Aisaia
16 Salim wanpela sipsip man i go long king bilong dispela kantri,
Kisim long Silar na salim i go olsem long ples nating
Na i go olgeta long maunten bilong pikinini meri bilong Saion.
2 Olsem wanpela pisin em ol i ronim em long haus bilong en i go,+
Ol pikinini meri bilong Moap bai i go stap long ol hap we wara i no dip tumas long Arnon.+
3 “Givim edvais, karimaut dispela disisen.
Mekim sedo bilong yu long belo i kamap olsem tudak bilong nait.
Haitim ol manmeri husat i stap nabaut na no ken putim ol manmeri i ranawe long han bilong birua.
4 O Moap, ol manmeri bilong mi i stap nabaut i ken i kam stap long yu.
Kamap olsem wanpela ples bilong haitim ol long man bilong bagarapim ol samting.+
Man i save daunim ol arapela, em bai i no stap moa,
Dispela bagarap bai pinis,
Na ol man i save krungutim ol arapela i go daun, ol bai pinis olgeta long dispela graun.
5 Na long gutpela pasin laikim,* God bai putim na strongim wanpela sia king.
Man i sindaun long dispela sia king long haus sel bilong Devit bai mekim pasin i tru;+
Em bai mekim wok jas long pasin i fea na kwiktaim em bai karimaut stretpela pasin.”+
6 Mipela i bin harim stori long pasin antap bilong Moap—em i save apim em yet tumas+—
Pasin hambak na pasin antap bilong em na belhat bilong em;+
Tasol ol tok bilong em bai kamap samting nating.
7 Olsem na Moap bai krai bikpela long hevi i painim em;
Olgeta bai krai bikpela.+
Ol man em ol narapela i paitim ol nogut tru, ol bai krai sori long ol greip keik* bilong Kir-hereset.+
8 Long wanem, ol gaden wain bilong Hesbon+ i drai pinis,
Na ol rop wain bilong Sipma,+
Ol king bilong ol arapela kantri i krungutim ol retpela brens bilong en;*
Ol dispela brens i go kamap long Jaser;+
Na ol i go moa long ples nating.
Ol nupela kru bilong en i gro i go olgeta long solwara.
9 Olsem na bai mi krai long rop wain bilong Sipma olsem mi krai long Jaser.
O Hesbon na Eleale,+ aiwara bilong mi bai wasim yu olgeta,
Bikos bikpela singaut long ol prut bilong yu i redi long taim bilong san na long taim bilong bungim ol prut bilong yu i pinis.*
10 Bikpela amamas i no stap moa long ol lain prut diwai,
Na i no gat moa ol singsing amamas o singaut i kamap long ol gaden wain.+
Man i no krungutim moa ol greip long ples bilong krungutim greip,
Bikos mi yet i mekim na ol dispela singaut i stop.+
11 Olsem na bel bilong mi i seksek long Moap,+
Olsem ol string bilong wanpela harp,*
Na insait tru bilong mi i seksek long Kir-hereset.+
12 Maski sapos Moap i pinisim strong bilong em long ol ples antap* bilong lotu na em i go prea long tempel bilong em, prea bilong em i no inap kamapim wanpela samting.+
13 Dispela em tok Jehova i bin mekim long pastaim long samting bai painim Moap. 14 Na nau Jehova i tok: “Insait long 3-pela yia, wankain olsem ol yia bilong man ol i haiarim bilong mekim wok,* olgeta kain bagarap bai kamap na daunim na semim biknem bilong Moap, na ol manmeri i stap yet bai ol i no planti na ol i no gat strong.”+