Malakgsputuka Jerusalén

TITAXTULHA akgkaw kata akxni Nabucodonosor kalilh kBabilonia lakgkgawasan xalak Israel wantiku tlakg kgalhikgoy takgalhtawakga. ¡Chu uku kaʼakxilhti! Jerusalén lhkuyumaka chu li Israel nema ninikgolh kachilimaka kBabilonia.

Kalakapastakti, palakachuwinanin xkawaninit li Israel tuku xʼama kaʼakgspulay komo ni xlakgpalikgolh la katuwa tuku nitlan xtlawamakgolh. Li Israel ni kgaxmatnikgolh palakachuwinanin. Chuntiya xkakninanimakgolh atanu dioses chu nixkakninanimakgolh Jehová. Wa xlakata kamininiy uma tuku nitlan kaʼakgspulama. Katsiyaw pi nitlan tuku xtlawamakgolh xlakata Ezequiel xpalakachuwina Dios kinkawaniyan uma tuku nitlan xtlawakgoy.

¿Katsiya wix tiku Ezequiel? Ezequiel chatum kgawasa tiku na linka kBabilonia, akxni na kalinka Daniel chu xʼamigos, Sadrac, Mesac chu Abednego.

Akxni Ezequiel antaku wilacha kBabilonia, Jehová masiyaniy wantuku nitlan tlawamakgolh kJerusalén anta kxtemplo Jehová. Jehová limasiyanilh tuku nila tamakanajla. Ezequiel makgat wilacha kBabilonia pero Jehová maʼakxilhalh tuku lama ktemplo. ¡Wantuku akxilhli Ezequiel lu lixkajni!

Jehová waniy Ezequiel: Kaʼakxilhti uma tuku xalaklixkajni tlawamakgolh li Israel ktemplo. Kaʼakxilhti patsaps litalakgatsamanit xadibujos luwa chu amakgapitsi animales. ¡Kaʼakxilhti li Israel kakninanimakgolh! Ezequiel akxilhma uma chu tsokgwili tuku lama.

Jehová kgalhskilh Ezequiel: ¿Katsiya wix tuku tsekg tlawamakgolh pulalinanin xalak Israel? Ezequiel na akxilha tuku tsekg tlawamakgolh. Akxilhli 70 lakchixkuwin kakninanimakgolh dioses nema nixaxlikana. Chu wankgoy: Jehová nitu kinkaʼakxilhman. Ay makgxtakgnit uma kachikin.

Jehová na masiyanilh Ezequiel makgapitsi lakpuskatin nema wilakgolh kxapakxtu templo. Chu kakninanimakgolh Tamuz chatum dios nema nixaxlikana. Chu Jehová wanipara Ezequiel: ¡Kakaʼakxilhti uma lakchixkuwin tiku wilakgolh kxkilhtin templo xla Jehová! Ezequiel nakaʼakxilha max puxamakitsis lakchixkuwin. ¡Takilhputamakgolh chu kakninanimakgolh Chichini!

Uma kristianos nikinkgalhakgaxmatnikgoy, wan Jehová. ¡Nikajwatiya tlawamakgolh tuku nitlan, asta minkgoy kintemplo chu anta tlawakgoy! Wa xlakata Jehová wan: Namakgkatsikgoy kintasitsi. Chu niktikalakglipuwa akxni nakamalakgsputukan.

Li Israel tatlankaninikgolh mapakgsina Nabucodonosor akxni xtitaxtunita akgtutu kata akxni Jehová masiyanilh Ezequiel uma tuku nitlan xtlawamakgolh. Wa xlakata Nabucodonosor milh katalachipay. Akxni xtitaxtunitta akgtum kata a itat lakxtlawakgolh patsaps nema xlimakgstili kachikin chu lhkuyukgolh. Tlakg lhuwa nikgolh chu wantiku ni nikgolh kachilinka kBabilonia.

¿Tuku xlakata Jehová mastalh talakaskin kakamalakgsputuka li Israel? Wa xlakata ni kgalhakgaxmatnikgolh xlimapakgsin Jehová. Uma limasiyay pi lu xlakaskinka nakgalhakgaxmatniyaw Jehová, nikxni natlawayaw tuku ni lakgatiy.

Mapakgsina Nabucodonosor kamaxkilh talakaskin Israel pi katamakgxtakgkgolh makgapitsi anta kʼIsrael. Chu Guedalías xpuxkukan tlawalh. Pero makgapitsi lakchixkuwin makgnikgolh Guedalías. Chu la uku pekuankgoy xlakata li Babilonia naminkgoy kamakgniy xlakata uma tuku tlawakgolh. Wa xlakata mafuerzajlinikgolh Jeremías natatsalakgoy chu ankgolh kʼEgipto.

Akxni ankgolh kʼEgipto nialhtiku tamakgxtakgli kʼIsrael. Titaxtulh 70 kata nitiku latamalh anta kkachikin. Pero Jehová wan pi nakamaspitparay xkachikin akxni titaxtunitta nawan 70 kata. Chu akxni tama kilhtamku, ¿tuku kaʼakgspulay li Israel kBabilonia? Kaʼakxilhwi.