Chu wix, ¿tuku lakpuwana xlakata Akgskgawini? ¿Tuku takgalhtin lakpuwana pi xaxlikana?

• Ni anan Akgskgawini. Kaj chuna limasiyakan tuku nitlan.

• Akgskgawini lama, pero ni katlawani tuku nitlan latamanin.

• Akgskgawini espíritu tiku kgalhi lhuwa litliwakga chu kamatlawi tuku nitlan latamanin.

Putum latamanin tanu tanu lakpuwankgo xlakata uma. ¿Tiku kgalhi xaxlikana takgalhtin? ¿Xlakaskinka nakatsiyaw? Komo Akgskgawini ni lama, latamanin tiku kanajlakgo pi lama xataʼakgskgawin lamakgolh. Lama pero ni kinkatlawaniyan tuku nitlan, tiku pekuanikgo kaj chuna lipatinamakgolh. Xlikana, komo Akgskgawini lama chu kinkamatlawiputunan tuku nitlan, max lu nitlan likatsi ni xtachuna la akinin lakpuwanaw.

¿Kaj limasiyakan Akgskgawini xlakata tuku nitlan, o xlikana lama? Komo xlikana lama, ¿katuwa wi milatamat? Komo chuna, ¿tuku tlan nalitamakgtayaya? Kaʼakxilhwi xtakgalhtin nema masta Biblia.

Lhuwa latamanin lakpuwankgo pi Akgskgawini, nema lichuwinan Biblia kaj limasiyakan tuku nitlan. Komo xlikana, ¿tuku xlakata wan Biblia pi tachuwinalh Jesús chu Dios? Liwana kalichuwinaw uma.

AKXNI TACHUWINALH JESÚS

Akxni nina lhuwa kilhtamaku xtamununit Jesús, Akgskgawini makgtutu litsakgsalh. Pulana, matlawiputulh pi ni tlan xlimaklakaskilh litliwakga nema Dios xmaxkinit: wanilh pi kaxtalanchu xtlawalh chiwix. Alistalh, wanilh pi katuwa xwililh xlatamat, xlakata kaks xkamalakawanilh latamanin. Chu alistalh malaknunilh putum tamapakgsin xalak kakilhtamaku kaj xlakata xlakgtakilhputalh chu xmaxkilh kakni. Jesús tayanilh putum tuku liʼakxilhli Akgskgawini chu akxni makgtutu liʼakxilhka limaklakaskilh Biblia xlakata nalikgalhtinan (Mateo 4:1-11; Lucas 4:1-13).

¿Tiku xtachuwinama Jesús? ¿Xtachuwinama talakgalhin nema xkgalhi? Ni. Biblia wan pi xla nikxni lakgalhinalh maski nachuna tuwa titaxtulh (Hebreos 4:15). Xlikana, «wa xla, ni tsinu ntlawalh ntalakgalhin; chu na ni tu tatakgsnilh ntakgsanin kxtachuwin» (1 Pedro 2:22). Jesús ni xkgalhi talakgalhin chu putum kilhtamaku kgalhakgaxmatli Dios, wa xlakata tlan wanaw pi xtachuwinama tiku staknan.

Ni kajwatiya uma takgalhchuwin limasiya pi Akgskgawini lama:

• Kalilakapastakti pi Akgskgawini malaknunilh putum tamapakgsin xalak kakilhtamaku, kaj xlakata xlakgtakilhputalh chu xmaxkilh kakni (Mateo 4:8, 9). Uma nitu xlitaxtulh komo nixlikana xwa. Nachuna, Jesús ni wa pi Akgskgawini ni xkgalhi litliwakga.

• Akxni tachuwinankgolh Jesús, Akgskgawini alh «chu lhuwa makgas kilhtamaku lakatsalalh» (Lucas 4:13, Hua Xasasti Talaccaxlan, 1999). Komo ni xlikana xlatamalh Akgskgawini nila xtachuwinalh Jesús.

• Mateo 4:11 wan pi alistalh «tichinkgolh ángeles» xlakata namatliwakglhkgo chu namakgtayakgo. Tlan nawanaw pi ángeles lamakgolh. Wa xlakata, uma wamputun pi xlikana na lama Akgskgawini.

AKXNI TACHUWINALH DIOS

Kaʼakxilhwi tuku lichuwinanka xlakata chatum kskujni Dios wanikan Job. Lichuwinan niku Dios makgtiy tachuwinalh Akgskgawini. Uma pulaktiy takgalhchuwin, Dios lichuwinalh pi Job ni xmakgatsankganani. Chuna la kgalhtinalh Akgskgawini xlimasiyaputun pi tlakg xlakgapasa Job. Wanilh pi Job kskujnanima kaj xlakata wi tuku xmakgamakglhtinamputun chu limawakalh Dios pi xmaxkima tuku xlakaskin xlakata ni xmakgatsankgananilh. Wa xlakata Jehová mastalh talakaskin pi Akgskgawini xmakglhtilh tuku xkgalhi Job: putum tuku xtapalh, xkamanan chu tlawalh pi xtatatlalh.a Uma limasiyalh pi Akgskgawini xa akgsanina, chu Dios sikulunatlawalh Job xlakata ni makgxtakgli (Job 1:6-12; 2:1-7).

