2 Samuel
1 Devit i pait long ol Amalek na i winim ol pinis na em i go bek long Siklak+ na i stap tupela de. Long dispela taim Sol i dai pinis. 2 Na long de namba 3, wanpela man i lusim kem bilong Sol na i kam. Klos bilong em i bruk na graun i stap long het bilong em. Em i go long Devit na nildaun na putim pes i go daun long graun.
3 Na Devit i askim em olsem: “Yu kam long wanem hap?” Na em i tok: “Mi ranawe lusim kem bilong ol Israel na i kam.” 4 Na Devit i tok: “Mi laik yu mas tokim mi long ol samting i bin kamap long pait.” Na em i tok: “Ol soldia bilong Israel i ranawe long pait na ol Filistia i kilim i dai planti bilong ol. Na Sol wantaim pikinini man bilong em Jonatan, tupela tu i dai.”+ 5 Orait Devit i askim dispela yangpela man i bringim toksave i kam olsem: “Hau na yu save olsem Sol wantaim pikinini man bilong em Jonatan i dai pinis?” 6 Na dispela yangpela man i tok: “Mi stap long Maunten Gilboa+ na mi lukim Sol i holim spia bilong em bilong strongim em yet long sanap, na ol birua i stap long ol karis na i sindaun long ol hos i wok long i go klostu long em.+ 7 Na Sol i tanim na em i lukim mi, na em i singautim mi na mi bekim tok long em olsem, ‘Yes, bikman.’ 8 Na em i askim mi olsem, ‘Yu bilong wanem hap?’ Na mi tok, ‘Mi bilong lain Amalek.’+ 9 Na em i tok, ‘Mi kisim bikpela bagarap tru, tasol mi no dai yet, olsem na yu kam na kilim mi i dai.’ 10 Olsem na mi go klostu long em na kilim em i dai,+ long wanem, mi save olsem em i kisim bikpela bagarap tru na em bai dai. Na mi kisim hat king long het bilong em na paspas em i werim long han bilong em na mi bringim i kam long yu, bikman bilong mi.”
11 Taim Devit i harim dispela tok, em i brukim klos bilong em na ol man i stap wantaim em, ol tu i mekim wankain pasin. 12 Na ol i krai sori long Sol na pikinini man bilong em, Jonatan, na long ol manmeri bilong Jehova, na long ol manmeri Israel,+ na ol i tambu long kaikai+ i go inap long apinun tru, long wanem, planti man i bin dai.
13 Na Devit i askim dispela yangpela man i bringim toksave i kam olsem: “Yu bilong wanem ples?” Na em i tok: “Mi pikinini bilong wanpela man Amalek. Em i bin lusim ples bilong em na i kam sindaun long kantri Israel.” 14 Na Devit i tokim em olsem: “Olsem wanem? Yu no bin pret liklik long kilim i dai dispela man em Jehova i bin anointim,* a?”+ 15 Orait Devit i singautim wanpela bilong ol man i kam na i tokim em olsem: “Kilim dispela man i dai.” Orait em i kilim dispela man i dai.+ 16 Na Devit i tok olsem: “Em asua bilong yu yet na yu dai, long wanem, yu yet i bin tokaut olsem, ‘Mi bin kilim i dai dispela man em Jehova i bin anointim.’”+
17 Orait Devit i mekim wanpela singsing sore* long Sol na pikinini bilong em Jonatan+ 18 na Devit i tok ol manmeri bilong Juda i mas lainim dispela singsing. Nem bilong dispela singsing em, “Singsing Bilong Banara.” Ol i raitim dispela singsing long buk bilong Jasha olsem:+
19 “Aiyo Israel, ol man bilong yu i gat biknem, ol i bin dai long ol maunten.+
Ol strongpela soldia i dai pinis!
20 Yupela i no ken tokaut long dispela samting long taun Get;+
Na no ken tokaut long en long ol rot bilong taun Askelon,
Nogut ol pikinini meri bilong ol Filistia i amamas,
Nogut ol pikinini meri bilong ol man i no bin katim skin* i belgut.
21 Yupela ol maunten bilong Gilboa,+
Ren na wara bilong nait i no ken pundaun moa long yupela,
Na dispela graun i no ken kamapim kaikai bilong givim ofa+
Long wanem, ol hap plang bilong ol strongpela man long pait i kamap doti,
Na hap plang bilong Sol long pait em tu i stap nating na ol i no welim moa.
22 Banara bilong Jonatan i no save popaia,+
Na bainat bilong Sol i no save stap nating. Nogat.+
Bainat na banara i save kilim i dai ol strongpela soldia na blut bilong ol birua i pulap long en.
23 Ol manmeri i save laikim tru Sol na Jonatan+ na tingim tupela olsem samting i dia tumas,
Taim tupela i dai, tupela i dai wantaim.+
24 Yupela ol pikinini meri bilong Israel, yupela i mas krai long Sol,
Em i bin bilasim yupela long ol naispela retpela klos na ol gutpela bilas,
Em i bin putim ol gutpela bilas gol long klos bilong yupela.
25 Ol strongpela soldia i dai pinis long pait!
Jonatan i dai antap long ol maunten!+
Laikim bilong yu i strong moa yet na i winim tru laik bilong ol meri i laikim mi.+
27 Ol strongpela soldia i dai pinis
Na ol samting bilong pait i bagarap pinis!”