Hibru

3 Ol brata holi, yupela ol man em God i singautim bilong i go long heven. Yupela i mas tingim dispela aposel na hetpris em yumi save tokaut olsem yumi bilip long en, em Jisas. 2 God i bin givim dispela wok long em na em i bihainim tru tok bilong God, wankain olsem Moses i bin bihainim tru tok taim em i mekim wok insait long haus* bilong God. 3 Biknem bilong Jisas i winim biknem bilong Moses, dispela i stret, long wanem, biknem bilong man i wokim haus i winim biknem bilong haus yet. 4 Olgeta wan wan haus i gat man i bin wokim. Tasol man i bin wokim olgeta samting em God. 5 Moses i stap olsem wokman i mekim gut wok insait long haus bilong God. Wok em i mekim i tokaut long ol samting bai kamap ples klia long bihain. 6 Tasol Krais i mekim gut wok olsem Pikinini i bosim haus bilong God. Sapos yumi holimpas pasin bilong yumi long tokaut stret na pasin bilong yumi long amamas long dispela samting yumi bilip na wet long en, na yumi mekim olsem i go inap long pinis, orait yumi stap olsem haus bilong God.

7 Olsem na holi spirit i tok: “Nau sapos yupela i harim nek bilong em, 8 orait yupela i no ken pasim strong bel bilong yupela, olsem ol tumbuna bilong yupela i bin mekim taim ol i bin kirapim mi long belhat. Em taim ol i bin traim mi long ples nating. 9 Ol tumbuna bilong yupela i bin traim mi, maski inap 40 yia ol i lukim ol wok mi bin mekim. 10 Olsem na mi les tru long lain pipol bilong dispela taim na mi tok, ‘Long bel bilong ol, ol i save lusim stretpela rot. Na ol i no save long ol pasin bilong mi.’ 11 Olsem na mi belhat na tok tru antap olsem, ‘Ol bai i no inap i go insait long malolo bilong mi.’ ”

12 Ol brata yupela i mas was gut, nogut wanpela bilong yupela i lusim God i gat laip na bel bilong em i kirap laikim pasin nogut na em i lusim bilip. 13 Narapela i mas wok yet long strongim narapela long olgeta wan wan de inap long dispela taim yumi kolim olsem “Nau” i stap yet. Nogut strong bilong sin long giamanim man i mekim na wanpela bilong yupela i pasim strong bel bilong en. 14 Sapos yumi holimpas dispela bilip yumi bin i gat long pastaim, na yumi mekim olsem inap long pinis, orait yumi bai insait long ol samting bilong Krais. 15 Rait Holi i tok: “Nau sapos yupela i harim nek bilong em, orait yupela i no ken pasim strong bel bilong yupela, olsem ol tumbuna bilong yupela i bin mekim taim ol i bin kirapim mi long belhat.”

16 Husat lain i bin harim tok bilong God, tasol maski ol i harim ol i kirapim em long belhat? Em olgeta manmeri Moses i bringim ol i go lusim Isip. 17 Na tu, God i bin les tru long husat inap long 40 yia? Em ol dispela manmeri i bin mekim sin, na ol i bin i dai long ples nating. 18 Na em i mekim tok tru antap long wanem lain olsem ol bai i no inap i go insait long malolo bilong em? Em i mekim long ol dispela man i bin sakim tok bilong em, a? 19 Olsem na yumi luksave olsem ol i no inap i go insait long malolo bilong em, long wanem, ol i no gat bilip.