22 Olgeta man em ol i makim bilong kamap ol wasman bilong geit, namba bilong ol em inap 212. Ol i bihainim lista bilong lain famili bilong ol+ na ol i sindaun long wan wan ples bilong ol. Devit na Samuel em man i save long mining bilong ol visen,+ i bin makim ol dispela man ol i trastim bilong mekim dispela wok. 23 Ol dispela man wantaim ol pikinini man bilong ol i bosim wok bilong was long ol geit bilong haus bilong Jehova,+ em haus lotu sel. 24 Ol wasman bilong geit i was long 4-pela sait—hap is, hap wes, hap not, na hap saut.+ 25 Sampela taim ol brata bilong ol long ol liklik taun i save kam wok wantaim ol inap 7-pela de na i go bek. 26 I gat 4-pela nambawan* wasman bilong geit em ol i trastim ol long mekim dispela wok. Ol i bilong lain Livai, na ol i save lukautim olgeta rum* na ples we ol i save putim ol mani samting long haus bilong God tru.+ 27 Long nait olgeta, ol i save sanap na was i stap long wan wan ples wok bilong ol raunim haus bilong God tru, long wanem, ol i save bosim wok bilong was long haus, na ol i save lukautim ki na ol i save opim dua long olgeta moning.