Namba
23 Na Balam i tokim Balak: “Mi laik yu wokim 7-pela alta long hia+ na redim 7-pela bulmakau man na 7-pela sipsip man.” 2 Orait wantu tasol Balak i mekim olsem Balam i bin tokim em. Na em wantaim Balam i ofaim wanpela bulmakau na wanpela sipsip long olgeta wan wan alta.+ 3 Na Balam i tokim Balak olsem: “Yu stap long hia wantaim ofa bilong paia i kukim olgeta na bai mi go pastaim. Ating Jehova bai kam bungim mi, na wanem samting em i tokim mi long en bai mi tokim yu.” Na Balam i go antap long wanpela maunten.
4 Orait God i bungim Balam+ na Balam i tokim em olsem: “Mi bin wokim 7-pela alta na mi ofaim wanpela bulmakau man na wanpela sipsip man long olgeta wan wan alta.” 5 Na Jehova i putim tok long maus bilong Balam+ na em i tokim Balam olsem: “Yu go bek long Balak na givim dispela tok bilong mi long em.” 6 Orait em i go bek na em i lukim Balak i sanap i stap wantaim olgeta hetman bilong Moap, klostu long ofa bilong paia i kukim olgeta. 7 Na Balam i autim wanpela tok profet olsem:+
“Balak, king bilong Moap i bringim mi i kam lusim Aram,+
Long ol maunten bilong hap is:
‘Kam na tokaut long ol samting nogut i mas painim Jekop.
Yes kam na mekim tok bilong bagarapim Israel.’+
8 God yet i no bin tokaut long ol samting nogut i mas kamap long ol, na olsem wanem na mi inap tok olsem?
Jehova i no bin mekim tok bilong bagarapim ol, na olsem wanem mi inap mekim kain tok olsem?+
9 Mi sanap antap long ples ston na mi lukim ol,
Na long ples maunten mi lukim ol.
Ol i wanpela lain pipol i stap ol yet long hap,+
Ol i save ol i no wankain olsem ol arapela lain manmeri.+
10 Lain bilong Jekop i planti tumas olsem das, husat inap kaunim ol?+
O husat inap kaunim wanpela bilong ol 4-pela hap bilong lain Israel?
Mi laik stap olsem ol stretpela man na dai,
Mi laik stap olsem ol i go inap long mi dai.”
11 Orait Balak i tokim Balam olsem: “Watpo yu mekim dispela kain pasin long mi? Mi bin bringim yu i kam bilong tokaut long samting nogut i mas painim ol birua bilong mi. Tasol yu no mekim olsem. Nogat. Yu mekim tok bilong blesim ol.”+ 12 Na Balam i bekim tok olsem: “Mi mas mekim tasol ol tok em Jehova i putim long maus bilong mi.”+
13 Na Balak i tokim Balam olsem: “Plis kam wantaim mi na mitupela i go long narapela ples we yu inap lukim ol Israel. Bai yu inap long lukim hap lain bilong Israel, tasol yu no inap lukim olgeta bilong ol. Orait yu ken sanap long dispela hap na tokaut long samting nogut i mas painim ol.”+ 14 Na em i kisim Balam i go long ples kunai bilong Sofim, antap long Pisga.+ Na em i wokim 7-pela alta na ofaim wanpela bulmakau man na wanpela sipsip man long olgeta wan wan alta.+ 15 Na Balam i tokim Balak olsem: “Yu stap long hia wantaim ofa bilong paia i kukim olgeta na bai mi go long hap na toktok wantaim God.” 16 Orait Jehova i bungim Balam na putim tok long maus bilong em.+ Na em i tokim Balam olsem: “Yu go bek long Balak na givim dispela tok bilong mi long em.” 17 Orait Balam i go bek na lukim Balak wantaim ol hetman bilong Moap i sanap i stap klostu long ofa bilong paia i kukim olgeta. Na Balak i askim Balam olsem: “Jehova i givim wanem tok long yu?” 18 Na Balam i autim wanpela tok profet olsem:+
“Balak, yu kirap, na harim dispela tok.
Putim yau, pikinini man bilong Sipor.
19 God i no save giaman olsem ol man,+
Na em i no save senisim tingting bilong em olsem ol man i save mekim.+
Taim em i tok long mekim wanpela samting, em i save mekim.
Taim em i tokaut long wanpela samting, em i save truim.+
21 Em i no save larim ol man i mekim mejik bilong bagarapim Jekop,
Na em i no save larim hevi i painim Israel.
God bilong em Jehova i stap wantaim ol,+
Na ol i tokaut olsem em i king bilong ol.
22 God i kisim ol long Isip na bringim ol i kam.+
Long ol Israel, God i olsem kom bilong wel bulmakau man.+
23 I no gat wanpela mak i makim olsem bagarap bai painim Jekop,+
Na i no gat wanpela glasman inap tokaut long samting bai painim Israel long bihain.+
Nau ol i ken tok olsem long Jekop na Israel,
‘Lukim ol samting God i mekim!’
24 Dispela lain manmeri bai sanap olsem wanpela laion,
Na olsem laion em yet bai kirap sanap.+
Em bai i no inap sindaun i go inap long em i kaikai animal em i kilim i dai
Na em i dringim blut bilong dispela animal.”
25 Na Balak i tokim Balam olsem: “Sapos yu no inap tokaut long samting nogut i mas painim ol Israel, orait yu no ken mekim tok bilong blesim ol.” 26 Na Balam i bekim tok olsem: “Yu no harim mi, a? Mi bin tokim yu olsem, ‘Mi bai tokaut tasol long olgeta samting em Jehova i tokim mi.’”+
27 Orait Balak i tokim Balam olsem: “Plis kam wantaim mi na bai mi kisim yu i go long narapela ples. Ating God tru bai lukim yu sanap long dispela hap na bai em i larim yu tokaut long samting nogut i mas painim ol Israel.”+ 28 Orait Balak i kisim Balam i go antap long Peor, we ol i ken lukluk i go olsem long Jesimon.*+ 29 Na Balam i tokim Balak olsem: “Mi laik yu wokim 7-pela alta long hia na redim 7-pela bulmakau man na 7-pela sipsip man.”+ 30 Orait Balak i mekim olsem Balam i tok na em i ofaim wanpela bulmakau na wanpela sipsip long olgeta wan wan alta.