Christopher, Hannah chu Gina ni kaj xakstukan chuna lakpuwankgo. Lhuwa latamanin xlikalanka kkatiyatni kanajlakgo pi Dios kaʼakxilha la xʼamigos. ¿Chu wix? ¿Makgkatsiya pi lakatsu wilani Dios? ¿Lakaskina tlan natalalipina Dios? Max nalakpuwana: «¿La naktalalin Dios tiku kgalhi putum litliwakga xlakata akit kaj lataman?».

TLAN XʼAMIGO DIOS NAWANAW

Biblia kinkawaniyan pi tlan natalalinaw kiMalakatsukinakan. Akgtum liʼakxilhtit, Isaías 41:8 wan pi Dios wanilh Abrahán «kiʼamigo». Na kaʼakxilhti tuku kinkawaniyan Santiago 4:8: «Wa Dios nti nkatalakatsuwinitit, na nakatalakatsuwiniyan xla». Uma wamputun pi tlan xʼamigo Dios nawanaw. Pero ¿la natalakatsuwiniyaw komo ni akxilhaw?

Xlakata nakgalhtiyaw uma takgalhskinin kalakapastakwi la tsukukan tlan talalinkan achatum. Akxni chatiy latamanin lalakgapaskgo, pulana lawanikgo xtukuwanikan. Komo chuntiya nalatachuwinankgo tsukukgo lawanikgo tuku lakapastaknankgo, la makgkatsikgo chu uma tlawa pi tlakg tlan nalatalalinkgo. Uma tlawa pi tlakg natatliwakglha akxni wi tuku tlawa xpalakata achatum. Nachuna kitaxtu xlakata la talalinkan Dios. Tlakg kalichuwinaw uma.

Nila nawana pi kgalhiya chatum amigo komo ni katsiya xtukuwani. Chuna la wa chatum puskat xalak Bulgaria wanikan Irina: «nila xʼamigo Dios wankan komo ni katsiyaw xtukuwani». Pero chuna la akxilhwi artículo nema likgalhtawakgawa, Dios lakaskin pi kalakgtalakatsuwiw. Wa xlakata kinkawaniyan xtukuwani kBiblia. Wan: «Akit Jehová. Wa uma kintukuwani» (Isaías 42:8).

Pero ¿xlakaskinka akxilha kiMalakatsukinakan komo nalakgapasaw xtukuwani chu namaklakaskinaw? Kaj kalakpuwanti uma: xtukuwani Dios nema litatsokga akgtati letras ktachuwin Hebreo nema wanikan Tetragrámaton, atsinu ni takgatsi 7,000 xlilhuwa kxapulana tatsokgni xahebreo, nema lilakgapaskan Antiguo Testamento. Uma, tlakg makglhuwa tsokgwilikanit ni xtachuna la atanu tukuwani. Uma kinkalimasiyaniyan pi Dios lakaskin nalakgapasaw xtukuwani.a

Xlakata Dios xasanto chu kgalhi putum litliwakga, makgapitsi lakpuwankgo pi komo namaklakaskinaw xtukuwani Dios limasiyayaw pi ni maxkiyaw kakni. Komo ni liwana nalimaklakaskinaw xtukuwani nalimasiyayaw pi ni maxkiyaw kakni, chuna la nitlan limaklakaskinkan xtukuwani chatum amigo. Pero komo tlan nalimaklakaskinaw, tlan nawan, Jehová lakaskin pi kskujnin kamaxkikgolh kakni xtukuwani chu namasiyanikgo amakgapitsin (Salmo 69:30, 31; 96:2, 8). Kalakapastakti pi Jesús kamasiyanilh kstalaninanin la natlawakgo oración: «KinTlatikan nti wilapi nkaʼkgapun, katamasantujilh mintukuwini». Masantujliyaw xtukuwani akxni kamasiyaniyaw amakgapitsin, chu uma tlawa pi tlakg natalakatsuwiniyaw Dios (Mateo 6:9).

Biblia lichuwinan pi Dios liwana kakgaxmatni «tiku xlilakpuwankgo xtukuwani» (Malaquías 3:16). Putum tiku paxkikgo uma tukuwani, Jehová wani: «Akit naklekgawa ama ti kilipawan. Xla nakinkilhmini y akit nakkgalhtij. Akit naktakgskgalhi [nakmakgtaya] nak ixtakgxtakgajni» (Salmo 91:14, 15). Uma wamputun, komo lakaskinaw xʼamigo Dios nawanaw, talakaskin nalakgapasaw chu namaklakaskinaw xtukuwani.

