«Kamakaxtumi niku natlawana» xlakata nastaka mintakanajla

AKXNI israelitas taxtukgocha kBabilonia kkata 537 akxni nina xmin Jesús, Jehová xlakkaxwilima xlakata tiji niku xlaktlawankgolh xlakata xtaspitkgolh kʼJerusalén. Kawanilh: «Kamapanutit tuku wi ktiji niku natlawan kachikin. Kamakaxtumitit, kamakaxtumitit takalakgtsapsni. Kamapanutit putum chiwix» (Is. 62:10). ¿La kgalhakgaxmatkgolh judíos umakgolh tachuwin? Max makgapitsi pulana taxtukgolh xlakata xmakaxtumikgolh, chu xlakata ni tuwa xtlawankgolh tiku xmimakgolh alistalh.

Tlan natamalakxtumiyaw xtijikan israelitas tiji nema tlawa nalakgchanaw tuku tlakg natlawayaw kxkachikin Dios. Jehová lakaskin pi nitu nakinkalakgchiyan kkintijikan. Wa xlakata anta kxTachuwin wan: «Kamakaxtumi niku natlawana, chu nitu kalaktlawalh putum mintiji» (Prov. 4:26). Maski lakgkgawasanku akinin o ni chuna, uma tastakyaw kinkamakgtayayan.

KALAKSAKTI NATLAWAYA TUKU TLAN

Akxni lichuwinankan tiku kgawasaku wankan: «Putum tlan namakgantaxti». Xlakata lakgkgawasan ni lu tatatlakgo, lakapala lakapastaknankgo chu lhuwa tuku tlawaputunkgo. Wa xlakata, Biblia wan: «Tuku stlan litasiyakgo kamanan wa xlitliwakgakan» (Prov. 20:29). Komo chatum kgawasa limaklakaskin tuku tlan tlawa chu xlitliwakga xlakata naskujnani Dios, xlikana napaxuwa.

Uma kakilhtamaku na akxilha tuku tlan tlawakgo lakgkgawasan. Akxni chatum kgawasa tiku xtatayana Jehová lu tlan ama kʼescuela, xmakgalhtawakgenanin o xcompañeros xalak escuela wanikgo pi kaʼalh xatalhman takgalhtawakga chu tlan kakitaxtunilh kʼuma kakilhtamaku. O komo katsini kgamanan, max nawanikgo pi kgamana lu xlakaskinka kalitaxtulh. ¿Milh kilhtamaku chuna wanikgon? ¿Lakgapasa tiku na chuna wanikgo? ¿Tuku namakgtaya chatum kstalanina Cristo, nalaksaka tuku tlan?

Tamasiy xalak Biblia tlan namakgtayayan natlawana ktiji nema tlakg xatlan anan. Eclesiastés 12:1 wan: «Kalakapastakti lu xaTlan miMalakatsukina la uku akxni kgawasaku wix». ¿La tlan “nalakapastaka” xaTlan miMalakatsukina? Xlikana, ¿la tlan chuna natlawayaw kimputumkan?

Kalakpuwaw tuku titaxtulh Eric tala xalak África occidental.a Lu xlakgati xkgamanan fútbol, wa xlakata akxni kajku akgkukitsis kata xkgalhi xlaksakputunkan xlakata xkgamanalh kʼakgtum equipo xalak akgtum país. Uma xwamputun pi tlan xʼalh kʼEuropa xlakata xmasiyanikgolh fútbol tiku lu xkatsinikgo. Pero komo wa uma xtilaksakli, ¿xlimasiyalh pi xlakapastakma xaTlan xMalakatsukina? Kaʼakxilhwi tuku lakpuwa natlawa Eric chu tuku kinkamasiyaniyan xliʼakxilhtit.

Akxni xʼanku kʼescuela, tsukulh katakgalhtawakga xtatayananin Jehová chu katsilh pi kiMalakatsukinakan nalakkaxtlawa putum xtaʼakglhuwitkan latamanin. Katsilh pi lu xlakaskinka xlimaklakaskilh xkilhtamaku chu xlitliwakga xlakata xtlawalh xtalakaskin Dios. Wa xlakata ni kgamana tiku lu xlakaskinka litaxtulh wata tamunulh chu kuentajtlawalh pi nastaka xtakanajla. Chalh kilhtamaku siervo ministerial litaxtulh chu alistalh wanika pi xʼalh kEscuela niku kamasiyanikan xalak Biblia Lakchixkuwin tiku Ni tamakgaxtokgkgonit.

Komo xtilaksakli xkgamanalh, max lu xkgalhilh tumin chu lu xlakaskinka xtilitaxtulh ktakgaman. Pero Eric xkatsi pi lu xlikana uma tastakyaw xalak Biblia: «Wantuku kxtapalh akxilha chatum rico wa xkachikin, chu lakpuwan pi xtachuna la patsaps nema litamakgtaya» (Prov. 18:11). Chuna, tlan tawilat nema tasiya pi maxki xtumin chatum lataman kaj tamanaxnat. Wata, wa tiku lhuwa kgalhiputun tumin, “lhuwa likgalhikgo ntalipuwan” (1 Tim. 6:9, 10).

