Kamakgtaya tiku makgalhtawakgepat naskujnani Jehová

1, 2. 1) ¿Tuku xlakata makgapitsi tiku kalimakgalhtawakgemaw Biblia tuwa makgkatsikgo naskujnanikgo Jehová? 2) ¿Tuku naʼakxilhaw kʼuma artículo?

AKXNI xlilakpuwampat komo xtatayana Jehová xlitaxtu, ¿tuku tuwa makgkatsi? Max xpekuana akxni xlilakpuwana pi tiku kataskuja, miʼamigos o asta tiku xalak mifamilia xʼamakgon sitsinikgoyan. O max xlakpuwana pi nikxni liwana xpimpat makgantaxtiya tuku skin Dios. Komo chuna makgkatsi, tlakg liwana naʼakgatekgsa tuku xlakata makgapitsi tiku kalimakgalhtawakgepat Biblia nina laksakkgo xtatayananin Jehová nalitaxtukgo.

² Jesús liwana xkatsi pi uma tuku lakpuwankgo latamanin tlan xkamalakgachokgolh ni naskujnanikgo Jehová (Mat. 13:​20-22). Pero chuntiya kamakgtayalh xtamakgalhtawakgen maski xlakan ni liwana xkatsikgo komo tlan kstalaninanin xlitaxtukgolh. Komo nastalaniyaw xliʼakxilhtit Jesús, tlan nakamakgtayayaw tiku kalimakgalhtawakgemaw Biblia: 1) naʼakxilhkgo tuku kamalakgchokgoma naskujnanikgo Jehová, 2) tlakg napaxkikgo Jehová, 3) pulana nawilikgo Jehová kxlatamatkan chu 4) nakatsikgo tuku natlawakgo akxni natitaxtukgo tuku tuwa. ¿La tlan nastalaniyaw xliʼakxilhtit Jesús? ¿Chu la tlan namaklakaskinaw libro Kalipaxuwa latamat xlakata nakamakgtayayaw tiku kamakgalhtawakgemaw xtatayananin Jehová nalitaxtukgo?

KAMAKGTAYA NAKATSI TUKU MALAKGACHOKGOMA NASKUJNANI JEHOVÁ

3. ¿Tuku xmalakgachokgoma Nicodemo xlakata kstalanina Jesús xlitaxtulh?

³ Nicodemo chatum xmapakgsinakan judíos xwanit. Uma chixku wi tuku xmalakgachokgoma xlakata kstalanina Jesús xlitaxtulh. Max kajku akgchaxan papaʼ xtitaxtunit lata Jesús xtsukunit lichuwinan Dios, Nicodemo xkatsiya pi Jesús wa Mesías xwanit (Juan 3:​1, 2). Maski chuna, kaj xatsekg tachuwinalh Jesús xlakata “xkapekuani judíos” (Juan 7:13; 12:42). Max lilakpuwa pi lhuwa tuku xʼama makgatsankga komo kstalanina Jesús xlitaxtulh.a

4. ¿La makgtayalh Jesús Nicodemo?

⁴ Nicodemo liwana xlakgapasa xLimapakgsin Moisés, pero xmaklakaskin pi wi tiku xmakgtayalh liwana naʼakgatekgsa tuku xlakaskin Jehová pi xtlawalh. ¿La makgtayalh Jesús? Limaxtunilh kilhtamaku. Maski katsisata xwanit, xla tachuwinalh. Na liwana wanilh tuku xlitlawat xwanit xlakata kstalanina xlitaxtulh: xtalakaskin xlakgmakgalh xtalakgalhin, xtamunulh chu xlimasiyalh pi xkanajlani xKgawasa Dios (Juan 3:​5, 14-21).

5. ¿La tlan namakgtayaya tiku makgalhtawakgepat naʼakxilha tuku malakgachokgoma naskujnani Jehová?