Tiku xlikana amigos ni lhuwa kilhtamaku titaxtu latachuwinankgo, kteléfono, correo electrónico, video o carta. Nachuna, xlakata xʼamigo Dios nawanaw talakaskin ni lhuwa kilhtamaku natitaxtu natachuwinanaw. ¿La natlawayaw?

Nalimaklakaskinaw oración. Kilikatsitkan pi tachuwinankan Dios ni xtachuna la tachuwinankan chatum lataman, tiku nachuna la akinin. Kililakapastakatkan pi akxni tlawayaw oración, tachuwinamaw tiku tlakg xlakaskinka xlikalanka kkakilhtamaku, wa Malakatsukina, wa xlakata kilimaxkitkan kakni. Nachuna, xlakata Dios nakinkakgaxmatniyan, talakaskin wi tuku kilitlawatkan. Kalichuwinaw pulaktutu.

Pulaktum, talakaskin wa natlawaniyaw oración Jehová, ni wa Jesús, nipara akgtum imagen ni para wa nema kawanikan santos (Éxodo 20:4, 5). Biblia liwana wan: «Nitu kalilakgaputsatit, wata putum kilhtamaku, katlawatit oración chu katasaskintit chu kamastatit paxtikatsinit, kawanitit Dios tuku maklakaskinatit» (Filipenses 4:6, TNM). Xlipulaktiy, talakaskin namaklakaskinaw xtukuwani xKgawasa Dios, Jesucristo. Xla wa: «[Ni ti] katilakgalh xaTlat lapi ni kit nkimpalakata» (Juan 14:6). Chu xlipulaktutu, tuku naskiniyaw Dios, nalimasiya pi tatalakxtumi xtalakaskin. Biblia wan: «Na wa yuma ntalipawan ntu nkgalhiniyaw, mpi lapi wi mpala tu kskiniw, wa lantlata xtalakaskin, wa nakinkakgaxmatniyan» (1 Juan 5:14).a

Pero komo kaj chatum tiku tlakg nachuwinan ni katimakgapalalh la latalalinkgo; xchatiykan xlikatsitka tuku kilhtamaku nachuwinankgo chu nakgaxmatkgo. Nachuna, kilikatsinitkan nakgaxmatniyaw Dios akxni kinkatachuwinanan. Pero ¿la kinkatachuwinanan?

La uku, maklakaskin xtachuwin, Biblia (2 Timoteo 3:16, 17). Kawiliw akgtum liʼakxilhtit, kalakpuwanti pi makglhtinanti xcarta miʼamigo tiku lu tlan talalipina. Likgalhtawakgakan tuku tsokgli xtachuna la kgaxmatkan xtachuwin, ¿ni xlikana? Nachuna, likgalhtawakgakan Biblia xtachuna la maxkikan talakaskin nakinkatachuwinanan Dios. Wa xlakata Gina, tiku lichuwinaw kxapulana artículo, wan: «Komo klakaskin pi Dios nakiʼakxilha la xʼamiga, talakaskin naklikgalhtawakga “xcarta”, Biblia». Chu na wan: «Xlakata klikgalhtawakga Biblia chali chali tlawanit pi tlakg naktalakatsuwini». ¿Na likgalhtawakgaya Biblia chali chali? Komo likgalhtawakgaya, namaxkiya talakaskin Dios natachuwinanan chu namakgkatsiya pi tlakg natalakatsuwiniya.

«Komo wi tuku lakaskina, kaj watiya nakiskiniya.» Ni chuna katiwani tiku ni lakgapasa o tiku kaj tsinu lakgapasa. Pero komo miʼamigo, chuna nawaniya, chuna tlawayaw, xlakata kamakgtayaputunaw kiʼamigoskan chu tlawayaw tuku kinkaskinikgoyan.

