Lilakgaputsakan tumin

Chatum chixku tiku tamakgaxtokgnit chu kgalhi chatiy kamanan wanikan Paul wan: «Akxni tsukulh taliwakanan kkimpaís, nialh lu analh liwat chu lu tapalaxlakgolh. Makglhuwa, akxni akglhuwa hora xakformarlayaw xlakata naktamawananaw, akxni xkinkalakgchanan nialhtu xʼanan. Latamanin xtalikatalakgo ktiji xlakata ni xkgalhikgo tuku xwakgo chu lipekua skakkgolh. Lakapala taliwakakgolh tuku tlakg xtamaklakaskin chu lhuwa millón xtapalh xwankgonit, alistalh tlakg taliwakalh; asta akxni nialhtu litaxtulh tumin. Kmakgatsankgalh putum tuku xakkgalhi kbanco, chu tuku xakmakinit xlakata seguro chu kintatlaja.»

Paul xkatsi pi wi tuku xlitlawat xwanit xlakata nitu xkaʼakgspulalh xfamilia (Proverbios 3:21). Xla wan: «Liwana xakkatsini kaxtlawa luz. Pero xakama makglhtinan taskujut nema xkimaxkika, maski ni lhuwa xkixokgonika. Makgapitsi xkilixokgonikgo liwat o tuku maklakaskinkan kchiki. Akgtum liʼakxilhtit, komo xkimaxkikan akgtati lichakgan, akgtiy xaksta chu akgtiy xkintamakgxtakgni. Tsinu tsinu, kgalhilh 40 laktsu xtilan chu kkamakgastakli. Akxni stakkgolh, kkastalh chu ktamawapa 300. Alistalh klakgpalilh; kmastalh 50 xtilan chu kimaxkika kgetiy kuxtalh xataswakga kuxi chu kgetunu xtsinkan 50 kilos. Uma lhuwa kilhtamaku kimakgtayalh xlakata tlan xakkalimawilh kifamilia chu amakgapitsi familias».

Paul xkatsi pi tuku tlakg tlan xtlawalh wa xlipawa Dios. Dios kinkamakgtayayan akxni kgalhakgaxmataw. Jesucristo wa pi ni lu nalilakgaputsayaw akxni naputsayaw tuku maklakaskinaw kkilatamatkan. Xla liwana wa: «Katsiy mintlatkan mpi katsankganiyan xlipaks yuma nkatuwaj» (Lucas 12:29-31).

Lu nitlan, Satanás tiku tlakg xalanka xtalatlawana Dios, atsinu ni putum latamanin xalak katiyatni kamalakpuwani pi tuku tlakg xlakaskinka kxlatamatkan wa pi lhuwa tuku nakgalhikgo. Latamanin lu lilakgaputsakgo xlakata nakgalhikgo tuku maklakaskinkgo, maski xaxlikana o ni xaxlikana, chu lhuwa tuku limakgxtakgkgo xlakata nakgalhikgo tuku ni maklakaskinkgo. Asta lhuwa latamanin pawanankgo chu katsinikgo pi «tiku sakwanan kskujni litaxtu tiku masakwanilh» (Proverbios 22:7).

Makgapitsi nitlan tuku laksakkgo. Paul wan: «Lhuwa tiku kkalakgapasa makgxtakgkgolh xfamilias chu xʼamigos xlakata ankgolh kʼatanu país xlakata xputsamakgo “tlakg tlan natawilakgo”. Xlakata makgapitsi ni xkgalhikgo xkapsnatkan, ni kamaxkika taskujut. Lakgachunin xkatatsekgnikgo policías o kkatijin klhtatakgo. Ni maxkikgolh talakaskin Dios pi xkamakgtayalh. Pero, akinin klakpuwaw pi xlakata xtamakgtay Dios tlan akxtum xakpuntaxtuw tuku nitlan xlama».

XTASTAKYAW JESUCRISTO

Paul chuntiya lichuwinan tuku titaxtulh: «Jesús wa: “ni tilakapastakatit wa ntu xala lichali; sampi wa nchali, tanuja kilhtamaku. Antiya katamaktalh nchu nkilhtamaku ntu nkinkamakglitwaniyan”. Wa xlakata chali chali chuna xakskini Dios: xkinkamaxkin liwat xla akgatunu kilhtamaku. Chuna la wa Jesús, Dios makgantaxtilh tuku xmalaknunit. Xlikana, ni putum kilhtamaku xakkgalhiyaw tuku tlakg xaklakgatiyaw. Akgtum kilhtamaku na xakmakgformarlanit pero ni xakkatsi tuku kstamaka. Akxni kilakgchalh kakxilhli pi yogur kstamaka. Chu nipara tsinu xaklakgati yogur. Pero tlan xwakan chu wa tuku kwaw kakgotanun. Lu kpaxtikatsini Dios pi kifamilia nikxni kaj pachuna ankgolh lhtatakgo».a

»La uku tlakg tlan kwilaw. Xlakata tuku ktitaxtuw, kkatsinitaw pi ni lu ktililakgaputsaw komo naklipawanaw Jehová.b Komo natlawayaw xtalakaskin, putum kilhtamaku nakinkamakgtayayan. Kakxilhnitaw pi xlikana tuku wan Salmo 34:8: “Kalikxilhtit xlakata nakatsiyatit la ixlitlan katsi Kintikukan, lipaxaw lama ti wa lipawan”. Wa xlakata, nialhtu kpuwanaw maski xaktitaxtuparaw chuna la ktitaxtuw.

»Tuku maklakaskinkgo latamanin xlakata tlan nalatamakgo ni wa taskujut chu nipara tumin, wata wa liwat. Wa xlakata, klakaskinaw pi kachilh kilhtamaku akxni nakgantaxtu uma tachuwin: “Kan aktsu lichanat nachankan y likwanit nalhuwan nak katiyatni”. Xlakata nina a chin uma kilhtamaku, naklipaxuwayaw xlakata kkgalhiyaw liwat chu lhakgat. Biblia na kinkawaniyan: “Ni tilakgpaxkiyatit xman wa ntumin, kapaxuwanalipitit wa ntu nkgalhiyatit, sampi watiya Dios ntiwaj: «Ni lhtuj kaktimakgaxtakgni, na ni kaktimakgaxtakgni»”.c Uma tamalaknun lu kinkamatliwakglhan».

Talakaskin lhuwa takanajla xlakata namastayaw talakaskin pi Dios nakinkapulalinan chuna la tlawakgolh Paul chu xfamilia (Génesis 6:9). Maski la uku o kkilhtamaku nema aku mima ni nakgalhiyaw tuku namaklakaskinaw, lhuwa tuku kinkamasiyaniyan xliʼakxilhtit Paul chu tuku tlawalh.

Pero ¿komo wa tuku lilakgaputsayaw wa taʼakglhuwit xla familia?