¿Xtachuwinama Jehová talakgalhin nema kgalhi? Ni, Biblia kinkawaniyan xlakata Dios: «KiDios snun tlan ixtijia» (Salmo 18:30 Salmos Ixtatlincan Ti Talipawan Dios). Chu wampa: «Xasantujlani, xasantujlani, xasantujlani wankimPuchinakan [Jehová] Dios, wanti nkgalhiy xlipaks Litliwakga» (Apocalipsis [Revelación] 4:8). Tachuwin xasantujlani wamputun ni xaxkajwani, skulunku o ni kgalhi talakgalhin. Wa xlakata komo Jehová xasanto, uma wamputun pi ni kgalhi talakgalhin.

Pero, makgapitsi wankgo pi Job nikxni latamalh chu takgalhchuwin nema lichuwinan Biblia mat ni xlikana. ¿Xlikana tuku wankgo? Ni. Anta kBiblia lichuwinan pi xlikana latamalh. Santiago 5:7-11 limaklakaskin la akgtum liʼakxilhtit xlakata nakamatliwakglha kstalaninanin Cristo chu natayanikgo akxni natitaxtukgo akgtum taʼakglhuwit, chu xlikana nakanajlakgo pi Jehová nakasikulunatlawa. Komo ni xlikana xwa chuna la mapatinilh Akgskgawini Job, uma versículos nila xkalimatliwakglhka kstalaninanin Cristo. Nachuna, Ezequiel 14:14, 20 lichuwinan kgalhtutu latamanin tiku xaʼakgstitum latamakgolh. Chatiy tiku kalichuwinankan wa Daniel chu Noé, tiku xlikana latamakgolh. Xlikgalhtutu wa Job; wa xlakata tlan wanaw pi xlikana latamalh. Komo xlikana latamalh, na lama tiku tlawalh pi lhuwa xpatinalh.

Putum tuku lichuwinan Biblia, limasiya pi Akgskgawini xlikana lama. Wa xlakata, akstu kinkakgalhskinkanan: «¿Tlan natlawani tuku nitlan kifamilia chu akit?».

¿TUKU TLAWAMA AKGSKGAWINI?

Kaj kalakpuwanti pi chinkgolh kminkachikin lakchixkuwin tiku lixkajni likatsikgo. ¿Tuku xlalh? Lhuwa xʼanalh tuku nitlan chu latamanin nialh xlamaxkilh kakni. Kaj kalakpuwanti pi Akgskgawini chu xdemonios—ángeles tiku ni kgalhakgaxmatkgolh Dios chu stalanikgolh Akgskgawini—akxtum xkinkatalatamakgon. ¿Tuku xlalh? Xlakata nakgalhtiyaw kalakpuwaw tuku titaxtu knoticias xlikalanka Katiyatni.

• ¿Ni xlikana pi talhuwima tiku latlawanikgo tuku nitlan maski lhuwa liskujmaka xlakata namasputukan uma?

• Maski lhuwa natlatni lilakgaputsakgo xlakata taskuwan, ¿ni xlikana pi la uku tlakg tasiya ktelevisión?

• Maski lhuwa liskujmaka xlakata nakuentajtlawakan tuku anan kKatiyatni, ¿ni xlikana pi chuntiya nitlan wi?

• ¿Ni xlikana pi wi tiku kalima latamanin niku nitlan nakakitaxtuni?

Biblia lichuwinan pi wi tiku tlawama kaʼanalh lhuwa taʼakglhuwit chu kinkawaniyan tiku chuna tlawama: «Wa xlakata mamokgosikancha xalanka dragón, xapulana luwa, tiku wanikan Akgskgawini chu Satanás, tiku kaʼakgskgawima putum latamanin, mamokgosika kkatiyatni, chu xʼángeles na katamamokgosika. [...] Kgoxutanin wanti lamakgo nkatuxawat, chu wanti lama ktakgayawana, sampi wa Akgskgawini, kalakgminitan, na luwa tlanka tasitsin nkgalhiy, xpalakata mpi katsiy mpi kaj tsinu kilhtamaku nkgalhiy» (Apocalipsis 12:9, 12). Lhuwa tiku lakputsanankgonit katsikgonit pi tiku mapakgsima uma kakilhtamaku wa Akgskgawini, tiku lixkajni likatsi.

Wa xlakata putsayaw la natlawaya nitu nakinkatlawaniyan. ¿Pero la natlawayaw? Artículo nema nalikgalhtawakgayaw nakinkamaxkiyan xatakgalhtin.