⁵ Max tiku makgalhtawakgepat liwana lakgapasa Biblia, pero maklakaskin pi wi tiku namakgtaya xlakata nakatsi tuku malakgachokgoma naskujnani Jehová. Max lu lhuwa kilhtamaku skuja o max xfamilia ni lakaskin pi xtatayana Jehová kalitaxtulh. ¿La tlan nastalaniya xliʼakxilhtit Jesús? Kalimaxtuni kilhtamaku. Max tlan akxtum xtawa kape o akxtum xtawayanti. Komo chuna natlawaya, xla max tlakg ni tuwa katimakgkatsilh nalichuwinan tuku tuwa titaxtuma. Chuna tlan namakgtayaya nakatsi tuku xlilakgpalit kxlatamat chu namalakapastakaya pi tuku tlakg xlakaskinka, wa pi natlawa umakgolh talakgpalit xlakata paxki Jehová chu ni kaj xlakata wix namakgapaxuwayan.

6. ¿La tlan namakgtayaya tiku makgalhtawakgepat nalilatama tuku katsinima? (1 Corintios 16:13).

⁶ Xlakata tiku makgalhtawakgepat nalilatama tuku katsinima kBiblia, talakaskin nakanajla pi Jehová namakgtaya (kalikgalhtawakga 1 Corintios 16:13). ¿La tlan xmakgtaya nakanajla uma? Kalilakpuwanti akxni xpina kʼescuela. Ni xlakgatiya pi mimakgalhtawakgena xkilhnin, wata xlakaskina pi tlan xlikatsinin chu xmakgtayan. Nachuna kalikatsini tiku makgalhtawakgepat. Ni kajwatiya kamasiyani tuku lakaskin Jehová pi katlawalh, wata liwana kawani pi Jehová namakgtaya nalakgpali tuku natalakaskin. ¿Tuku atanu tlan natlawaya xlakata namakgtayaya?

KAMAKGTAYA TLAKG NAPAXKI JEHOVÁ

7. ¿La kamakgtayalh Jesús tiku xkgaxmatnimakgo tlakg napaxkikgo Jehová?

⁷ Jesús xkatsi pi komo kstalaninanin tlakg xpaxkikgolh Jehová, tlakg ni tuwa xmakgkatsikgolh nalilatamakgo tuku xkatsinimakgo. Wa xlakata, ankgalhin xkalitachuwinan tuku xkamakgtayalh tlakg xpaxkikgolh xTlat. Akgtum kilhtamaku kalitachuwinalh chatum tlat tiku kamaxki lhuwa tuku tlan xkamanan (Mat. 7:​9-11). Max makgapitsi tiku xkgaxmatnimakgo Jesús, xnatlatnikan ni xkalimasiyayaninit pi xkapaxki. Wa xlakata max umakgolh latamanin lu kaks lilakawankgolh akxni kalitachuwinalh chatum tlat tiku lu xatapaxuwan makgamakglhtinan xkgawasa tiku xtlawanit lhuwa tuku nitlan, chu la uku xtaspitmapa xlakata lu nitlan xlimakgkatsi putum tuku xtlawanit. Uma kamakgtayalh naʼakgatekgskgo pi Jehová kapaxki putum latamanin (Luc. 15:​20-24).

8. ¿La tlan namakgtayaya tiku limakgalhtawakgepat Biblia tlakg napaxki Jehová?

⁸ Wix na tlan namakgtayaya tiku makgalhtawakgepat tlakg napaxki Jehová komo akxni natakgalhtawakgaya nalitachuwinana la likatsi Jehová. Makgatunu akxni natakgalhtawakgaya, kamasiyani pi tuku likgalhtawakgapatit limasiya la kinkapaxkiyan Jehová. Chu akxni nalichuwinanatit xlakata talakgmaxtut, kamakgtaya naʼakxilha pi talakgmaxtut akgtum tamaskiwin nema Jehová tlawaninit (Rom. 5:8; 1 Juan 4:10). Komo tiku makgalhtawakgepat liwana naʼakgatekgsa pi Jehová lu paxki, uma natlawa pi xla tsinu tsinu tlakg napaxkitilha Jehová (Gál. 2:20).

