¿TUKU tlawama pi kalakxlalh xpatsaps Jericó? Chuna la lanka limakgnin nema pankga lakxtlawana. Pero akxni ama kilhtamaku nixʼanan limakgnin nema pankga, nipara laklanka likan. ¡Uma atanu nema nilay tamakanajlay xla Jehová! Kaʼakxilhwi la chuna lalh.

Nakwaniyan tuku Jehová wanilh Josué: Kalipitit caja xla talakkaxlan. Wix chu mi soldados katlawantit xlimakgstilili patsaps xla kachikin akgchaxan kilhtamaku, kaj makgtum chali chali katlawantit xlimakgstilili kachikin. Kgalhtujun sacerdotes xliʼanatkan kxlakatin caja xla talakkaxlan chu kamaskgolikgolh akgalokgot.

Xliʼakgtujun kilhtamaku katlawantit makgtujun xlimakgstilili kachikin. Alistalh makgas kamaskgolitit akgalokgot, chu pixlanka kawankgolh xlakata natamatsukiy guerra. ¡Chu patsaps nalakxlay!

Josué chu kachikin tlawakgoy chuna la Jehová kawani. Akxni tlawamakgolh kxmakgstilili kachikin, xputumkan nituku wankgoy. Kajwatiya tuku takgaxmata la xmaskgolimakgolh akgalokgot chu xtantunkan la xtatukikgoy. Xtalamakgasitsinkan xalak Jericó max lu xpekuankgonit. ¿Akxilhpat tasiw xaspini nema tachinit kventana? ¿Tiku xla tama ventana? Lu xlikana, Rahab chuna tlawanit la wanikgolh skgalananin. Putum xfamilia anta tatanumakgolh, liwana akxilhmakgolh tuku lama.

Alistalh, xliʼakgtujun kilhtamaku, akxni xtlawankgonita makgtujun xlimakgstilili kachikin, maskgolikgoy akgalokgot, pixlanka wankgoy xsoldados, chu patsaps lakxlalh. Josué wan: Kakamakgnitit kristianos chu wakg kachikin kalhkuyutit kaj watiya namakgxtakgatit plata, oro, cobre chu hierro, wa nalinkan niku makikan tuku kxtapalh xla Jehová anta ktabernáculo.

Chu Josué waniy kgalhtiy skgalananin: Kamaxtutit Rahab chu putum xfamilia. Xlakan lakgtaxtukgolh la xwankgonit skgalananin.

¡KAʼAKXILHTI tuku maknuma uma chixku anta kxpulakni kxchik xaxuwa! Maktum lhakgat xastlan, chu akgxtum oro chu ni lhuwa tumin xaplata. Uma katuwa anta kJericó liminitancha. Pero, ¿tuku xtikatlawanika uma katuwa? ¿Lakapastaka?

Xtimalakgsputuka, chu oro chu plata chunata xtakatsiy pi xtikalinka anta niku xmakikan tuku kxtapalh xla Jehová anta kxtabernáculo. Uma kristianos ni kgalhakgaxmatnimakgolh Dios. Kgalhankgonit tuku xla Dios. Uma chixku xtukuwani Acán, chu wantiku akxtum tawilakgolh wa xfamilia. Kaʼakxilhwi tuku lalh.

Akxni Acán xkgalhanitta uma katuwa, Josué kamalakgacha lakchixkuwin xlakata nakatatlaway guerra li Hai. Pero tatlajikgolh. Makgapitsi nikgolh chu amakgapitsi tsalakgolh. Josué lu lipuwa. Takilhputalh kkatiyatni, chu waniy Jehová: ¿Tuku xlakata mastaya talakaskin chuna kakinkaʼakgspulan?

Jehová kgalhtiy: ¡Kataki! Li Israel tlawakgonit talekgalhin. Tiyakgolh wantuku limalakgsputat xwanit chu nema xtimastaka ktabernáculo. Kgalhankgonit maktum lhakgat lu xastlan chu tsekg likatsikgoy. Niktikasikulanatlawalh asta akxni namalakgsputuyatit uma lhakgat chu wantiku kgalhananit. Jehová waniy Josué pi namakatsiniy tiku tama chixku tiku lixkajni likatsiy.

Wa xlakata Josué kamamakxtumilh putum kachikin, chu Jehová laksakxtuy tama chixku tiku xalixkajni likatsiy, Acán. Acán wan: Klekgalhinanit. Kʼakxilhli maktum lhakgat xastlan, chu akgxtum oro chu ni lhuwa tumin xaplata. Lu klakgatilh uma katuwa chu klilh. Anta kmaknunit kkinchik xaxuwa.

Akxni katekgska paks uma katuwa nema xkgalhanit, liminika Josué, chu Josué wani Acán: ¿Tuku xlakata kinkalitani talakgaputsit? ¡Chu uku Jehová namapatiniyan! Alistalh putum kristianos aktalamakgnikgolh Acán chu xfamilia. ¿Ni kinkamasiyaniyan uma pi ni xlilat nalinaw tuku ni kilakan?

Alistalh li Israel taxtuparakgolh nakatatlaway guerra li Hai. Chu akxni tama kilhtamaku Jehová kamakgtayalh xkachikin, chu tlajakgoy guerra.