¿Tuku katsinikgo amakgapitsin akxni akxilhkgo tuku tlawayaw?
1. ¿Tuku katsinikgolh kstalaninanin Jesús akxni xʼakxilhkgo tuku xtlawa?
1 Jesús wa: «Kalipitit nkimukiwi kmiokgspunkan, chu na kakinkatsinitit» (Mat. 11:29). Uma limasiya pi xla xtlawa tuku xwan chu ni kaj xchuwinan. Kalakpuwanti tuku katsinikgolh kstalaninanin akxni xʼakxilhkgo. Tlan xlikatsi, xalakgalhamanina chu xapaxkina xwanit (Mat. 8:1-3; Mar. 6:30-34). Ni tlankajwa xwanit (Juan 13:2-5). Akxni xtaʼankgo lichuwinankgo Dios kstalaninanin, xʼakxilhkgo pi Jesús ni xjaxa chu liwana xmasiya tuku xaxlikana (Luc. 8:1; 21:37, 38). ¿Tuku lakpuwankgo tiku kinkaʼakxilhkgoyan akxni lichuwinanaw Dios?
2. ¿La kamakgtaya latamanin akxni liwana lhakgananaw chu la likatsiyaw?
2 Tiku katachuwinanaw. Akxni liwana lhakgananaw, tlan likatsiyaw chu limasiyayaw pi xlikana kamakgtayaputunaw uma lu nakamakgtaya tiku katachuwinanaw (2 Cor. 6:3; Fili. 1:27). Na akxilhkgo pi limaklakaskinaw Biblia akxni lichuwinanaw Dios chu lakgatikgo akxni kakgaxmatniyaw tuku kinkawanikgoyan. Nikxni kapatsankga pi xlakata latamanin nakgaxmatkgo tamakatsin xlakata xTamapakgsin Dios lu xlakaskinka nawiliyaw xatlan liʼakxilhtit xlakata tuku lichuwinan uma párrafo.
3. ¿La tlan nakamakgtayayaw kinatalankan?
3 Kinatalankan. Na kalakpuwanti la tlan nakamakgtayayaw kinatalankan. Akxni lu lhuwa lichuwinana Dios tlawa pi amakgapitsi nachuna natlawaputunkgo. Chuna la akgtum likan mastakaki atanu likan, nachuna akxni liwana katsiyaw tuku nawanaw nakamakgtaya amakgapitsi xlakata na “stakaka” nawankgo, uma wamputun pi liwana namasiyakgo (Pro. 27:17). Komo liwana natsokgaw xlakata tiku limasiya pi xlikana katsiputun tuku wan Biblia chu tunkun nalakgamparayaw, natlawa pi amakgapitsi nachuna natlawaputunkgo. Akxni liwana lichuwinanaw Dios, lu tlan kamakgtayayaw kinatalankan (2 Tim. 4:5).
4. ¿Tuku xlakata lakgachunin naʼakxilha tukuya liʼakxilhtit kamaxkimaw amakgapitsi?
4 Xlakata tlan nakatsiya la nakamakgtayaya amakgapitsi, lakgachunin tlan naʼakxilha tuku tlawaya chu tuku wana. Xatlan liʼakxilhtit nema wiliyaw namakgapaxuwa Jehová chu natlawa pi namakgkatsiyaw la apóstol Pablo, tiku wa: «Wixin wa kaukxilhtit lantla kit klama, xtachuna lantla kit kukxilhtima, chu ktlawama lantla tilatamalh Kimpuchinakan Jesús» (1 Cor. 11:1, Hua Xasasti Talaccaxlan [1999]).