Esekiel
32 Na long namba 12 yia, long namba 1 de bilong namba 12 mun, Jehova i givim gen tok bilong em long mi olsem: 2 “Pikinini bilong man, yu mas singim wanpela singsing sore* long Fero, king bilong Isip, na tokim em olsem,
‘Yu bin stap olsem wanpela strongpela yangpela laion bilong ol kantri,
Tasol yu no mekim nois moa.
Yu bin stap olsem wanpela traipela animal bilong solwara,+ yu paitim paitim nabaut ol wara bilong yu,
Na lek bilong yu i mekim ol wara i kamap doti na bagarapim ol wara.’
3 Nambawan Bikpela Jehova i tok:
‘Long rot bilong wanpela lain bilong planti kantri i bung wantaim, mi bai tromoi umben bilong mi antap long yu,
Na ol bai pulim yu long umben bilong mi i kam antap.
4 Mi bai lusim yu i stap long graun;
Mi bai tromoi yu i go long ples nating.
Mi bai mekim olgeta pisin bilong skai i kam sindaun antap long yu,
Na mi bai pulapim bel bilong ol wel animal long olgeta hap bilong graun long mit bilong yu.+
5 Mi bai tromoi mit bilong yu antap long ol maunten
Na pulapim ol veli long ol hap hap bodi bilong yu i stap yet.+
6 Mi bai pulapim tru graun i go inap long ol maunten long blut bilong yu i wok long sut i kam aut,
Na blut bai pulapim ol hanwara.’*
7 ‘Na taim mi pinisim yu, mi bai karamapim skai na mekim ol sta bilong ol i kamap tudak.
Mi bai karamapim san wantaim ol klaut,
Na mun i no inap givim lait bilong en.+
8 Mi bai mekim olgeta samting bilong givim lait i stap long skai i kamap tudak bikos long yu,
Na mi bai karamapim kantri bilong yu wantaim tudak,’ Nambawan Bikpela Jehova i mekim dispela tok.
9 ‘Mi bai mekim bel bilong planti lain manmeri i wari taim mi lidim ol kalabusman bilong yu i go long ol narapela kantri,
Long ol kantri em yu no bin save long en.+
10 Mi bai mekim planti lain manmeri i kirap nogut,
Na ol king bilong ol bai pret nogut tru na guria long samting i painim yu taim mi swingim bainat bilong mi long ai bilong ol.
Ol bai wok long guria, olgeta wan wan bai pret long samting bai painim laip bilong ol
Long de yu pundaun.’
11 Nambawan Bikpela Jehova i tok:
‘Bainat bilong king bilong Babilon bai kam mekim save long yu.+
12 Mi bai mekim bikpela lain bilong yu i dai long rot bilong bainat bilong ol strongpela man bilong pait,
Em ol man nogut tru winim ol arapela kantri, olgeta bilong ol.+
Ol bai daunim ol samting Isip i save hambak long en, na olgeta lain ami bilong em bai pinis olgeta.+
13 Mi bai bagarapim olgeta animal bilong em klostu long planti wara bilong em,+
Na lek bilong man o bilong animal i no inap mekim ol i kamap doti gen.’+
14 ‘Long dispela taim, mi bai klinim ol wara bilong ol,
Na mi bai mekim ol wara bilong ol i ron i go olsem oil,’ Nambawan Bikpela Jehova i mekim dispela tok.
15 ‘Taim mi mekim Isip i kamap wanpela ples nating i no gat man i stap long en, wanpela kantri em ol i kisim olgeta samting i pulap long en,+
Taim mi kilim i dai olgeta manmeri i stap long en,
Ol bai save tru olsem mi Jehova.+
16 Dispela em i wanpela singsing sore, na ol manmeri bai singim isi ol weds bilong en;
Ol pikinini meri bilong ol kantri bai singim isi ol weds bilong en.
Ol bai singim isi ol weds bilong en long Isip na long olgeta lain bilong en,’ Nambawan Bikpela Jehova i mekim dispela tok.”
17 Orait long namba 12 yia, long namba 15 de bilong mun, Jehova i givim tok bilong em long mi olsem: 18 “Pikinini bilong man, krai bikmaus long bikpela lain bilong Isip na bringim em* i go daun long ples i stap daunbilo, em na ol pikinini meri bilong ol strongpela kantri wantaim ol man husat bai go daun long matmat.*
19 “‘Yu ting yu winim husat long naispela lukluk bilong yu? Go daun, na slip klostu long ol man i no bin katim skin!’