9. ¿Tuku makgtayalh Michael nalilatama tuku xkatsinima?

⁹ Kalilakpuwaw tuku titaxtulh Michael, xalak Indonesia. Xla masiyanika xaxlikana akxni aktsujku xwanit, pero ni tamunulh. Akxni xkgalhi 18 kata, alh skuja kʼalakatanu país. Alh kilhtamaku, taspitli kʼIndonesia, tamakgaxtokgli chu alistalh lakachilh xtsumat. Pero xla ampa makgskuja kʼalakatanu país. Akxni xʼanit makgskuja, xpuskat chu xtsumat tsukuka kalimakgalhtawakgekan Biblia chu tsukukgolh lilatamakgo tuku xkatsinimakgo. Akxni xtse Michael nilh, xla taspitli kxchik xlakata xkuentajtlawalh xtlat, chu na tsukuka limakgalhtawakgekan Biblia. Akxni xlikgalhtawakgama takgalhtawakga 27 xla libro Kalipaxuwa latamat, tuku wan sección «Tlakg kalakputsananiw» lakgchalh xnaku. Michael tsukulh tasa akxni lilakpuwa pi Jehová lu katsanilh akxni akxilhli pi xKgawasa lu xpatinama. Akxni akgatekgsli pi Jehová chu Jesús lu xpaxkikgo, lakgpalilh tuku xtalakaskin chu tamunulh.

KAMAKGTAYA PULANA NAWILI JEHOVÁ KXLATAMAT

10. ¿La kamakgtayalh Jesús xapulana kstalaninanin wa tlakg xlakaskinka naliʼakxilhkgo nalichuwinankgo Jehová? (Lucas 5:​5-11; na kaʼakxilhti dibujo).

¹⁰ Xapulana kstalaninanin Cristo tunkun akxilhkgolh pi Jesús wa Mesías tiku xwankanit pi xʼama min, pero xtalakaskin pi xkamakgtayaka naʼakgatekgskgo pi tuku tlakg xlakaskinka xliʼakxilhatkan xwanit wa nalichuwinankgo Dios. Akxni nina makgas xtitaxtunit lata Pedro chu Andrés kstalaninanin Jesús xlitaxtukgonit, xla kawanilh pi xmakgxtakgkgolh putum tuku xkgalhikgo chu kstalanikgolh putum kilhtamaku (Mat. 4:​18, 19). Pedro, Andrés, Santiago chu Juan xchipakgo skiti chu lu tlan xkakitaxtunima (Mar. 1:​16-20). Akxni Pedro chu Andrés «makgxtakgkgolh xtsalhkan», max lhuwa tuku lakkaxwilikgolh xlakata xfamiliaskan nitu xkatsankganilh xlakata xlakan xʼamakgo stalanikgo Jesús. ¿Tuku kamakgtayalh wa tlakg xlakaskinka naliʼakxilhkgo nalichuwinankgo Dios nixawa natlajakgo lhuwa tumin? Evangelio xla Lucas kinkalitachuwinanan pi Jesús tlawalh akgtum milagro nema kamakgtayalh nalipawankgo pi Jehová xʼama kamaxki putum tuku xmaklakaskinkgolh (kalikgalhtawakga Lucas 5:​5-11).

11. ¿Tuku tlan natlawaya xlakata namakgtayaya tiku makgalhtawakgepat namatliwakglha xtakanajla?

¹¹ Maski nila tlawayaw milagros chuna la Jesús, tlan nalitachuwinanaw tiku makgalhtawakgemaw pi Jehová kamakgtaya tiku wa tlakg xlakaskinka liʼakxilhkgo naskujnanikgo. Kalilakpuwanti la makgtayan Jehová akxni wix tsuku pina ktamakxtumit. Max talakaskilh xtachuwinanti mimalana chu wani pi ni xpimpat skuja makgapitsi kilhtamaku xlakata miliʼanat xwanit ktamakxtumit. Kawani tiku makgalhtawakgepat pi mintakanajla tatliwakglhli akxni akxilhti la xmakgtayaman Jehová xlakata wa tlakg xlakaskinka liʼakxilhti naskujnaniya.

