Nialh katiʼanalh guerras chu tatalachipat

DIOS NAKAMASPUTU XTAMAPAKGSINKAN LATAMANIN

Dios nalimin akgtum guerra nema Biblia limapakuwi Armagedón. Anta nakamalakgsputu putum xtamapakgsinkan latamanin (Apocalipsis 16:16).a Akxni nachin uma kilhtamaku, «mapakgsinanin kxliputum katiyatni» nakamamakxtumikan xlakata natalatlawanankgo «kʼguerra nema natlawakan klanka xkilhtamaku Dios» tiku kgalhi putum litliwakga (Apocalipsis 16:14). Dios namasputu putum guerras kʼArmagedón.

Akxni Dios nakamalakgsputu xtamapakgsinkan latamanin, xTamapakgsin natsuku mapakgsinan kKatiyatni. Uma Tamapakgsin namapakgsinanacha lata kʼakgapun, chu nikxni katimalakgsputuka (Daniel 2:44). Dios laksakli xKgawasa, Jesucristo, xlakata wa namapakgsinan (Isaías 9:​6, 7; Mateo 28:18). Watiya uma Tamapakgsinb nema Jesús kamasiyanilh xtamakgalhtawakgen pi kskinkgolh kxʼoracioneskan (Mateo 6:​9, 10). Kajwatiya akgtum Tamapakgsin nakamapakgsi putum latamanin, chu tiku nakapulalin wa Jesús.

Jesús nichuna likatsi la mapakgsinanin xalak kakilhtamaku. Xla nalimaklakaskin xlitliwakga xlakata nakalimakgtaya putum latamanin. Xlakata xla xaʼakgstitum Mapakgsina chu ni laksakpaxkinan, latamanin nialh katililakgaputsakgolh pi nitlan katikalikatsinika xlakata tanu tanu xkilhtsukutkan, xkachikinkan o xlakata xcolorkan (Isaías 11:​3, 4). Chu latamanin nialh katitaʼakglhuwikgolh xlakata Jesús nakalilakgaputsa xchatunukan. «Xla nalakgmaxtu limaxkgen tiku tasaskima tamakgtay, tiku nitu kgalhi chu putum tiku ni kgalhi tiku tlan namakgtaya. [...] Nakalakgmaxtu xlakata nialh nakamakgapatinankan chu nialh nakatlawanikan tuku nitlan» (Salmo 72:​12-14, TNM).

Xtamapakgsin Dios namalakgsputu putum tuku limakgninankan (Miqueas 4:3). Nachuna, nakamalakgsputu putum latamanin tiku lakgatikgo talachipanankgo o katlawanikgo tuku nitlan amakgapitsin (Salmo 37:​9, 10). Lakchixkuwin, lakpuskatin chu laktsu kamanan, nialhtu katilipekuankgolh kaxanikawa niku naʼankgo (Ezequiel 34:28).

Akxni namapakgsinan Dios unu kKatiyatni, putum latamanin napaxuwakgo. Nialh katiʼanalh talimaxkget, tatsinkstat chu putum nakgalhikgo niku natawilakgo. Ankgalhin naʼanan lhuwa liwat, chu kaxanikawa niku natawilakgo, napaxuwakgo (Salmo 72:16; Isaías 65:​21-23).

La uku lhuwa latamanin wi tuku katsankgani kxmaknikan xlakata nitlan tuku kaʼakgspulalh kʼguerra. Amakgapitsi nila patsankgakgo tuku akxilhkgolh o tuku kaʼakgspulalh, chu uma lu kamalakgaputsi. Pero akxni namapakgsinan xTamapakgsin Dios kKatiyatni, nialh chuna katimakgkatsikgolh chu xatakgatsin nakgalhiparakgo xmaknikan. Chu tiku nikgonit, nakamalakastakwanikan xlakata tlan nalatamaparakgo kKatiyatni (Isaías 25:8; 26:19; 35:​5, 6). Familias tlan akxtum natawilaparakgo chu nialh katilakapastakkgolh tuku katlawanilh guerra makgasa (Apocalipsis 21:4).

DIOS NAMALAKGSPUTU TALAKGALHIN

Xtamapakgsin Dios natlawa pi putum latamanin kajwatiya nakakninanikgo Jehová,c «Dios tiku paxkinan» chu tiku «masta takaksni» (2 Corintios 13:11). Latamanin nialh katilatalatlawakgolh (Isaías 2:​3, 4; 11:9). Tiku nakgalhakgaxmatkgo Dios, nialh katikgalhikgolh talakgalhin (Romanos 8:​20, 21).

DIOS NAKAMASPUTU SATANÁS CHU XDEMONIOS

Xtamapakgsin Dios nakamasputu Satanás chu xdemonios, chu nialh katikamapuntanikgolh o nialh katitlawakgolh pi latamanin namatsukikgo guerras (Apocalipsis 20:​1-3, 10). Xlakata nialh katitawilakgolh, naʼanan lhuwa takaksni (Salmo 72:7).

Liwana kakatsi pi Dios namasputu guerras chu tatalachipat, xlakata xla tlan chuna natlawa chu chuna tlawaputun.

• Dios kgalhi litliwakga xlakata namasputu guerra chu tatalachipat, chu liwana katsi la chuna natlawa (Job 9:4). Ni anan tuku xla nila tlawa (Job 42:2).

• Dios nipara tsinu lakgati akxni akxilha pi latamanin patinamakgo (Isaías 63:9). Chu «ni akxilhputun tiku lakgati tatalachipat» (Salmo 11:​5, TNM).

• Dios ankgalhin makgantaxti putum tuku malaknu chu xla nila akgsaninan (Isaías 55:​10, 11; Tito 1:2).