TAKGALHTAWAKGA 56
Kamakgtayananti xlakata makxtum natawila congregación
Akxni akxtum katatawilayaw kinatalankan, nachuna makgkatsiyaw la mapakgsina David. Xla wa: «¡Kaʼakxilhtit pi lu tlan chu lu lipaxuw pi natalan makxtum wilakgolh!» (Salmo 133:1). Pero uma ni xʼakstu chuna la; talakaskin putum naliskujaw xlakata chuntiya makxtum natawilayaw.
1. ¿Tuku tlakg litalakgapasa xkachikin Dios?
Komo wix xlakgapaxialhnanti akgtum congregación kʼatanu país, max ni xʼakgatekgsti xtachuwinkan; pero tlan xmakgkatsi. ¿Tuku xlakata? Xlakata kaxanikawa niku napina naʼakxilha pi xtatayananin Jehová watiya likgalhtawakga maklakaskinaw xlakata nalikgalhtawakgayaw Biblia. Nachuna, liskujaw xlakata nalalimasiyaniyaw tapaxkit chatunu chatunu. Maski tanu tanu kachikin lamaw putum “mapakuwiputunaw Jehová” chu “akxtum kakninaniputunaw” (Sofonías 3:9; nota).
2. ¿La namakgtayanana xlakata makxtum natawila congregación?
«Lu kalapaxkitit xliputum minakujkan» (1 Pedro 1:22). ¿La tlan namakgantaxtiya uma tastakyaw? Ni kajwatiya kuenta katlawa tuku nitlan tlawakgo amakgapitsin, wata kaʼakxilhti xatlan xtayatkan. Ni kajwatiya kakatalalipi tiku lakpuwankgo chuna la wix o watiya tuku lakgatikgo. Na kaliskujti nakatalalipina tiku tanu xkilhtsukutkan o tanu xkachikinkan. Nachuna, lu kaliskujti ni nalaksakpaxkinana (kalikgalhtawakga 1 Pedro 2:17).a
3. ¿Tuku natlawaya komo wi tuku litataʼakglhuwipat chatum tala?
Xlikana pi makxtum wilaw; pero xlakata makglakgalhinanin akinin, min kilhtamaku wi tuku lalimakgalipuwanaw o latlawaniyaw tuku nitlan. Wa xlakata xTachuwin Dios kinkawaniyan: «Chuntiya […] kalatapatiputuntit. Chuna la Jehová lu katapatin wixin, nachuna wixin militlawatkan» (kalikgalhtawakga Colosenses 3:13). Akinin makglhuwa makgalipuwanaw Jehová, pero maski chuna xla kinkatapatiyan. Wa xlakata xla kinkawaniyan pi na kakatapatiw kinatalankan. Komo wix katsiya pi wi tiku nitlan mamakgkatsini, kaputsa la nalakkaxtlawaya (kalikgalhtawakga Mateo 5:23, 24).b
TLAKG KALAKPUTSANANIW
Kalilakpuwanti tuku tlan natlawaya xlakata namakgtayanana naʼanan takaksni chu makxtum natawilakan kcongregación.
¿Tuku natlawaya xlakata tlan natalalipimparaya mintala?
4. Ni kalaksakpaxkinanti
Kalimasiyaniputunaw tapaxkit putum kinatalankan. Pero max tuwa makgkatsiyaw nakatalalinaw makgapitsi, xlakata max lakpuwanaw pi ni xtachuna la akinin. ¿Tuku nakinkamakgtayayan nialh chuna namakgkatsiyaw? Kalikgalhtawakgatit Hechos 10:34, 35 chu kalichuwinantit uma:
Jehová kamakgamakglhtinan latamanin tiku tanu tanu xkilhtsukutkan xlakata xtatayananin nalitaxtukgo. ¿La tlan nastalaniya xliʼakxilhtit Jehová chu tlan nakalikatsiniya tiku tanu xkilhtsukutkan?
Anta niku wix lapat, ¿la kalikatsinikan latamanin tiku tanu xkilhtsukutkan o tanu la tasiyakgo? ¿Tuku xlakata wix nichuna militlawat?
