KAMANAN KGALHSKININANKGO

¿Lu xlakaskinka nalakgapaskana kredes sociales?

Chatum tsumat tiku wanikan Elaine wa: «Akxni kakxilhli pi kincompañeros xalak escuela lhuwa tiku xakxilhkgo tuku xmawakakgo kredes sociales, klakpuwa: “¡Guau, lu lakgapaskan!”. Xlikana pi akxni kakxilhli klakgsitsilh tsinu».

¿Minit kilhtamaku chuna makgkatsinita? Komo chuna, uma artículo tlan namakgtayayan ni lu nalilakgaputsaya xlakata lu nalakgapasputunkana kredes sociales.

¿Tuku nitlan katikitaxtulh?

Anta kProverbios 22:1 wan pi «tlakg tlan akgtum xatlan tukuwani nixawa nakgalhikan lhuwa tuku xtapalh». Ni akgtum talakgalhin nalakaskina pi tlan kalichuwinankanti chu tlan nalikatsinikgoyan amakgapitsin.

Pero namin kilhtamaku ni lu katipaxuwa komo amakgapitsin ni lu nalakgapaskgoyan. ¿Nitlan uma? Onya, tiku kgalhi 16 kata, lakpuwan pi chuna:

«Kakxilhnit tuku lu nitlan tlawakgo amakgapitsin kaj xlakata lu nakalakgapaskan, chuna la lhkgen naminkgoyacha xlikilhmaktiy xpiso akgtum escuela».

Xlakata lakaskinkgo pi kakalakgapaska, makgapitsi grabarlikgo tuku lu kalipekua chu mawakakgo kʼInternet. Akgtum liʼakxilhtit, makgapitsi lakgkgawasan mawakakgolh kʼInternet niku xtasiya la xwamakgo xastapuku lichakgan, nema kgalhi tuku nitlan tlawani kimaknikan. ¡Niti chuna xlitlawat!

Biblia wan: «Nitu katlawatit kaj xlakata [...] natlankajwananatit» (Filipenses 2:3).

Kalilakpuwanti uma:

¿Lu xlakaskinka akxilha wix nalakgapaskan kredes sociales?
¿Katuwa nawiliya milatamat kaj xlakata amakgapitsin nalakgapaskgoyan chu namakgamakglhtinankgoyan?

Tuku wankgo amakgapitsi kamanan

«Lu nitlan tuku kitaxtu komo kaxatukawa tuku natlawaya xlakata lu nalakgapaskana. Makgapitsi tanu la chuwinankgo, tanu la lhakganankgo o tanu la likatsikgo akxni maklakaskinkgo redes sociales xlakata lu nakalakgapaskan. Nitlan katimakgkatsi komo natlawaya tuku nitlan kaj xlakata lakaskina lu nalakgapaskana» (Leianna).

«Lakaskinkgo pi kalakpuwanti pi lu kalakgapaskan»

Xlikana, ni putum tlawakgo tuku kalipekua wili xlatamatkan kaj xlakata nakalakgapaskan. Erika, tiku kgalhi 22 kata, lichuwinan tuku tlawakgo amakgapitsin:

«Makgapitsi putum kilhtamaku mawakakgo fotos niku tasiya tuku tlawakgo, chuna limasiyaputunkgo pi kgalhikgo lhuwa amigos chu pi putum kilhtamaku wi tuku akxtum tlawakgo. Lakaskinkgo kalakpuwanti pi xlakan lu kalakgapaskan».

Cara, tiku kgalhi 15 kata, wan pi amakgapitsi wi tuku tlawanikgo xfotoskan xlakata nakaʼakgskgawikgo amakgapitsin:

«Wi tiku kaxtlawa xfoto xlakata natasiya pi anit kfiesta, pero wa tuku xaxlikana wa pi anta kxchik wi».

Matthew, tiku kgalhi 22 kata, wan pi minit kilhtamaku wi tuku xtachuna tlawanit:

«Kmawakalh akgtum foto niku xtasiya pi kkilalh kmonte Everest, maski nikxni kkilanit kʼAsia».

Biblia wan: «Xlakata akgstitum klatamaputunaw putum kilhtamaku» (Hebreos 13:18).

Kalilakpuwanti uma:

¿Minit kilhtamaku wi tuku mawakanita kredes sociales kaj xlakata lu nalakgapaskana?
¿Limasiya mifotos chu tuku tsokgwiliya anta tiku xlikana wix chu tuku tlakg xlakaskinka akxilha?

Tuku wankgo amakgapitsi kamanan

«Makgapitsi kaxatukawa tuku tlawakgo xlakata nakawanikan «klakgati» tuku mawakakgo kredes sociales. ¿Pero tuku tlakg lakgatiya: pi nalilakgapaskana pi litlankajwanana tuku kgalhiya, nitlan kgalhchuwinana, nitlan lhakganana, o nalilakgapaskana xatlan mintayat chu pi xlikana kalilakgaputsaya amakgapitsin? Kimputumkan lakgatiyaw pi amakgapitsin tlan nakinkaʼakxilhkgoyan, pero liwana kaʼakxilhti pi chuna tlawakgo xlakata tlawapat tuku tlan» (Hannah).

