Aisaia
17 Dispela em wanpela strongpela tokaut long samting bai painim Damaskus:+
“Harim! Damaskus bai i no stap moa olsem wanpela taun,
Na em bai kamap wanpela hip pipia.+
2 Bai i no gat ol man i stap moa long ol taun bilong Aroer;+
Ol bai kamap ples bilong ol sipsip long i stap long en
Na i no gat wanpela bai mekim ol i pret.
3 Ol taun i gat strongpela banis long Efraim bai i no stap moa,+
Na kingdom long Damaskus bai i no stap moa;+
Na biknem bilong ol liklik hap lain i stap yet long Siria
Bai pinis wankain olsem biknem bilong ol Israel,”* Jehova, bosman bilong bikpela lain ami, i mekim dispela tok.
4 “Long dispela de, biknem bilong Jekop bai go daun,
Na helti bodi bilong em* bai kamap bun nating.
5 Jekop bai kamap olsem wanpela gaden long Veli Bilong Refaim+
Bihain long taim ol man i kisim pinis kaikai i redi long en,
Na sampela het bilong wit tasol i stap long en bilong ol narapela i ken kisim.
6 Ol liklik hap kaikai tasol bai i stap yet,
Olsem long taim ol i paitim diwai oliv:
Tupela o tripela mau oliv tasol bai stap yet long brens antap tru,
Fopela o faivpela oliv tasol bai stap long ol brens i save karim prut,”+ Jehova, God bilong Israel, i mekim dispela tok.
7 Long dispela de, man bai lukluk i go antap long Man Bilong Wokim em, na ai bilong em bai lukluk long God Holi bilong Israel. 8 Em bai i no lukluk i go long ol alta,+ em ol samting han bilong em i wokim;+ na em bai i no lukluk long ol samting ol pinga bilong em i bin wokim, maski em ol pos bilong lotu* o ol alta bilong kukim paura i gat gutpela smel.
9 Long dispela de, ol taun bilong em i gat strongpela banis bai kamap olsem wanpela ples i stap nating long bikbus,+
Olsem wanpela brens em ol i lusim i stap long ai bilong ol Israel;
Em bai kamap wanpela ples nating.
10 Yu bin lusim tingting long God,+ em man bilong kisim bek yu;
Yu no bin tingim Bikpela Ston+ i stap olsem strongpela banis bilong yu.
Olsem na yu planim ol gutpela plantesen
Na planim ol nupela kru bilong man yu no save long em* namel long ol dispela plantesen.
11 Long san, yu wokim gut banis long plantesen bilong yu,
Long moning, yu mekim ol sid bilong yu i kru,
Tasol bai i no gat taim bilong kisim kaikai i redi long gaden taim yu sik na pilim bikpela pen tru.+
12 Harim! I gat bikpela nois bilong planti manmeri,
Ol i olsem biksi i raf na i no stap isi!
I gat bikpela pairap bilong ol kantri,
Pairap bilong ol i olsem strongpela pairap bilong ol bikpela wara!
13 Ol kantri bai mekim nois olsem bikpela pairap bilong planti wara.
Em bai krosim ol, na ol bai ranawe i go longwe tru,
Na rausim ol i go olsem pipia bilong wit samting long ol maunten em win i bloim i go,
Olsem wanpela gras nogut em strongpela win i tanim tanim em i go.
14 Long apinun tru, i gat bikpela pret.
Paslain long moning i kamap, ol birua i no stap moa.
Dispela em samting bai painim ol man i pait na daunim mipela
Na em samting bai painim ol man i kam stilim ol samting bilong mipela.