Jop
13 “Tru tumas, ai bilong mi i lukim pinis olgeta dispela samting,
Na yau bilong mi i harim na mi kliagut long en.
2 Samting yupela i save long en, mi tu i save long en;
Yupela i no winim mi liklik long wanpela samting.
3 Olsem na mi no laik toktok moa wantaim yupela, mi laik toktok wantaim God i Gat Olgeta Strong;
Mi laik kamapim klia long God olsem mi no gat asua.+
4 Tasol yupela i mekim planti tok giaman i bagarapim gutnem bilong mi;
Yupela olgeta i olsem ol dokta i no gat save bilong stretim sik bilong man.+
5 Olsem na i gutpela moa yupela i pasim maus,
Dispela bai soim olsem yupela i gat savetingting.+
6 Mi laik bai yupela i harim gut tok bilong mi,
Na putim gut yau long ol tok mi autim bilong strongim sait bilong mi.
7 Olsem wanem? Yupela i ting yupela i ken makim maus bilong God na mekim tok i no stret, a?
Na yupela i ting yupela i ken mekim tok giaman bilong helpim em, a?
8 Ating yupela i ting yupela i stap long sait bilong em, a?*
O yupela i laik sanap long kot na mekim ol tok bilong sapotim God tru, a?
9 Sapos God i skelim pasin bilong yupela, yupela ting bai yupela i stap gut, a?+
Ating yupela inap trikim God olsem yupela i save trikim ol man bilong graun, a?
10 Sapos long pasin hait yupela i mekim wansait pasin,+
Tru tumas, God bai krosim yupela.
11 Bikpela namba bilong em bai i pretim yupela
Na yupela i pret nogut tru long em.
12 Ol savetok bilong yupela i samting nating olsem sit bilong paia;
Ol tok bilong strongim sait bilong yupela i no gat strong bilong en, ol i olsem graun malumalum.
13 Yupela pasim maus na larim mi wanpela tasol i toktok.
Na wanem samting i kamap long mi, orait em i ken kamap tasol!
14 Mi redi long bagarap i ken painim mi,*
Na mi redi long lusim laip bilong mi.
15 Bai mi wet long em, maski sapos em bai kilim mi i dai;+
Mi bai tokaut* long ai bilong em olsem mi no gat asua.
17 Mi laik bai yupela i harim gut tok bilong mi;
Na putim gut yau long tok mi laik autim.
18 Harim, mi redim pinis ol tok mi bai mekim bilong kamapim long kot;
Mi save mi no gat asua.
19 Husat inap tok pait wantaim mi?
Sapos mi pasim maus na mi no toktok, orait mi ken i dai!*
20 God, mi laik askim yu long mekim 2-pela samting long mi,*
Na bai mi no hait long yu.
21 Rausim hevipela han bilong yu i go longwe long mi,
Na no ken larim pasin bilong mi long pret long yu i pretim mi moa yet.+
22 Yu toktok pastaim, na mi bai bekim tok bilong yu,
O yu larim mi toktok long yu pastaim, na yu ken bekim tok bilong mi.
23 Mi bin mekim wanem ol rong na sin?
Kamapim klia long mi wanem lo mi bin brukim na sin bilong mi.
25 Mi olsem wanpela lip nating em win i karim i go
Mi olsem pipia bilong gras i drai, olsem na wai na yu pretim mi na ranim mi?
26 Yu tingting yet long ol tok ol i sutim long mi,
Na yu mekim save long mi long ol sin mi bin mekim long taim mi yangpela.
27 Yu pasim lek bilong mi long hap plang,
Na yu lukluk gut long olgeta hap mi go long en
Na yu bihainim gut ol lek mak bilong mi.
28 Ol man* i save bagarap olsem ol samting i save bagarap na sting,
Na olsem klos em ol binatang i bin kaikai.