Kincanalkan xla televisión chan niku internet ni chan

Akgatunu papaʼ xatapaxuwan kgalhkgalhiyaw programas chu videos nema kawilikan kJW Broadcasting chu lu kinkamatliwakglhkgoyan. Pero lhuwa kinatalankan xalak África nila akxilhkgo kʼinternet. ¿Tuku xlakata?

Lu tuwa kgalhikan internet kʼÁfrica. Chu anta niku anan internet, lu lakatsuku skujka o lu tapalaxla. Akgtum liʼakxilhtit, makgtum, chatum superintendente de circuito xalak Madagascar maktilh kʼakgtum cibercafé programa xla akgatunu papaʼ xla JW Broadcasting chu talakaskilh naxokgo 16 dólares.a Uma lhuwa tumin nipara wa tuku lhajakgo latamanin kʼakgtum semana.

Maski chuna, millones latamanin anta kʼÁfrica la uku tlan lipaxuwakgo JW Broadcasting maski ni kgalhikgo internet. ¿La tlawakgo?

Lata kkata 2017, tiku lamakgolh kʼÁfrica subsahariana tlan akxilhkgo JW Broadcasting kʼakgtum canal xla televisión xla satélite. Uma canal ni taxokgo chu tamatitaxti tantaku chu tantaskaka 7 kilhtamaku xla semana k16 tachuwin.

Xlakata chuna natlawakgo, xtatayananin Jehová rentarlikgo akgtum canal xla televisión xlakata namatitaxtikgo programas. Señal xla satélite chan max 35 países xalak África subsahariana, chu liwaka 12,000 dólares xokgokan akgatunu papaʼ. Min kilhtamaku, liwaka xokgokan xlakata namatitaxtikan kʼatanu canal taʼakgchuwin nema mastamaka ama kilhtamaku. Xlakata uma, lhuwa mil latamanin tlan akxilhkgo asambleas regionales chu xlakaskinka programas nema matitaxtikan akxni chatum representante xalak central mundial lakgapaxialhnan sucursal.

Lhuwa latamanin, tiku xtatayananin Jehová chu tiku ni, akxilhkgo uma canal anta kxtelevisioneskan. Pero lhuwa natalan ni kaʼakchani xlakata natamawakgo xtelevisioneskan. Wa xlakata, kawilikanit equipos nema makglhtinankgo señal xla satélite max k3,670 Pukgalhtawakga xla xtatayananin Jehová. Xlakata uma, natalan tlan akxilhkgo anta JW Broadcasting. Putum uma max 70 dólares xtapalh komo kPukgalhtawakga wija televisión o akgtum proyector. Komo ni kgalhi televisión o proyector, max 530 dólares kitaxtu.

Natalan lu paxtikatsininankgo xlakata uma canal. Chatum kgolotsin xalak Camerún wan: «Xpalakata kifamilia, uma litaxtu xtachuna la maná kxlakitat xakaskakni tiyat». Odebode, chatum tala xalak Nigeria, wan: «Putum familia makxtum klayaw xlakata makgtutu akgatunu semana nakakxilhaw uma canal. Kilakkamanan ankgalhin lakaskinkgo kachalha uma kilhtamaku. Asta atanu kilhtamaku, kinkaskinikgoyan kakkawiliniw uma canal». Rose, tiku na xalak Nigeria, kinkawaniyan: «¡Lu kpaxuwa! Xapulana lu xakakxilha noticias, pero la uku klakgati kakxilha canal JW. Akxni xakakxilha noticias, lakapala xaksitsi chu xtaliwaka kimpresión. Pero canal JW lu tlan tuku lichuwinan chu tlan kimamakgkatsini... Wa canal nema tlakg klakgati. Akgtum xtasikulunalin Jehová litaxtu».

Chatum superintendente de circuito xalak Mozambique kinkawaniyan pi anta kcircuito kawilikanit kPukgalhtawakga equipos xlakata namakglhtinankgo señal xla satélite chu naʼakxilhkgo canal JW. Natalan chankgo kPukgalhtawakga akgtum hora o liwaka akxni nina tsuku xtamakxtumitkan xlakata naʼakxilhkgo JW Broadcasting.

Akxni xtlawamaka asamblea internacional xla kata 2019 kJohannesburgo (Sudáfrica), limaklakaskinka uma canal xlakata namatitaxtikan kʼakgnajatsa kachikinin tlakg laklanka ta’akgchuwin, chuna la tuku matitaxtikgolh chatum kgolotsin tiku makgpulalinan. Sphumelele, tiku makgtayanan kDepartamento Local de Broadcasting ksucursal xalak Sudáfrica, wan: «Xapulana xakmatitaxtiyaw taʼakgchuwin kʼinternet. Xlakata tlan chuna xaktlawaw, xakmaklakaskinaw akgtum lu tlan internet chu xtalakaskin xaktamawaw datos. Tlakg ni tapalaxla chu tlakg tlan kitaxtulh xlakata kmatitaxtiw umakgolh programas kcanal xla televisión».

Xlakata xatapaxuwan mastayatit mintuminkan, la uku natalan xalak África tlan akxilhkgo JW Broadcasting kcanal xla televisión. Lu kkapaxtikatsiniyan chuna la tanu tanu xatapaxuwan mastayatit mintuminkan chuna la wan donate.jw.org.