1 Stori
20 Long kirap bilong olgeta wan wan yia,* long taim we ol king i save kisim ol soldia bilong ol i go pait long ol birua bilong ol, Joap+ i kisim ol soldia na ol i go pait long ol Amon na bagarapim graun bilong ol; em i banisim taun Raba,+ tasol Devit i no go long pait, em i stap long Jerusalem.+ Joap i pait long taun Raba na bagarapim tru taun.+ 2 Na Devit i kisim kraun long het bilong Malkam. Ol i wokim dispela kraun long gol na hevi bilong en em inap 1-pela talen,* na dispela kraun i gat ol ston i dia tumas; na ol i putim dispela kraun long het bilong Devit. Na Devit i kisim tu planti samting long dispela taun.+ 3 Na em i kisim ol manmeri bilong dispela taun na putim ol long wok+ bilong katim ston, na long mekim ol wok long ol ain tul i gat sap, na long mekim wok long ol tamiok. Devit i mekim olsem long ol manmeri bilong ol taun bilong ol Amon. Na bihain Devit na ol soldia i go bek long Jerusalem.
4 Bihain long dispela, ol Israel i pait gen wantaim ol Filistia long Geser. Long dispela taim, Sibekai,+ em man bilong ples Husa, i kilim i dai Sipai em wanpela man bilong lain Refaim,+ na em i winim ol long pait.
5 Narapela taim gen ol Israel i pait wantaim ol Filistia na Elhanan, pikinini man bilong Jair, i kilim i dai Lami, brata bilong Goliat+ em man Git. Stik bilong spia bilong em i kain olsem ba bilong masin bilong wivim laplap.+
6 Na pait i kamap gen long Get.+ Na i gat wanpela traipela man tru+ i stap tu long dispela pait. Em i gat 6-pela pinga long tupela han bilong em na 6-pela tou long tupela lek bilong em, na olgeta wantaim em 24; na em tu i bilong lain Refaim.+ 7 Em i wok long tok bilas+ long ol Israel, olsem na Jonatan, pikinini man bilong Simia,+ brata bilong Devit, i kilim em i dai.
8 Ol dispela man i bilong lain Refaim+ bilong taun Get.+ Na Devit na ol soldia bilong em i bin kilim ol i dai.