Biblia kinkawaniyan pi Jehová lismaninit kamaxki kskujnin tuku lakaskinkgo xlakata tlakg nalipaxuwakgo latamat. Akgtum liʼakxilhtit, mapakgsina David, tiku tlan xʼamigo Dios xwanit, wa: «lhuwa laklikaknit taskujut [...], y mintapuwan kilamasininitaw. [...] Para akit xakmakatsininalh y xaklikgalhchiwinalh wakg tu tlawanita kilakata, nila wakg xakkalikgalhchiwinankgolh» (Salmo 40:5). Pero Jehová ni kajwatiya uma tuku tlawa, xlakata na kamaxki tuku lakaskinkgo latamanin maski ni lakgapaskgo. Kamaxki «ntlan lananat, chu na kinkalimaxajan listakwan, chu ntapaxuwan kkinakukan» (Hechos 14:17).

Xlakata Jehová lakgati kinkamaxkiyan tuku lakaskinaw, akinin na liskujaw natlawayaw tuku kinkaskiniyan (Proverbios 27:11). Wa xlakata kinkakgalhskinkanan: ¿tuku kilitlawatkan xlakata namakgapaxuwayaw Dios? Biblia kinkamaxkiyan xtakgalhtin: «Niʼukxni tipatsankgayatit natlawayatit wantu lakwan tatlaw, chu akxtum kalimakgtayakgotit akatsunin wantu [...] kgalhiyatit [...] xampi xlikana Dios lu wa lakgatiy» (Hebreos 13:16, Hua Xasasti Talaccaxlan, 1999). ¿Wamputun pi kajwatiya natlawayaw tuku tlan chu tlan nakalikatsiniyaw latamanin?

Ni kaj watiya uma talakaskin. Biblia kinkawaniyan, «wampi lapi ni kgalhiyaw nkintakanajlakan, ni la makgapaxuwayaw Dios» (Hebreos 11:6). Na lichuwinan pi Abrahán lilakgapaska la «xamigo Dios», pero pulana limasiyalh pi xkgalhini takanajla (Santiago 2:23). Nachuna, Jesucristo lichuwinalh pi komo lakaskinaw xtasikulunalin Dios kilikgalhitkan takanajla (Juan 14:1). Wa xlakata, ¿la nakgalhiya takanajla nema Dios kaskini xʼamigos? Xapulana, talakaskin nalismaniya nalikgalhtawakgaya Biblia. Chuna nakatsiya tuku skiniyan Dios chu tlan namakgapaxuwaya. Komo naliskuja xlakata liwana nalakgapasa chu nakgalhakgaxpata, nastaka mintakanajla chu tlakg nalakgtalakatsuwiyan (Colosenses 1:9, 10).

¿Tuku natlawaya xlakata xʼamigo Dios nawana? Lichuwinanitaw makgapitsi tuku tlan natlawayaw xlakata tlan natalalinaw kiMalakatsukinakan:

1. Nalakgapasaw chu namaklakaskinaw xtukuwani, Jehová.

2. Ni lhuwa kilhtamaku natitaxtu natachuwinanaw, wa nalimaklakaskinaw oración chu nalikgalhtawakgayaw Biblia.

3. Putum kilhtamaku natlawayaw tuku kinkaskiniyan.

¿Makgantaxtipat umakgolh xlakata natalakatsuwiniya Dios? ¿Lakpuwana pi wi tuku kitsankganiyan xlakata tlan putum namakgantaxtiya? Max natalakaskin naliskuja, pero kalakpuwanti pi lu tlan la nakitaxtuniyan.

«Putum tuku natlawayaw xlakata tlan natalalinaw Dios, tlan nakitaxtu wan Jennifer, xalak Estados Unidos. Komo tlan natalalinaw nakgalhiyaw lhuwa tasikulunalin: tlakg nalipawanaw Dios, tlakg liwana nalakgapasaw, chu tlakg napaxkiyaw. Nitu xtachuna la uma.»

¿Xlakgati chuna xtalalipi Dios? Xtatayananin Jehová xatapaxuwan namakgtayakgoyan. Xlakan namasiyanikgoyan tuku wan Biblia pero ni katimatajikgon. Na tlan napina niku kgalhikgo xtamakxtumitkan nema wanikgo Pukgalhtawakga xla xTatayananin Jehová. Anta nakatatamakxtupiya latamanin tiku paxuwakgo xlakata tlan talalinkgo Dios chu lhuwa xtapalh akxilhkgo.a Tsinu tsinu namakgkatsiya la xmakgkatsi salmista, tiku wa: «Nakputsa la tlakg naktalakatsuwini Dios, wa kimaxki lipaxaw latamat» (Salmo 73:28).