¿XKATSIYATA?

¿Tuku áloes nema lichuwinan Biblia?

Áloes nema lichuwinan Biblia wa tuku xkalimamuksikan putama chu lhakgat (Salmo 45:8; Proverbios 7:17; El Cantar de los Cantares 4:14). Xmaxtukan kkiwi wanikan áloe (pulaktum Aquilaria), akxni xmasa uma kiwi, xtaxtuni kstajat chu xamuksun aceite. Kiwi nema xmuksun kswakgakan chu kstakan xataswakga.

Biblia tamalakxtumi laktsu chiki niku xtawilakgo israelitas la «áloes nema chanit Jehová» (Números 24:5, 6). Max tamalakxtumilh xlakata xtachuna xwanit la xakiwi áloe, nema max 30 metros xlitalhman chu lu lhuwa xatuwan, o palhma, xkgalhi kxʼokgspun. Maski uma kiwi nialh anan kʼIsrael, libro A Dictionary of the Bible wan pi «nila wankan pi uma kiwi chu atanu nema ni talakgapasa [anta] ni xchankan niku lhuwa latamanin xʼanankgo chu lhuwa tuku xmakgalanan kxakaxtum Jordán nema lichuwinan Biblia».

¿Tukuya tamakamastan xmakgamakglhtinankan kxtemplo Jerusalén?

Xlimapakgsin Dios xwan pi tamakamastan nema xlinkan ktemplo tlakg xatlan xliwanat xwanit. Dios ni xmakgamakglhtinan tamakamastan nema nialh tlan xwanit (Éxodo 23:19; Levítico 22:21-24). Filón, tsokgna judío xalak siglo I, wan pi sacerdotes liwana xkaʼakxilhkgo animales xlitsukukgo kxakgxakgakan asta kxtantunkan xlakata xkatsikgolh komo ni xatatatla xwankgonit chu «ni xkgalhikgolh tuku nitlan».

Chuna la wan tiku lakputsanani Biblia wanikan E. P. Sanders, max ktemplo kajwatiya xkastakan «animales nema liwana xʼakxilhkgonit sacerdotes. Komo chuna, tiku kstanama xlimaxkit xwanit tiku tamawanalh akgtum comprobante niku xwa pi animal ni xatatatla xwanit».

Kata 2011, makgapitsi arquélogos tekgskgolh uma comprobante niku xwi templo: akgtum sello xla arcilla nema la tumin xtasiya chu max ksiglo I akxni nina xmin Jesús chu kata 70 akxni xminita Jesús xmaklakaskinkan uma. Kgalhi akgtiy tachuwin xala arameo nema wamputun «xla Dios nema xaskulunku». Takatsi pi tiku kskujkgo ktemplo xmawakanikgo umakgolh fichas tuku xmakamastakan o animales.