TAKGALHTAWAKGA 49
¿La tlan xatapaxuwan natawila mifamilia? (Pulaktum)
Tiku aku tamakgaxtokgkgonit kgalhkgalhikgo pi tapaxuwan nema makgkatsikgolh akxni tamakgaxtokgkgolh putum kilhtamaku kamakgapalalh. Chu uma tapaxuwan tlan putum kilhtamaku namakgapala. Kstalaninanin Cristo tiku lhuwata kata makgaxtokgkgo liwana katsikgo pi chuna chu lu liskujkgonit natlawakgo xtastakyaw Biblia.
1. ¿Tuku tastakyaw kamaxki Biblia lakchixkuwin?
Jehová liyawalh chixku xʼakgxakga familia nalitaxtu (kalikgalhtawakga Efesios 5:23). Chu xla lakaskin pi tuku nalaksaka xachixku nalitamakgtaya putum xfamilia. Biblia kamaxki uma tastakyaw lakchixkuwin: «Chuntiya kakapaxkitit mimpuskatkan» (Efesios 5:25). Uma wamputun pi chixku tiku paxki xpuskat, tlan likatsini akxni wi kxlakatinkan amakgapitsin chu akxni xʼakstukan wilakgolh. Nachuna, makgtakgalha chu lu liskuja xlakata namaxki tuku maklakaskin kxlatamat chu tlan mamakgkatsini (1 Timoteo 5:8). Chu tuku tlakg xlakaskinka, makgtaya xlakata namatliwakglha xtakanajla (Mateo 4:4). Akgtum liʼakxilhtit, tlan akxtum natlawakgo oración chu nalikgalhtawakgakgo Biblia. Komo xachixku nalimasiyani tapaxkit xpuskat, tlakg tlan natalalin Jehová (kalikgalhtawakga 1 Pedro 3:7).
2. ¿Tuku tastakyaw kamaxki Biblia lakpuskatin?
Xtachuwin Dios wan pi puskat «lu xlimaxkit kakni xchixku» (Efesios 5:33). ¿La tlan chuna natlawa? Nalilakpuwan xatlan tayat nema kgalhi xchixku chu pi lu liskuja namakgtakgalha xfamilia. Na xlimaxkit kakni xchixku akxni wi tuku nalaksaka, tlan nalikatsini akxni natachuwinan chu tlan nalichuwinan xchixku akxni wi kxlakatin amakgapitsin. Chuna xlitlawat maski xchixku ni watiya takanajla kgalhi.
3. ¿La tlan namatliwakglhkan tamakgaxtokgat?
Biblia kawani tiku makgaxtokgkgo pi «xchatiykan akgtum makni nalitaxtukgo» (Mateo 19:5). Uma kilhchanima pi ni namastakgo talakaskin pi wi tuku natlawa nalatamakgatlinikgo. Wa xlakata limaxtukgo kilhtamaku akxtum natawilakgo. Chu akxni nalawanikgo tuku lakpuwankgo chu tuku makgkatsikgo, nalalimasiyanikgo tapaxkit. Nachuna, ni mastakgo talakaskin pi wi tuku o wi tiku tlakg xlakaskinka nalitaxtu kxlatamatkan, kajwatiya Jehová chu tiku tamakgaxtokgkgo. Xchatiykan kuenta tlawakgo xlakata ni wa tlakg natalalinkgo tiku ni tamakgaxtokgkgo.
TLAKG KALAKPUTSANANIW
Kaʼakxilhwi makgapitsi tastakyaw xalak Biblia nema tlan namatliwakglha mintamakgaxtokgat.
4. Chixku, kapaxki chu kamakgtakgalhti mimpuskat
Biblia wan pi «lakchixkuwin xlipaxkitkan xpuskatkan chuna la akstu paxkikgo xmaknikan» (Efesios 5:28, 29). ¿Tuku kilhchanima uma? Kaʼakxilhtit VIDEO chu kalichuwinantit uma:
¿La tlan nalimasiya xachixku pi paxki chu tlan likatsini xpuskat?
Kalikgalhtawakgatit Colosenses 3:12 chu kalichuwinantit uma:
¿La tlan nalimasiya chixku umakgolh tayat kxtamakgaxtokgat?