12. 1) ¿Tuku tlan nakitaxtu komo nakawaniya natalan pi kataʼankgon akxni pina makgalhtawakgenana? 2) Kalichuwinanti atanu tuku namakgtayaya tiku makgalhtawakgepat wa tlakg xlakaskinka naliʼakxilha naskujnani Jehová.

¹² Atanu tuku na lu nalitamakgtaya tiku makgalhtawakgepat wa pi nakatsi tuku tlawakgolh amakgapitsi natalan xlakata wa tlakg xlakaskinka xliʼakxilhkgolh naskujnanikgo Jehová. Tlan nakawaniya tanu tanu natalan pi kataʼankgon akxni pina makgalhtawakgenana. Kakawani pi kalitachuwinankgolh tiku makgalhtawakgepat la lakgapaskgolh Jehová chu tuku tlawakgolh xlakata wa tlakg xlakaskinka xliʼakxilhkgolh naskujnanikgo. Na lu tlan nakitaxtu komo akxtum naʼakxilhatit videos nema min klibro Kalipaxuwa latamat ksecciones «Tlakg kalakputsananiw» o «Tlakg kakatsini». Akxni nalikgalhtawakgayatit takgalhtawakga 37, max tlan xlitachuwinanti tuku kinkamasiyaniyan video Jehová nakinkamaxkiyan tuku namaklakaskinaw.

KAMAKGTAYA NAKATSI TUKU NATLAWA AKXNI NATITAXTU TUKU TUWA

13. ¿La kamakgtayalh Jesús kstalaninanin xlakata xkatsikgolh tuku xtlawakgolh akxni xkaputsastalanika?

¹³ Jesús kawanilh kstalaninanin pi xʼamaka kaputsastalanikan chu asta tiku xalak xfamiliajkan xʼamakgo kalakgmakgankgo (Mat. 5:11; 10:​22, 36). Akxni Jesús nina xniy na kawanilh pi max xʼamaka kamakgniputunkan (Mat. 24:9; Juan 15:20; 16:2). Xlakata tlan chuntiya xlichuwinankgolh Dios, kawanilh pi skgalalh xlatamakgolh chu ni xkatalatlawakgolh tiku xkaputsastalanikgolh.

14. ¿La namakgtayaya tiku makgalhtawakgepat nakatsi tuku natlawa akxni nalisitsinikan tuku katsinima? (2 Timoteo 3:12).

¹⁴ Xtachuna la Jesús, tlan namakgtayaya tiku makgalhtawakgepat xlakata nakatsi tuku natlawa akxni natitaxtu tuku tuwa. Kalitachuwinanti tuku max xtlawakgolh o xwanikgolh tiku kataskuja, xʼamigos o asta tiku xalak xfamilia (kalikgalhtawakga 2 Timoteo 3:12). Makgapitsi tiku kataskuja max nalikgalhkgamanankgo xlakata nialh tlawa tuku xtlawa xapulana. Amakgapitsi, max tiku xalak xfamilia, ni katilakgatikgolh tuku katsinima chu asta max nalisitsinikgo. Komo alisokg nawaniya tuku max nawanikan o tuku max natlawanikan, nakatsi la nakgalhtinan chu tuku natlawa.

15. ¿La namakgtayaya tiku makgalhtawakgepat komo xfamilia nasitsinikgo?

