Aisaia
31 Sori tru long lain husat i go daun long Isip bilong kisim helpim,+
Ol lain husat i putim bilip bilong ol long ol hos,+
Ol lain husat i putim trast bilong ol long ol karis bilong pait, bikos ol dispela karis i planti tumas,
Na long ol hos bilong pait,* bikos ol i gat bikpela strong.
Tasol ol i no lukluk i go long God Holi bilong Israel,
Na ol i no wok long painim Jehova.
2 Tasol em tu i gat savetingting na em bai bringim bikpela hevi,
Em bai truim ol tok bilong em.
Em bai kirap pait long lain bilong ol man nogut
Na ol man husat i helpim ol man i save mekim pasin nogut.+
3 Tasol ol Isip, ol i man nating tasol na ol i no God;
Ol hos bilong ol i animal nating tasol, ol i no spirit.+
Taim Jehova i apim han bilong em i go antap,
Wanem lain i givim helpim, ol bai pundaun
Na wanem lain i kisim helpim, ol tu bai pundaun;
Olgeta wantaim bai pinis olgeta long wankain taim.
4 Long wanem, Jehova i tokim mi olsem:
“Olsem wanpela laion i singaut, olsem wanpela strongpela yangpela laion i singaut bikpela long abus em i kisim pinis,
Na taim ol i singautim planti wasman bilong sipsip i kam bilong ronim em i go,
Laion i no pret long singaut bilong ol,
O surik liklik long bikpela nois bilong ol wasman,
Olsem tasol Jehova, bosman bilong bikpela lain ami, bai kam daun bilong pait
Long lukautim Maunten Saion na liklik maunten bilong en.
5 Olsem ol pisin i flai i kam daun kwiktaim, Jehova, bosman bilong bikpela lain ami, bai sambai long Jerusalem.+
Em bai sambai long Jerusalem na seivim em.
Em i no inap bagarapim em, nogat, em bai kisim bek em.”
6 “O ol manmeri bilong Israel, kam bek long dispela Man em yupela i bin bikhet tru long em.+ 7 Long wanem, long dispela taim, olgeta wan wan man bai givim baksait long ol yusles god bilong ol em ol i bin wokim long silva, na ol god nating bilong ol em ol i bin wokim long gol. Ol i bin wokim ol dispela god long han bilong ol yet na long dispela pasin ol i mekim sin.
8 Na Asiria bai dai long rot bilong bainat, i no long bainat bilong wanpela man;
Wanpela bainat i no bilong man, bai daunim em.+
Bainat bai mekim na em i ranawe,
Na ol yangpela man bilong em bai kamap sleiv.
9 Pret bai mekim na bikpela ston bilong em i no stap moa,
Na signal pos bai mekim na ol bikman bilong em i pret nogut tru,” dispela em tok bilong Jehova,
Lait* bilong em i stap long Saion na bikpela paia bilong em i stap long Jerusalem.