¿Lu xlakaskinka nastalanikgo tuku mawakaya kredes sociales chu nawankgo pi «lakgatikgo»?

Lhuwa lakpuwankgo pi xlakata lu nalakgapaskana anta kʼInternet talakaskin lhuwa tiku nastalanikgo tuku mawakakgo chu nawankgo pi «lakgatikgo». Matthew, tiku lichuwinawa, wan pi nachuna xlakpuwan:

«Xakkagalhskin amakgapitsi. “¿Lhuwa tiku stalanikgo tuku mawakaya?” o “¿La xlilhuwa wankgonit pi lakgatikgo tuku mawakaya?”. Xlakata xakmalhuwilh tiku nakistalanikgo xakkastalani tiku ni xakkalakgapasa xlakata na xkistalanikgolh. Tsinu tsinu tlakg taliwakalh la xaklakaskin pi xkilakgapaska, chu redes sociales tlawalh pi nila xaklakgmakgalh uma tapuwan».

Makgapitsi dibujos: 1. Chatum tsumat lakalitsin akxni akxilhma la xlilhuwa latamanin wankgo pi lakgatikgo tuku mawakanit kʼInternet. 2. Watiya uma tsumat wama akgtum chocolate niku tajumakgolh dulces. 3. Uma tsumat pachipamaka xlakata nitlan makgkatsi. — Nalakgapaskana kredes sociales xtachuna la liwat nema ni makgtayanan: max xapulana nalakgatiya pero ni katimakgtayan.

María, tiku kgalhi 25 kata, wan pi lhuwa lakpuwankgo pi lu xlakaskinka litaxtukgo komo lhuwa tiku kastalanikgo chu wankgo pi «lakgatikgo» tuku mawakakgo.

«Komo chatum tsumat namaxtu akgtum selfie chu ni lakgatikan tuku mawakalh: lakpuwan pi xla lixkajnit tasiya. Uma ni xlikana, pero lhuwa tiku max nachuna nalakpuwankgo. Tlan nawanaw pi xʼakstukan nitlan tuku katlawanimaka».

Biblia wan: «Ni lankajwa kakinkamakgkatsikan, ni kamalakatsukiw pi nalatlajaputunaw, ni nalalakgkatsalakaniyaw chatunu chatunu» (Gálatas 5:26).

Kalilakpuwanti uma:

Akxni maklakaskina redes sociales, ¿akxilha pi katatalakxtupiya amakgapitsin?
¿Tlakg lilakgaputsaya tiku nastalanikgoyan kredes sociales nixawa nakgalhiya amigos tiku xlikana nalilakgaputsakgoyan?

Tuku wankgo amakgapitsi kamanan

«Xlakata lu nalakgapaskana kredes sociales, talakaskin nalitaxtuya tiku amakgapitsin lu xlakaskinka akxilhkgo. Chu uma wamputun nalikatsiya chuna la xlakan likatsikgo. Uma max natlawa pi lu kuenta natlawaya tuku wankgo amakgapitsin mimpalakata chu la natlawaya xlakata xlakaskinka naʼakxilhkgoyan. Kimputumkan lakaskinaw pi amakgapitsin tlan kakinkamakgamakglhtinankgon, pero max nila katitamakxtu kmintapuwan chuna la lakaskina pi kalakgapaskanti» (Joshua).

Ni kuenta katlawani tiku kaj wan pi taktuju

¿Akxilhnita pi makgapitsi latamanin akxni wi tuku litlankajwanankgo kaj limasiyakgo pi wi tuku ni lakgatikgo?

«Lu klakgachanilha la kiskinikgo pi kakkamapaxialhnilh kxasasti kimputlaw».
«Ni klakgati pi putum latamanin nakiwanikgo laktlan tachuwin xlakata klitaktalh».

Tiku chuna wan limasiyama pi taktuju, pero kaj tlankajwanama.

¡Kuenta katlawa! Akxni tiku chuna tlankajwanan, ankgalhin nitlan kitaxtu, xlakata amakgapitsi akxilhkgo tuku lakaskin. Xlakata kaj akgtum taʼakgsanin, latamanin tlakg lisitsikgo tiku chuna litlankajwanankgo nixawa tiku kalakaniya tlankajwanankgo.

Akxni wi tuku nawana o namawakaya akgtum foto kredes sociales kuenta katlawa ni kaj nalimasiyaputuna pi taktujuya. Kastalani uma xtastakyaw Biblia: «Atanu tiku kamalankin, ni miʼakstu kamalankika» (Proverbios 27:2).