Namba
17 Jehova i tokim Moses olsem: 2 “Yu mas tokim ol Israel long givim yu 12-pela stik wokabaut. Olgeta stik i makim wan wan hetman bilong wan wan lain bilong ol.+ Na yu mas raitim nem bilong olgeta wan wan hetman long wan wan stik bilong ol. 3 Olgeta wan wan stik wokabaut i makim wan wan lain bilong ol. Olsem na yu mas raitim nem bilong Aron long stik i makim lain Livai. 4 Yu mas putim ol dispela stik wokabaut insait long haus sel bilong bung klostu long Bokis Kontrak,+ em hap we mi save kamap long yupela.+ 5 Orait kru bai kamap long stik wokabaut bilong man mi makim,+ na long dispela rot bai mi pasim maus bilong ol Israel i wok long toktok planti long mi,+ em ol i toktok planti long yutupela tu.”+
6 Orait Moses i tokim ol Israel long ol dispela samting na olgeta hetman bilong ol i givim stik wokabaut long em. Wanpela wanpela stik i makim wan wan hetman bilong lain bilong ol, inap 12-pela stik olgeta. Aron tu i givim stik wokabaut bilong em. 7 Orait Moses i kisim ol dispela stik wokabaut na putim ol insait long haus sel i gat Bokis Kontrak long ai bilong Jehova.
8 Long neks de Moses i go insait long haus sel i gat Bokis Kontrak na em i lukim stik wokabaut bilong Aron, em stik i makim lain Livai. Dispela stik i kru na i putim ol plaua na karim ol pikinini bilong diwai almon em ol i mau pinis. 9 Orait Moses i kisim olgeta stik wokabaut i stap long ai bilong Jehova na bringim i kam ausait long ol manmeri bilong Israel. Ol i lukim ol dispela stik pinis, na olgeta wan wan hetman i kisim bek stik wokabaut bilong ol.
10 Na Jehova i tokim Moses olsem: “Kisim stik wokabaut bilong Aron+ na go putim bek klostu long Bokis Kontrak. Em bai i stap olsem mak+ bilong mekim ol dispela bikhet manmeri+ i tingting. Na dispela bai pasim maus bilong ol na ol i no ken toktok planti long mi. Na bai mi no ken kilim ol i dai.” 11 Orait Moses i mekim olsem Jehova i bin tokim em. Em i bihainim olgeta tok bilong em.
12 Na ol Israel i tokim Moses olsem: “Aiyo, nau bai mipela i dai. Tru tumas, bai mipela olgeta i lus! 13 Maski wanem man i go klostu long haus sel bilong Jehova, em bai i dai!+ Mipela olgeta bai i dai olsem, a?”+