20 “‘Ol bai dai namel long ol man em bainat i bin kilim ol i dai.+ Bainat i kisim em* pinis; pulim em wantaim olgeta lain bilong em i go.
21 “‘Long insait tru bilong Matmat* ol strongpela man tru bilong pait bai toktok long Fero na ol man i save helpim em. Tru tumas, ol bai go daun na slip wankain olsem ol man i no bin katim skin, em ol man i bin dai long rot bilong bainat. 22 Asiria wantaim olgeta lain bilong em i stap long dispela ples. Matmat bilong ol i raunim em,* olgeta i bin dai long rot bilong bainat.+ 23 Ol matmat bilong em i stap insait tru long hul,* na ol lain bilong em i raunim matmat bilong em, olgeta i bin i dai long rot bilong bainat, bikos ol i bin kamapim bikpela pret long graun bilong ol man i stap laip.
24 “‘Elam+ i stap long dispela ples wantaim olgeta lain bilong em, ol i raunim matmat bilong em, olgeta i bin dai long rot bilong bainat. Ol i no bin katim skin na ol i go daun pinis long ples i stap daunbilo, ol i bin kamapim bikpela pret long graun bilong ol man i stap laip. Nau ol bai kisim sem wantaim ol man husat bai go daun long matmat.* 25 Ol i bin wokim wanpela bet bilong em* namel long ol man em ol i bin kilim i dai, na olgeta lain bilong em i raunim ol matmat bilong em. Olgeta i no bin katim skin, ol i bin dai long rot bilong bainat bikos ol i bin kamapim bikpela pret long graun bilong ol man i stap laip; na ol bai kisim sem wantaim ol man husat bai go daun long matmat.* Ol i bin putim em namel long ol man em ol i bin kilim i dai.
26 “‘Mesek na Tubal+ na olgeta lain bilong ol i stap long dispela ples. Ol matmat bilong ol i raunim em.* Olgeta i no bin katim skin, bainat i bin sutim ol bikos ol i bin kamapim bikpela pret long graun bilong ol man i stap laip. 27 Ating ol i no inap slip klostu long ol strongpela man bilong pait i no bin katim skin, em ol i bin dai na go daun long Matmat* wantaim ol wepen bilong ol long pait, a? Na ol bai putim bainat bilong ol aninit long het bilong ol* na putim ol sin bilong ol antap long ol bun bilong ol, bikos ol dispela strongpela man bilong pait i bin pretim tru ol manmeri long graun bilong ol man i stap laip. 28 Tasol long yu,* yu bai bagarap namel long ol man i no bin katim skin, na yu bai slip klostu long ol man i bin dai long rot bilong bainat.
29 “‘Idom+ i stap long dispela ples, na ol king na olgeta hetman bilong em tu i stap long dispela ples. Maski ol i gat bikpela strong, ol i planim ol namel long ol man i bin dai long rot bilong bainat; ol tu bai slip klostu long ol man i no bin katim skin+ na ol man husat bai go daun long matmat.*
30 “‘Olgeta prins* bilong hap not i stap long dispela ples, wantaim olgeta Saidon+ husat i bin go daun wantaim bikpela sem, maski ol i bin pretim tru ol manmeri long strong bilong ol. Ol i go daun wantaim ol man em ol i bin kilim ol i dai. Ol i no bin katim skin na ol bai slip klostu long ol man i bin dai long rot bilong bainat, na ol bai kisim sem wantaim ol man husat bai go daun long matmat.*
31 “‘Fero bai lukim olgeta dispela samting, na em bai kisim bel isi long olgeta samting i bin painim lain bilong em;+ Fero na olgeta ami bilong em bai dai long rot bilong bainat,’ Nambawan Bikpela Jehova i mekim dispela tok.
32 “‘Fero i bin kamapim bikpela pret long graun bilong ol man i stap laip, olsem na ol bai planim em na olgeta lain bilong em wantaim ol man i no bin katim skin, wantaim ol man i bin dai long rot bilong bainat,’ Nambawan Bikpela Jehova i mekim dispela tok.”