Akgskgawini xtachuna monóxido de carbono: nila akxilhkan, lu nitlan tuku natlawaniyan chu ni katsikan la namakgnitilhayan. Pero nachuna ni kilipekuanitkan, lhuwa tamakgtay kgalhiyaw nema Dios kinkamaxkiyan. Kaʼakxilhwi makgapitsi.

Nalaksakaw tuku natlawaputunaw. Santiago 4:7 wan: «Na kalakgapaxtokgtit [o katatlankaninitit] Akgskgawini, chuna nakatsalaniyan». Maski xlikana pi Akgskgawini lhuwa litliwakga kgalhi, nila nakinkamatlawiyan tuku akinin ni natlawaputunaw. Komo tliwakga natawila kintakanajlakan, xla nakinkamakgxtakgan (1 Pedro 5:9). Jesús makgtutu lakgmakgalh tuku Akgskgawini xmalaknunima asta akxni nialh makglhuwilh (Mateo 4:11). Akinin na tlan chuna natlawayaw.

Tlan natalalinaw. Santiago 4:8 wan: «Wa Dios nti nkatalakatsuwinitit». Uma texto kinkawaniyan pi tlan xʼamigo Jehová nawanaw. ¿La natlawayaw xlakata kiamigojkan nawan? Talakaskin nakatsiniyaw kBiblia la kgalhi xtayat (Juan 17:3). Akxni tlakg nakatsinitilhayaw xlakata Dios, tlakg napaxkiyaw, chu uma natlawa pi tlakg naskujnaniputunaw (1 Juan 5:3). ¿La nakinkakgalhtiyan kinTlatkan xalak akgapun putum tuku natlawayaw? Santiago wan: «Na nakatalakatsuwiniyan».

Nakinkakuentajtlawayan. Proverbios 18:10 wan: «Xtukuwani Jehová akgtum torre nema tliwakglh ya. Anta lakapala an tiku xaʼakgstitum chu makgtayakan». Uma ni wamputun pi nalimaklakaskinaw xtukuwani xlakata nalitamakgtayayaw, wamputun pi tiku maxkikgo kakni Dios tlan naputsakgo xtamakgtay akxni nalakaskinkgo.

Akgtum tlan liʼakxilhtit. Anta kHechos 19:19 tekgsaw akgtum liʼakxilhtit nema lhuwa tuku kinkamasiyaniyan. Lichuwinan tuku tlawakgolh latamanin xalak Éfeso, tiku nina makgas kstalaninanin Cristo xlitaxtukgonit. Anta wan: «Chu na chuna nti kskuwanankgoy, tiliminkgolh xlibrojkan, na anta kxlakatin lilhuwa ntilhkuyukgolh. Cha nchu ntitlawanikgolh xakuinta lantla xtapalh, tipuxamakaw milh tumin xla plata ntikitaxtulh».a Kstalaninanin Cristo putum lhkuyukgolh tuku xkgalhikgo xla taskuwan, maski lhuwa xtapalh xkgalhi. ¡Lu tlan liʼakxilhtit kinkawilinikgon! La uku tlakg litatsamanit kakilhtamaku tuku xla taskuwan. Wi makgapitsi tuku tlawakan o kgalhikan nema tasiya pi ni xla taskuwan, pero uma xlikana xla taskuwan chu uma natlawa pi demonios natalakatsuwikgo. Wa xlakata, talakaskin pi putum nalakgmakganaw tuku xla taskuwan, maski lu tuwa namakgkatsiyaw (Deuteronomio 18:10-12).

Akxni xkgalhi 50 kata, Rogelio chixku tiku lichuwinaw xapulana kʼuma artículo, kanajlalh pi Akgskgawini xlikana lama. ¿Tuku tlawalh pi xtalakgpalilh xtapuwan? Xla wan: «Akxni xapulana klikgalhtawakgalh Biblia, kkatsilh pi xlikana lama Akgskgawini. Uma tuku kkatsininit kimakgtaya xlakata ni naktlawa tuku kimatlawiputun Akgskgawini».

¿La xmakgkatsi komo xlatapa niku nialh xkinkamatlawin tuku nitlan Akgskgawini? Ni kaj tamanaxnat. Biblia kinkawaniyan pi nialh makgas kilhtamaku Satanás tiku kaʼakgskgawinit lhuwa latamanin, namakankan «ktakgayawana ntu mpaks lhkuyat laklhkuj, chu xawa azufre» (Revelación 20:10). Xlikana, lhkuyat chu azufre nila tuku natlawani chatum espíritu, wa xlakata tlan nawanaw pi kaj xlimasiyakan: uma wamputun pi namalakgsputukan putum kilhtamaku. Chuna, Satanás namalakgsputukan. ¡Lu tlan namakgkatsiyaw xlakskujnanin Dios!

Komo nina min uma kilhtamaku, chuntiya kakatsini xlakata Jehová chu la lakapastaknan.b Komo chuna natlawaya, naʼakxilha kilhtamaku akxni nawanaw: «¡Akgskgawini nialh lama!».