¹⁵ Komo xfamilia tiku makgalhtawakgepat ni lakgatikgo pi katakgalhtawakgama xtatayananin Jehová, kawani pi kalilakpuwa tuku xlakata max lisitsinikgo. Max xlakan lakpuwankgo pi kaj akgskgawimaka, o max kawanikanit tuku ni xaxlikana xpalakata xtatayananin Jehová. Jesús nachuna titaxtulh, asta makgapitsi tiku xalak xfamilia lakpuwankgolh pi xʼakgwitima (Mar. 3:21; Juan 7:5). Lu xlakaskinka pi tiku makgalhtawakgepat ni lakapala nasitsi chu ni xatasitsi nakatachuwinan amakgapitsin, chuna la tiku xalak xfamilia.

16. ¿La namakgtayaya tiku makgalhtawakgepat ni xatasitsi nalichuwinan tuku katsinima?

¹⁶ Komo xfamilia tiku makgalhtawakgepat tlakg katsiputun xlakata tuku xla katsinima, kawani pi ni makgtuminika kakawanilh tuku katsi. Komo chuna xtlawalh max xfamilia xlilakgachanilh chu alimakgtum nialhtu xkatsiputunkgolh. Kawani pi ni lhuwa tuku kakawanilh. Chuna alimakgtum nalakaskinkgo pi kakalitachuwinamparaka tuku wan Biblia (Col. 4:6). Na tlan nakalitachuwinan sitio jw.org. Komo chuna natlawa, akxni xlakan wi tuku nakatsiputunkgo xpalakata xtatayananin Jehová tlan natanukgo anta chu naʼakxilhkgo.

17. ¿La namasiyaniya tiku makgalhtawakgepat la nakgalhtinan akxni wi tuku nakgalhskinkan? (Na kaʼakxilhti dibujo).

¹⁷ Kamaklakaskinti sección «Takgalhskinin nema tlakg tlawakan xlakata xtatayananin Jehová» nema min ksitio jw.org xlakata namasiyaniya tiku makgalhtawakgepat la nakgalhtinan akxni wi tuku nakgalhskinkgo tiku xalak xfamilia o tiku taskujkgo (2 Tim. 2:​24, 25). Na kalakapastakti pi niku sputa akgatunu takgalhtawakga xla libro Kalipaxuwa latamat limin akgtum recuadro niku wan «Makgapitsin wankgo». Kamakgpuwantini nalitsakgsa la nakgalhtinan akxni wi tuku nakgalhskinkan. Komo talakaskin, kawani tuku tlan xwa xlakata tlakg tlan nakgalhtinan. Putum uma namakgtaya ni napekuan akxni nalichuwinan tuku kanajla.

18. ¿La namakgtayaya tiku makgalhtawakgepat publicador nalitaxtu? (Mateo 10:27).

¹⁸ Jesús kawanilh kstalaninanin pi xkalitachuwinankgolh xatlan tamakatsinin putum latamanin (kalikgalhtawakga Mateo 10:27). Komo tiku makgalhtawakgepat tunkun natsuku lichuwinan tuku katsinima, tlakg lakapala natsuku lipawan Jehová xlakata naʼakxilha la xla namakgtayatilha. ¿La namakgtayaya tiku makgalhtawakgepat publicador nalitaxtu? Akxni namakatsininankan pi natawila akgtum campaña xlakata nakaʼinvitarlikan latamanin naʼankgo akxni nalakapastakkan Cristo o naʼankgo kʼasamblea, kawani tuku tlan natlawa xlakata publicador nalitaxtu. Kawani pi kʼumakgolh campañas, tlakg ni tuwa katimakgkatsilh nalichuwinan Dios. Atanu tuku lu namakgtaya wa pi namatitaxti taʼakgchuwin o demostraciones ktamakxtumit xla itat semana ksección «Tlakg liwana kamakgalhtawakgenaw». Chuna ni tuwa katimakgkatsilh nakalitachuwinan amakgapitsin tuku kanajla.

KAWANI PI XLA TLAN NASKUJNI JEHOVÁ

19. ¿Tuku tlawalh Jesús xlakata nakalimasiyani kstalaninanin pi xkatsi pi ni xmakgxtakgputunkgo Jehová, chu la tlan nastalaniyaw xliʼakxilhtit?

