«Drama Eureka» lhuwa tiku kamakgtayalh natekgskgo xaxlikana xalak Biblia

«¡EUREKA!» Uma tachuwin wamputun «¡Ktekgsli!». Ksiglo XIX, kilhtamaku nema litalakgapasli fiebre del oro lhuwa latamanin ankgolh kCalifornia chu wa tuku pixlanka xwankgo akxni xtekgskgo uma lu xtapalh likan. Pero, Charles Taze Russell chu amakgapitsin xLikgalhtawakgananin Biblia tekgskgolh tuku tlakg xtapalh: xaxlikana xalak Biblia. Chu xkamasiyaniputunkgo amakgapitsin.

Kxlakʼitat kata 1914, klaklanka kachikinin millones latamanin xakxilhkgonit «Foto-Drama de la Creación», akgtum película nema xmakgapala akgtsayan hora chu xtlawakgonit Asociación Internacional de Estudiantes de la Biblia (IBSA, siglas xaʼinglés). Xlakata xkgalhi xalakswan dibujos nema xtatsuwikgo, diapositivas nema xkgalhikgo color, xtakgaxmata tiku xlichuwinama tuku xtasiyama chu xtakgaxmata tatlakgni, uma xtlawa pi tiku xʼakxilhkgo xkatsikgolh tuku latilhanit kkakilhtamaku, lata akxni malakatsukinanka asta akxni kgalhsputa xTamapakgsin Cristo xaʼAkgtum Mil Kata (Apocalipsis [Revelación] 20:4).a

¿Chu tiku xlamakgo klaktsu kachikinin chu niku kaj ni lhuwa chiki xyakgolh? Xlakata putum tiku xkatsiputunkgo tuku xaxlikana, xʼakxilhkgolh drama, kkata 1914 IBSA tlawalh «Drama Eureka», tuku tsinu xtachuna xwanit la «Foto-Drama» pero ni xtapitsinit la akgtum película chu tlakg ni tuwa xlinkan alakatanu. Pulaktutu xwi chu tipalhuwa tachuwin xmatitaxtikanit. «Drama Eureka X», xkgalhi grabaciones niku wi tiku xchuwinan chu xtakgaxmata tatlakgni. Drama «Eureka Y», xkgalhi lakstlan diapositivas nema tsinu xkamanikanit. Chu Drama «Eureka Familiar», nema xtlawakanit xlakata xkgaxmatkgolh familia, xkgalhi pulaktum niku wi tiku xchuwinan chu na xtakgaxmata takilhtlin. Na xkamaxkikan tuku tlakga discos, chu tuku xliʼakxilhkan películas nema ni laktapalaxla.

Xlakata ni xtalakaskin tuku xliʼakxilhkan películas chu lanka pantalla, xLikgalhtawakgananin Biblia tlan xlinkgo tamakatsin xla xTamapakgsin Dios niku kaj ni lhuwa chiki xyakgolh. Drama «Eureka X» nema kaj xtakgaxmata, tlan xmatitaxtikan kakuwani chu katsisni. Ni xtalakaskin electricidad xlakata xʼakxilhka diapositivas xla Drama «Eureka Y», wata xtamaklakaskin makgskgot nema xmaklakaskin carburo. Revista Watch Tower ktachuwin finlandés, wa: «Kaniwa niku tlan kkamasiyayaw uma dibujos». ¡Lu xlikana tuku wankgolh!

Umakgolh xLikgalhtawakgananin Biblia ni xlakgaxokgokgo laklanka teatros, wata xputsakgo niku ni xkamatajika, la salones xla akgtum escuela, kpumapakgsin niku lakkaxtlawakan taʼakglhuwit, niku xchankgo tren chu asta klaklanka cuartos xla akgtum chiki. Makglhuwa kkalakgwan xmatitaxtikan, xlimaklakaskinkan sabana xasnapapa nema xlitaxtu la pantalla chu xmawakakan kxpatsaps lanka chiki niku xmakikan tuku xmakgalakan. Anthony Hambuch tsokgli: «Latamanin tiku xchananankgo xwilikgo lhuwa kiwi nema xlaktawilakgolh anta niku xchananankgo xlakata xkgaxmatkgolh chu xʼakxilhkgolh tuku xʼamaka matitaxtikan». Xgrupo «Eureka» xmaklakaskin akgtum carro nema kxwatalin kawayu xlakata nalinkgo tuku xlimatitaxtikan drama, klhakgatkan chu tuku xtamaklakaskin xlakata wi niku xtamakgxtakgkgolh chu xtlawakgolh xliwatkan.

Xmin kilhtamaku tiku xtamakxtumikgo kaj ni lhuwa xwankgonit o akglhuwa ciento. Anta kʼEstados Unidos kxʼescuela akgtum kachikin niku kaj 150 latamanin xlamakgolh makglhuwa matitaxtika drama, chu xliputum 400 latamanin tamakxtumikgolh. Kʼalakatanu, makgapitsi tlawankgolh 8 kilómetros xlakata xchankgolh niku xʼamaka matitaxtikan «Drama Eureka». Anta kSuecia, xtalakatsu Charlotte Ahlberg, tiku tamakxtumikgolh kʼaktsu xchiki «lu paxuwakgolh» akxni kgaxmatkgolh grabaciones. Anta kʼAustralia, max 1,500 latamanin ankgolh akxni matitaxtika Drama kkachikin niku xliskujkan minas chu makgat xwi. Revista Watch Tower wa pi kʼescuelas chu kʼuniversidades «makgalhtawakgenanin chu kgalhtawakgananin lu lakgatikgolh dibujos chu xalakstlan grabaciones». Lu xakxilhputunkan «Drama Eureka» asta kkachikinin niku xʼanan cines.

KAMUNUWILIKAN TALHTSI XLA XAXLIKANA

Pulakatunu takgalhtawakga xla xLikgalhtawakgananin Biblia o congregaciones, kaniwa niku xkamalakgacha akgchuwinanin tiku xmatsukikgo xasasti takgalhtawakga, xmastakgo taʼakgchuwin chu xmatitaxtikgo «Drama Eureka». Ni liwana katsiyaw la kgalhlit latamanin akxilhkgolh «Drama Eureka». Maski lhuwa tuku xlimatitaxtikan drama makglhuwa xmaklakaskinkan, kkata 1915 maski 86 grupos xʼanan, kaj 14 grupos makatsininankgolh la kgalhlit latamanin xʼakxilhkgonit drama. Ama kata ni xatakgatsin makatsininanka la kgalhlit latamanin xʼakxilhkgonit «Drama», pero wanka pi liwaka akgtum millón akxilhkgolh chu liwaka puxamakaw mil skinkgolh likgalhtawakga xalak Biblia.

Max «Drama Eureka» ni lu lakapastakkan kkakilhtamaku, pero lata kʼAustralia asta kʼArgentina, kSudáfrica asta kʼIndia, kCaribe o kʼislas británicas, lhuwa millón akxilhkgolh uma lu tlan drama. Lhuwa tiku tekgskgolh xaxlikana xalak Biblia, nema tlakg xtapalh nixawa oro, chu wankgolh: «¡Eureka!».