Lu tlan pi lhuwa kamanan laksakkgonit naskujnanikgo Dios xaputum kilhtamaku, wa xlakata lu tlan makgkatsikgo, chu xlikana paxuwakgo. Eric wan: «Kkatatamakxtuminit xalanka “equipo” tiku xaputum kilhtamaku skujnanimakgolh Dios. Wa tlakg xatlan equipo niku tlan ktapakgsi, chu kpaxtikatsini Jehová xlakata kimakgtayanit naktlawan ktiji nema linan ktapaxuwan chu xlikana tlan kitaxtukan».

¿Chu wix? Ni wa kastalani tuku kgalhiputunkgo xalak kakilhtamaku, wata tlakg tlan xwa xakaxtum katlawa mintiji komo precursor nawana. (Kaʼakxilhti recuadro «Tuku universidad nila katimaxkin».)

NI KAMASTA TALAKASKIN WI TUKU NAMALAKGACHOKGOYAN

Chatum tala chu xpuskat xlakgapaxialhnamakgolh sucursal xalak Estados Unidos, lu lakgatikgolh la paxuwakgo betelitas tiku anta skujkgo. Xpuskat tsokgli alistalh: «Lu ni lhuwa tuku xaktlawamaw». Lakpuwankgolh naputsakgo la tlakg tlan kskujnanikgolh Jehová.

Pulana lu tuwa xmakgkatsikgo, wi xlakgpalikgolh kxlatamatkan. Akgtum kilhtamaku, lilakpuwankgolh texto xala chali chali, Juan 8:31, Hua Xasasti Talaccaxlan, 1999, xwanit, niku Jesús wa: «Lapi wixin lu[...] akgstituma namakgantaxtiyatit wantu kkalimapakgsiyan, chuna tlan nalitaxtuyatit la xaxlikana kilimakgalhtawakgat». Akxni likgalhtawakgakgolh, lakpuwankgolh: «Maski lhuwa tuku nialh nakkgalhiyaw lu tlan nakitaxtu». Stakgolh lanka xchikkan, nialh lhuwa tuku xlakgayakgolh chu ankgolh kʼakgtum congregación niku lu xtalakaskin wi tiku namakgtayanan. La uku precursores litaxtukgonit chu na makgtlawakgo Pukgalhtawakga xla xtatayananin Jehová chu na makgtayanankgo akxni tawila tamakxtumit xaʼakgtutu kilhtamaku. ¿La makgkatsikgo? Uma tuku wankgo: «Lu kaks malakawaninan la kpaxuwayaw maski ni lhuwa tuku kkgalhiyaw chu ktlawamaw tuku xkachikin Jehová kinkawaniyan pi kaktlawaw».

KATAMAKGXTAKGTI KTIJI NEMA NATLAWA PI TLAKG NASTAKA MINTAKANAJLA

Salomón tsokgli: «Milakgastapu, nalakaʼan kmilakatin, chuna [...] wa naʼakxilha tuku wi kmilakatin» (Prov. 4:25). Chuna la tiku matlawani putlaw kajwatiya xliʼakxilhat carretera, akinin nachuna kajwatiya naliskujaw wi tuku natlawayaw kxkachikin Dios.

¿Tuku tlan xtlawa kxkachikin Dios? Kawiliw akgtum liʼakxilhtit, wa xaputum kilhtamaku naskujnaniya Dios. Apulaktu, wa napina kʼatanu congregación niku lakatsu niku max tlakg talakaskin wi tiku nalichuwinankgo Dios, o alakatanu niku wilakgolh tiku lichuwinankgo Dios pero ni lhuwa lakgkgolotsin xalak congregación anan o max talakaskin Siervos ministeriales. ¿Tlan xwanti pi pimputuna makgtayanana? ¿Kaskini superintendente xla circuito kawanin tuku lakpuwan? Komo lakpuwampat napina niku tlakg lakgamakgat, tlan nakgalhskininana komo anan congregaciones niku talakaskin wi tiku namakgtayanan.b

Kalilakpuwamparaw tuku wan Isaías 62:10. Max lhuwa skujkgolh makgapitsi judíos xlakata israelitas tlan xtaspitparakgolh kxtiyatkan. ¿Tlan kitaxtulh? Tlan, xlakata xkachikin Dios nitu kaʼakgspulalh ktiji. Wa xlakata komo liskujpat xlakata wi tuku nalakgatayaya kxkachikin Dios, ni katachokgotaya. Wix tlan namakgantaxtiya, Jehová namakgtayayan. Ni kamasta talakaskin wi tuku namalaktlawiyan namakgantaxtiya chu kaskini Jehová liskgalala. Naʼakxilha pi namakgtayayan “namakaxtumiya niku natlawana” (Prov. 4:26).