Kalikgalhtawakgatit 2 Corintios 6:11-13 chu kalichuwinantit uma:
¿Tuku tlan natlawaya xlakata tlakg nakapaxkiya putum natalan?
5. Xatapaxuwan katapatinanti chu kalakkaxtlawa taʼakglhuwit
Maski Jehová ni maklakaskin natapatiyaw, xla xatapaxuwan kinkatapatiyan. Kalikgalhtawakgatit Salmo 86:5 chu kalichuwinantit uma:
Chuna la wan uma versículo, akxni Jehová tapatinan, ¿la tlawa?
¿Paxtikatsiniya wix pi Jehová tapatinan? ¿Tuku xlakata?
¿Tuku max xtlawalh pi nialh xkatalaliw amakgapitsin?
¿Tuku kilitlawatkan xlakata nastalaniyaw xliʼakxilhtit Jehová, chu chuntiya makxtum nakatatawilayaw kinatalankan? Kalikgalhtawakgatit Proverbios 19:11 chu kalichuwinantit uma:
¿Tuku tlan natlawaya xlakata ni nastaka taʼakglhuwit akxni wi tiku makgasitsiyan o makgalipuwanan?
Min kilhtamaku, akinin kamakgalipuwanaw amakgapitsin. Akxni chuna nala, ¿tuku kilitlawatkan? Kaʼakxilhtit VIDEO chu kalichuwinantit uma:
¿Tuku tlawalh tala nema tasiyalh kvideo xlakata xlakkaxtlawalh xtaʼakglhuwit?
6. Kaʼakxilhti xatlan tayat nema kgalhikgo minatalan
Akxni tlakg kalakgapasaw kinatalankan, ni kajwatiya akxilhaw xatlan xtayatkan, wata na akxilhaw tuku nitlan tlawakgo. ¿Tuku tlan natlawayaw xlakata wa tlakg kuenta natlawayaw xatlan xtayatkan? Kaʼakxilhtit VIDEO chu kalichuwinantit uma:
¿Tuku namakgtayayan naʼakxilha xatlan tayat nema kgalhikgo minatalan?
Jehová tlakg kuenta tlawa xatlan kintayatkan. Kalikgalhtawakgatit 2 Crónicas 16:9a chu kalichuwinantit uma:
¿La makgkatsiya akxni akxilha pi Jehová tlakg kuenta tlawa xatlan mintayat?
Asta akgtum stlan diamante kgalhi tuku nitlan, maski chuna lu lhuwa xtapalh. Nachuna kinatalankan: maski makglakgalhinanin, lu lanka xtapalh litaxtukgo kxlakatin Jehová
MAKGAPITSIN WANKGO: «Akit ktapatinan, pero ni kpatsankga o kʼakgtsonkgswa tuku kintlawanika».
¿Tuku xlakata xatapaxuwan kilitapatitkan amakgapitsin?
TUKU KATSINIW
Komo wix katapatiya minatalan chu putum kapaxkiya, namakgtayanana makxtum natawila congregación.
¿Tuku xkgalhtinanti?
¿Tuku tlan natlawaya xlakata ni nalaksakpaxkinana?
¿Tuku natlawaya akxni natakgalhiya akgtum taʼakglhuwit chatum tala?
¿Na tapatinamputuna chuna la tapatinan Jehová? ¿Tuku xlakata?
TLAKG KAKATSINI
Jesús maklakaskilh akgtum liʼakxilhtit nema kinkamakgtayayan ni nakalakputsananiyaw amakgapitsin. Kaʼakxilhti tuku uma.
¿Talakaskin naskinaw pi kakinkatapatikan komo lakpuwanaw pi ni tlawanitaw tuku nitlan?
«Skinkan tamatsankgenanit, makgtayanan naʼanan takaksni» (Makatsinina, 1 xla noviembre kata 2002)
Kaʼakxilhti tuku kamakgtayanit makgapitsi latamanin ni nalaksakpaxkinankgo.
Ni kakaputsananiw amakgapitsin kaj xlakata la tasiyakgo (5:06)
Kaʼakxilhti la nalakkaxtlawayaw taʼakglhuwit nema katakgalhiyaw amakgapitsin xlakata ni nalakxtlawa takaksni nema anan kcongregación.