5. Puskat, kapaxki chu kamaxki kakni minchixku
Biblia wani xapuskat pi kamaxkilh kakni xchixku maski xchixku ni skujnani Jehová. Kalikgalhtawakgatit 1 Pedro 3:1, 2 chu kalichuwinantit uma:
Komo minchixku ni kakninani Jehová, max wix lakaskina pi kakakninanilh. ¿Tlan nakitaxtu komo putum kilhtamaku nalitachuwinamputuna Dios o tlakg tlan komo tlan nalikatsiniya chu namaxkiya kakni? ¿Tuku xlakata chuna lakpuwana?
Xachixku chu xapuskat tlan wi tuku akxtum nalaksakkgo. Xlikana, max xapuskat ni putum kilhtamaku katilakgatilh tuku nalaksaka xchixku. Akxni chuna nala, xapuskat nalimasiyani kakni xchixku chu lakatsuku o lakatitum nawani tuku lakpuwan. Pero xlilakapastakat pi Jehová lakgayawanit xachixku nalaksaka tuku tlakg tlan xlakata xfamilia. Chu talakaskin pi xla natataya tuku nalaksaka xchixku. Chuna namakgtayanan xlakata xatapaxuwan natawila xfamilia. Kalikgalhtawakgatit 1 Pedro 3:3-5 chu kalichuwinantit uma:
¿La makgkatsi Jehová akxni akxilha pi puskat maxki kakni xchixku?
6. Tlan lakkaxtlawakan taʼakglhuwit nema anan ktamakgaxtokgat
Putum akinin kgalhiyaw talakgalhin. Wa xlakata xachixku chu xapuskat lu xliskujatkan xlakata nalakkaxtlawakgo xtaʼakglhuwitkan. Kaʼakxilhtit VIDEO chu kalichuwinantit uma:
¿Tuku limasiya pi uma tamakgaxtokgat nialh tlan xlatalalin?
¿Tuku tlawakgolh xlakata xmatliwakglhparakgolh xtamakgaxtokgatkan?
Kalikgalhtawakgatit 1 Corintios 10:24 chu Colosenses 3:13. Akxni likgalhtawakganitantita akgatunu texto, kalichuwinantit uma:
¿La tatliwakglha tamakgaxtokgat akxni makgantaxtikan umakgolh tastakyaw?
Biblia wan pi nalamaxkiyaw kakni kinchatunukan. Uma wamputun pi tlan nalalikatsiniyaw. Kalikgalhtawakgatit Romanos 12:10 chu kalichuwinantit uma:
¿Xlilat pi xachixku o xapuskat nakgalhkgalhi pi tiku tatamakgaxtokgnit wa tiku pulana nalimasiya kakni? ¿Tuku xlakata chuna lakpuwana?
MAKGAPITSIN WANKGO: «Nialh lu tlan klatalalinaw la xapulana, puntsu puntsu klatataʼakglhuwiyaw».
¿La tlan xkamasiyani pi Biblia tlan nakamakgtaya?
TUKU KATSINIW
Xachixku chu xapuskat tlan napaxuwakgo komo lapaxkikgo, lalimasiyanikgo kakni chu makgantaxtikgo xtastakyaw Biblia.
¿Tuku xkgalhtinanti?
¿Tuku xlitlawat xachixku xlakata xatapaxuwan natawila xtamakgaxtokgat?
¿Tuku xlitlawat xapuskat xlakata xatapaxuwan natawila xtamakgaxtokgat?
Komo wix tamakgaxtokgnitata, ¿tuku tastakyaw xalak Biblia lakpuwana pi namatliwakglha mintamakgaxtokgat?
TLAKG KAKATSINI
Kaʼakxilhti makgapitsi tastakyaw nema namakgtayayan xatapaxuwan natawila mifamilia.
Kaʼakxilhti akgtum video musical nema masiya pi akxni makgantaxtikan xtastakyaw Dios xlakata tamakgaxtokgat, limin lhuwa tasikulunalin.
Kaʼakxilhti tuku kilhchanima maxkikan kakni tuku lakgaya xachixku.
“¿Por qué debe la mujer respetar el principio de autoridad?” (La Atalaya, 15 xla mayo kata 2010)
Kaʼakxilhtit la akgtum tamakgaxtokgat tiku xlakxtlawakgonit xtamakgaxtokgatkan tlan lakkaxtlawakgolh taʼakglhuwit nema xkgalhi.
Jehová kinkamaxkiparan tapaxuwan kkintamakgaxtokgatkan (5:14)