José chatum tiku na xaʼaktsujku xkgawasa Jacob xwanit. Xnapuxkun akxilhkgolh pi José wa tiku tlakg xpaxki xtlat. ¿La lakpuwana pi xmakgkatsikgo? Xlakgsitsinikgo chu ni xakxilhputunkgo. Akgtum kilhtamaku, José lu kaj tanu manixnalh chu kalitachuwinalh xnatalan. Xlakan lakpuwankgolh pi xʼama min kilhtamaku akxni xʼamakgo takilhputanikgo. Wa xlakata, tlakg ni akxilhputunkgolh.

Akgtum kilhtamaku, xnatalan José xkuentajtlawamakgo borregos lakatsu kkachikin Siquem. Wa xlakata Jacob malakgachalh José xlakata xʼalh akxilha la xkakitaxtunima xnatalan. Akxni lakgamakgat akxilhkgolh, tsukukgolh wankgo: “Amimacha tiku manixnan. ¡Kamakgniw!”. Wa xlakata chipakgolh chu mujukgolh kʼakgtum pulhman tawaxni. Pero Judá, chatum xtala, wa: “Ni kamakgnitit. Wata kastaw xlakata skujni nalitaxtu”. Chu wa tuku tlawakgolh. Kalistamaxkikgolh 20 tumin xla plata stananin xalak Madián nema xʼamakgo kʼEgipto.

Alistalh, xnatalan limastajakgolh xlhakgat José xkgalhni tantum cabra, linikgolh xlhakgat xtlatkan chu kgalhskinkgolh: “¿Ni xla minkgawasa uma?”. Jacob lakpuwa pi tantum lapanit xmakgninit José chu lu lipuwa. Nitiku la xmakgapaxuwa.

Akxni chankgolh kʼEgipto, chatum xapuxku soldado nema xwanikan Potifar tamawalh José xlakata kskujni xwa. Pero Jehová xmakgtaya José. Potifar akxilhli pi José lu tlan skujni xwanit chu tlan xlipawan. Ni makgas titaxtulh, Potifar lakgayawalh José putum tuku xkgalhi.

Xpuskat Potifar xʼakxilha pi José lu stlan xwanit chu lu tliwakga, chu putum kilhtamaku xwani pi xtatamalh. ¿Tuku xtlawa José? Xlakgmakgan chu xwani: “Ni, uma nitlan. Kimalana kilipawan chu wix xpuskat. Komo naktatamayan, naklakgalhinan kxlakatin Dios”.

Akgtum kilhtamaku, xpuskat Potifar xafuerza xtatamaputun José. Lichipalh xlhakgat, pero xla tsalataxtulh. Akxni Potifar chalh kxchik, xpuskat akgskgawilh, wanilh pi José wi tuku nitlan xtlawaninit. Potifar lu sitsilh chu tamaknulh kpulachin. Pero Jehová lakapastakli José.

Akxni José xtanuma kpulachin, faraón, mapakgsina xalak Egipto, limanixnalh tuku nitiku xʼakgatekgsa. Chu chatum kskujni faraón wanilh pi José tlan xwanilh tuku xkilhchanima. Wa xlakata faraón wa pi tunkun xliminika José.

Faraón kgalhskilh: “¿Tlan xkiwani tuku kilhchanima kintamanixni?”. José kgalhtilh: “Naʼanan lhuwa liwat kʼEgipto akgtujun kata, chu alistalh akgtujun kata naʼanan tatsinksni. Kalaksakti tiku xaskgalala xlakata namastokga liwat chu latamanin ni nalakgnikgo tatsinksni”. Faraón wanilh: “¡Wix klaksakan! Wix xlichatiy nawana tiku tlakg nakgalhi limapakgsin kʼEgipto”. Pero ¿tuku xlakata José katsilh tuku xkilhchanima xtamanixni faraón? Xlakata Jehová makgtayalh.

José akgtujun kata mastokgli liwat. Alistalh, analh tatsinksni xlikalanka katiyatni chuna la xla xwanit, chu xminkgo makgtamawakgo liwat latamanin xalak lhuwa kachikinin. Xtlat, Jacob, katsilh pi xʼanan liwat kʼEgipto chu wa xlakata kamalakgachalh kgalhkaw xkamanan xlakata na xtamawakgolh liwat.

Xkamanan Jacob lakgankgolh José, tiku tunkun kalakgapasli. Pero xnatalan ni lakgapaskgolh. Takilhputanikgolh José, chuna la xmanixnanit akxni kgawasaku xwanit. José xkatsiputun komo chuntiyaku ni xʼakxilhputunkgo, wa xlakata kawanilh: “Wixin skgalananin chu tanitantit akxilhatit komo kinkachikinkan ni tliwakga”. Xlakan kgalhtinankgolh: “¡Ni skgalananin akinin! Akinin xalak Canaán. Kinkgalhakutiykan xakwanitaw. Chatum nilha chu tlakg xaʼaktsujku tawilacha kintlatkan”. José kawanilh: “Kakilaliminiw xaʼaktsujku mintalakan chu nakkakanajlaniyan”. Wa xlakata taspitparakgolh kxchik xtlatkan.

Akxni xfamilia Jacob nialh kgalhiparakgolh tuku nawakgo, xla kamalakgachapa xkamanan anta kʼEgipto. Uma kilhtamaku linkgolh Benjamín, xaʼaktsujku xtalakan. Xlakata xkaliʼakxilhputun xnatalan, José mujulh kxkuxtalh Benjamín xcopa xla plata chu kawanilh pi xkgalhankgonit. Akxni kskujnin José tekgskgolh kxkuxtalh Benjamín, xnatalan nila xkanajlakgo. Tasaskinikgolh José pi xlakan xkamalakgaxokgelh pero nitu xtlawanika Benjamín.

Chuna José katsilh pi xnatalan xtalakgpalikgonit. Nialh tayanilh, tsukulh tasa chu wa: “Akit José, mintalakan. ¿Lamajku kintlat?”. Xnatalan nila xkanajlakgo. José kawanilh: “Nitu kapuwantit xlakata tuku kintlawanitit. Dios kilimilh unu xlakata nakkalakgmaxtuyan. Pero, ¡lakapala!, kalitantit kintlat”.

Xnatalan José lakgankgolh xtlatkan xlakata xmaxkikgolh xatlan tamakatsin chu xlinkgolh kʼEgipto. Amakgtum José chu xtlat akxtum tawilaparakgolh maski xtitaxtunita akglhuwata kata.