¹⁹ Akxni Jesús nina xʼan kʼakgapun, kawanilh kstalaninanin pi xʼama min kilhtamaku akxtum xʼamapa katatawila. Uma kilhtamaku kstalaninanin ni liwana akgatekgskgolh pi Jesús xlichuwinama pi akxtum xʼamakgo tatawilakgo kʼakgapun. Pero Jesús ni wa akxilhli tuku ni liwana xʼakgatekgskgo, wata wa akxilhli pi xlakan ni xmakgxtakgputunkgo Jehová (Juan 14:​1-5, 8). Jesús liwana xkatsi pi xtalakaskin xtitaxtulh kilhtamaku xlakata liwana xʼakgatekgskgolh makgapitsi tuku xkalitachuwinanit, chuna la akxni kalitachuwinalh xlakata tiku nalatamakgo kʼakgapun (Juan 16:12). Chuna la Jesús, tlan nawaniya tiku makgalhtawakgepat pi xla namatlani nalilatama tuku katsinima chu namatlani naskujnani Jehová.

20. ¿La limasiyalh chatum tala xalak Malaui pi xlipawan pi xʼama min kilhtamaku tiku xmakgalhtawakgema xʼama lilatama tuku xkatsinima?

²⁰ Kalipawanti pi namin kilhtamaku tiku makgalhtawakgepat natsuku lilatama tuku katsinima. Chatum tala xalak Malaui tiku wanikan Chifundo tsukulh limakgalhtawakge Biblia Alinafe, chatum tsumat tiku católica xwanit. Akxni xlikgalhtawakgamakgo takgalhtawakga 14 xla libro Kalipaxuwa latamat, Chifundo kgalhskilh Alinafe tuku xlakpuwan xlakata imágenes. Alinafe lu lisitsilh chu kgalhtinalh: «¡Chatunu kinkalakgchanan nalaksakaw!». Kintalakan lakpuwa pi lata ama kilhtamaku xla max nialh xʼama kgalhtawakga. Pero chuntiya makgalhtawakgelh chu xlipawan pi xʼama min kilhtamaku uma tsumat xʼama akgatekgsa pi ni kilimaklakaskinatkan imágenes xlakata nakakninaniyaw Dios. Titaxtulh kilhtamaku, akxni xlikgalhtawakgamakgo takgalhtawakga 34, Chifundo tlawanilh takgalhskinin nema min anta: «¿La makgtayanitan asta la uku mintakgalhtawakga xalak Biblia chu xlakata tlakg lakgapasnita xaxlikana Dios, Jehová?». Chifundo wan: «Alinafe lhuwa tuku tlan lichuwinalh, chu pulaktum tuku wa, wa pi xtatayananin Jehová nikxni katitlawakgolh tuku Biblia wan pi ni xlitatlawat». Ni xlimakgas, uma tsumat nialh limaklakaskilh imágenes chu tamunulh.

21. ¿La tlan namakgtayayaw tiku makgalhtawakgemaw xlakata naskujnani Jehová?

²¹ Maski katsiyaw pi wa Jehová «tiku tlawa pi nastaka» xtakanajla tiku makgalhtawakgemaw, akinin na tlan namakgtayayaw naskujnani (1 Cor. 3:7). Ni kajwatiya masiyaniyaw tuku Jehová lakaskin pi katlawalh, na makgtayayaw tlakg napaxki. Makgpuwantiniyaw nalimasiya uma tapaxkit, chu chuna natlawa komo tuku tlakg xlakaskinka naliʼakxilha kxlatamat wa pi naskujnani Jehová. Na masiyaniyaw nalipawan Jehová akxni natitaxtu tuku tuwa. Akxni waniyaw tiku makgalhtawakgemaw pi namatlani nalilatama tuku katsininima, makgpuwantiniyaw xlakata na naskujnaniputun Jehová.