3 Dispela tok em i tru: Sapos wanpela man i laik kamap wasman,+ em i laik kisim gutpela wok. 2 Olsem na wasman i mas stap olsem man i no gat asua, na man bilong wanpela meri tasol, na man i save mekim ol samting inap long skel, em i mas bihainim gutpela tingting,*+ em i mas wokabaut stret,* em i mas mekim gut long ol arapela,+ na em i mas i gat save long skulim ol man,+ 3 em i no ken spak,+ na em i no ken paitim narapela,* em i mas redi long bihainim tingting bilong narapela,+ em i no ken kros nabaut,+ na em i no ken laikim tumas mani,+ 4 em i mas bosim gut ol wanhaus bilong em, na ol pikinini bilong em i mas i gat gutpela tingting na ol i mas daun long em+ 5 (sapos man i no save long pasin bilong bosim gut meri pikinini bilong em yet, orait olsem wanem bai em i lukautim gut kongrigesen bilong God?), 6 na nupela disaipel i no ken kisim dispela wok,+ nogut em i kisim pasin antap na kisim wankain kot olsem Devil* i bin kisim. 7 Na tu, em i mas i gat gutnem namel long ol man ausait,+ nogut ol man i tok nogut long em na em i pundaun long trap bilong Devil.

5 Mi bin lusim yu long Krit bai yu ken stretim ol samting i no stret na makim ol hetman long olgeta taun, olsem mi bin tokim yu long mekim: 6 makim ol man em ol arapela i no inap sutim tok long ol, na ol i mas i stap man bilong wanpela meri tasol. Na ol pikinini bilong ol i mas bilip na ol i no ken i gat nem olsem ol i pikinini bilong bikhet nabaut na sakim tok.+ 7 Wasman em i bosboi i mekim wok bilong God, olsem na em i mas i stap man em ol arapela i no inap sutim tok long em, na em i no ken tingim laik bilong em yet tasol,+ em i no ken belhat kwik,+ em i no ken spak, em i no ken paitim ol arapela,* na em i no ken mekim ol samting long pasin gridi bilong helpim em yet. 8 Em i mas mekim gut long ol arapela,+ em i mas laikim gutpela pasin, em i mas bihainim gutpela tingting,*+ bihainim stretpela pasin, stap gut long God,+ na bosim gut bel.+ 9 Em i mas holim strong dispela trupela tok* taim em i skulim ol man.+ Olsem bai em inap strongim* ol man long rot bilong ol gutpela tok,+ na long stretim ol man+ i mekim ol tok i no stret wantaim ol dispela tok.

17 Yupela i mas bihainim tok bilong ol man i go pas long yupela+ na stap aninit long ol.+ Oltaim ol i was long yupela, na bihain ol i mas tokim God long dispela wok ol i bin mekim.+ Yupela i mas stap aninit long ol, bai ol i ken mekim dispela wok wantaim amamas na ol i no ken bel hevi. Sapos ol i bel hevi, dispela inap bagarapim yupela.