Ni xlajwanankgolh akxni analh «takgxtakgajni»

KXAPULANA Guerra nema Tatlawalh xLikalanka Kakilhtamaku, nema tsukulh kkata 1914, limasiyalh pi xLikgalhtawakgananin Biblia ni makgtanukgo tuku xalak kakilhtamaku (Is. 2:2-4; Juan 18:36; Efes. 6:12). ¿La kakitaxtunilh kskujnin Dios xalak Gran Bretaña?

Ley de Servicio Militar xla kata 1916, xwan pi lakchixkuwin tiku nina xtamakgaxtokgkgonit chu xkgalhikgo 18 asta 40 kata soldado xliwanatkan, xapulana limapakgsin nema chuna tatlawalh kʼGran Bretaña. Uma limapakgsin xmasta talakaskin pi ni xliskujli la soldado tiku xlikana «xtalakapastakni chu tuku xkanajla» ni xmaxki talakaskin. Mapakgsinanin wilikgolh tribunales xlakata xlakkaxwilikgolh tiku tlan atanu taskujut xtlawalh xlakata ni kskujli la soldado.

Ni xlimakgas, tipuxum xLikgalhtawakgananin Biblia katamaknuka kpulachin xla soldados chu kgalhtsayan katamalakgachaka soldados xalak Francia. Xlakata uma tuku nitlan tlawaka, natalan xalak Gran Bretaña malakgachanikgolh mapakgsina Herbert Asquith akgtum carta niku xwankgo pi nitlan tuku xtatlawanit chu 5,500 firmarlikgolh.

Alistalh kamakatsinika pi kgalhtsayan natalan tiku xtawilakgo soldados xalak Francia xʼamaka kamakgnikan xlakata ni makgninamputunkgolh. Pero, akxni xʼamakaja kamakgnikan, kawanika pi akgkaw kata lu tuwa taskujut xʼama tlawakgo, chu kamaspitka kʼInglaterra xlakata xmakgantaxtikgolh kpulachin tuku xkawanikanit.

Xlakata ni tunkun sputli guerra, nachuna katasanika lakchixkuwin tiku xtamakgaxtokgkgonit. Anta kManchester (Inglaterra) putsananika Henry Hudson, chatum xLikgalhtawakgana Biblia tiku makuchina xwanit. Tribunal wa pi uma tala xtlawanit tuku nitlan, maxokgonika, chu malakgachaka niku xwilakgolh soldados 3 xla agosto kata 1916. Na watiya uma kilhtamaku, kʼEdimburgo (Escocia) tlawaka akgtum taputsan xtachuna la xapulana, chu anta wanka pi James Frederick Scott, chatum colportor (la xkawanikan precursores) tiku xkgalhi 25 kata, ni xtlawanit tuku nitlan. Mapakgsinanin wankgolh pi nitlan tuku xwankanit, pero alistalh nialhtu wa xlakata tsukulh akxilha atanu nema xtatlawama kLondres xla chatum tala tiku xwanikan Herbert Kipps. Wanka pi uma tala xtlawanit tuku nitlan, maxokgonika, chu malakgachaka niku xwilakgolh soldados.

Septiembre kata 1916 xʼanan 264 natalan tiku xskinkgonit ni soldado nawankgo. Lata tiku skinkgolh 5 kamaxkika talakaskin, 154 kamalakgachaka «naskujkgo xpalakata kachikin», 23 kamalakgachaka la soldados tiku ni ankgo kʼguerra, 82 kamalakgachaka kxlakatin soldados chu makgapitsi kamalakgachaka kpulachin xlakata ni kgalhakgaxmatkgolh. Latamanin nitlan lichuwinankgolh la xkalikatsinikan umakgolh lakchixkuwin, wa xlakata mapakgsinanin katamakxtukgolh kpulachin chu kamatlawilh atanu taskujut.

Edgar Clay chu Pryce Hughes, tiku alistalh superintendente de sucursal wa kʼGran Bretaña, tiku kamaskujuka kʼakgtum represa kʼGales. Herbert Senior chatum tiku na xmaspitkanit kFrancia, linka kpulachin xalak Wakefield (Yorkshire, Inglaterra). Atanu tlawakgolh xtaskujutkan lu klixkajni pulachin xalak Dartmoor (Devon, Inglaterra), niku tlakg xʼanan tiku na xkalinkanit xlakata xtalakapastakni ni xkamaxki talakaskin soldados xlitaxtukgolh.

Frank Platt, xLikgalhtawakgana Biblia tiku kaskujnanilh soldados, tlawanika tuku nitlan xlakata ni makgninamputulh. Atkinson Padgett, tiku katsinilh tuku xaxlikana akxni aku xtatsokgtawilanit xlakata soldado xlitaxtulh, tiku pulalinkgo soldados tlawanikgolh tuku lu nitlan xlakata ni makgninamputulh.

Maski umakgolh kinatalankan ni liwana xkatsikgo tuku xkilhchani ni namakgtanukgo tuku xala kakilhtamaku, liskujkgolh xlakata xmakgapaxuwakgolh Jehová. Kstalaninanin Cristo tiku kamapakuwiyaw kʼuma artículo mastakgolh lu xatlan liʼakxilhtit xlakata ni makgtanukgolh tuku xalak kakilhtamaku akxni xʼanan «takgxtakgajni», o tuwa kilhtamaku (Apoc. 3:10, Xasasti Talaccaxlan, [Papantla]). (Tuku xala makgasa kʼGran Bretaña.)