lakpuwan pi lakgkgolotsin xalak congregación nitlan xlikatsinikgo? ¿Nialh xʼama an tamakxtumit chu xʼama masta talakaskin pi uma xtlawalh natamakgatlini Jehová? ¿Tuku xtitlawa wix?

¹⁸ Raúl kinkawaniyan: «Klikgalhtawakgalh putum tuku ktekgsli kkilikgalhtawakgakan xlakata “tuku kgalhkgalhimaw” nema lichuwinan Proverbios 13:12. Kkatsilh pi xtalakaskin tlakg xakkatsilh kgalhkgalhinan chu ni lanka xkimakgkatsika. Kilimastat xwanit pi Jehová xpulalilh kilatamat». Raúl nialh putsalh tuku xla xlakaskin wata tsukulh kamakgtaya amakgapitsin kcongregación chu akxni xlichuwinan Dios. Ni lhuwa kilhtamaku alistalh lhuwa tiku xkamakgalhtawakgema nema lakapala xkatsinimakgo xlakata Dios. Xla wan: «Akgtum kata aitat alistalh kiliyawaka kgolotsin, nila xakkanajla. Lu xaklipaxuwa la xaklichuwinan Dios, chu nialh xaklakapasta tuku xaklakgatayaputun» (kalikgalhtawakga Salmo 37:3, 4).

LAKATSU KATAWILANI JEHOVÁ

19, 20. 1) ¿Tuku natlawayaw xlakata tuku tlan tasiya kkakilhtamaku ni natlawa natamakgatliniyaw Jehová? 2) ¿Tiku xliʼakxilhtit nastalaniyaw xlakata ni namakgxtakgaw Jehová?

¹⁹ Putum tuku lichuwinanitaw kʼuma artículo chu nema titaxtulh wa tuku maklakaskinaw pero kuenta kilitlawatkan. Lu tlan limakgkatsiyaw xlakata xlakskujnin Dios akinin. Akgtum familia nema paxuwa, ni lu tatatlakan wa pulaktiy tlan tamaskiwin nema kinkamaxkiyan Dios. Katsiyaw pi taskujut chu tumin kinkamakgtayakgoyan xlakata nakgalhiyaw tuku maklakaskinaw. Katsiyaw pi akxni kaj tsinu lakgastananaw tlan makgkatsiyaw chu tecnología na tlan kinkamakgtayayan. Pero putum uma na tlan tlawakgo pi natamakgatliniyaw Jehová komo tlawayaw akxni ni xlilat, komo lhuwa kilhtamaku limaklakaskinaw o komo mastayaw talakaskin natlawakgo pi nialh nakakninaniyaw Dios.

²⁰ Satanás lu xlakgatilh pi wix chu mi familia natamakgatliniyatit Jehová. Pero ni milimastat talakaskin pi chuna nala (Prov. 22:3). Wa xlakata katalakatsuwini Jehová chu ni katamakgatlini. Biblia lichuwinan lhuwa xlakskujni tiku chuna tlawakgolh. Enoc chu Noé «ni makgxtakg[kgolh] xaxlikana Dios» (Gén. 5:22; 6:9). Moisés «xtachuna mpala lu[...] man xukxilhma Dios ntu ni tasiyuj» (Heb. 11:27). Chu Dios makgtayalh Jesús xlakata putum kilhtamaku xmakgapaxuwalh xTlat xalak akgapun (Juan 8:29). Nachuna katlawa la xlakan chu katlawa tuku wan uma tastakyaw xalak Biblia: «Xaliʼankgalhin kapaxuwatit. Ni anan xtajaxni nkatlawatit mioraciónkan. Xlipaks kalimastatit mpaxkatsinit» (1 Tes. 5:16-18). Ni kamasta talakaskin wi tuku natlawa pi natamakgatliniya Jehová.