1 Stori

12 Sampela man i kam long Devit long Siklak+ taim em i wok long ranawe na hait long Sol,+ pikinini man bilong Kis. Ol dispela man ol i strongpela soldia na ol i bin sapotim em long pait.+ 2 Ol i save long pait long banara na ol inap sutim ston long katapel+ na sutim spia wantaim banara, maski ol i yusim rait han o left han bilong ol.+ Ol i wanlain bilong Sol long lain Benjamin.+ 3 Ahieser em hetman bilong ol. Ahieser na Joas, tupela i pikinini man bilong Simea bilong Gibea;+ na Jesiel na Pelet, tupela pikinini man bilong Asmavet,+ na Beraka, na Jehu bilong taun Anatot 4 na Ismaia bilong taun Gibeon,+ em i wanpela strongpela soldia namel long 30 hetman+ na em i bosim 30 hetman; na Jeremaia, Jahasiel, Johanan, na Josabat bilong ples Gedera, 5 Elusai, Jerimot, Bealia, Semaria, Sefatia bilong Harip, 6 Elkana, Isia, Esarel, Joeser, na Jasobeam, ol i bilong lain Kora;+ 7 na Joela na Sebadaia, tupela i pikinini man bilong Jeroham bilong ples Gedor.

8 Taim Devit i stap long ples hait long ples nating,+ sampela man bilong lain Gat i go long sait bilong Devit; ol dispela man ol i strongpela soldia na ol i kisim trening pinis long pait. Ol i redi i stap wantaim bikpela hap plang bilong pait na spia bilong ol. Long taim ol i pait, pes bilong ol i nogut tru olsem pes bilong ol laion na ol i save ron spit olsem ol gasel* antap long ol ples maunten. 9 Hetman bilong ol em Eser, na namba 2 em Obadia, namba 3 em Eliap, 10 na namba 4 em Mismana, na namba 5 em Jeremaia, 11 na namba 6 em Atai, na namba 7 em Eliel, 12 na namba 8 em Johanan, na namba 9 em Elsabat, 13 na namba 10 em Jeremaia, na namba 11 em Makbanai. 14 Dispela ol man ol i bilong lain Gat+ na ol i hetman bilong ami. Long taim bilong pait, man i no gat strong inap daunim 100 soldia, na man i gat strong inap daunim 1,000 soldia.+ 15 Ol dispela hetman i bin brukim Wara Jordan long namba 1 mun taim Wara Jordan i tait bikpela tru na i abrusim mak bilong en, na ol i rausim olgeta manmeri i stap long ol ples daun na ol dispela manmeri i go nabaut long hap is na hap wes.

16 Sampela man long lain Benjamin na lain Juda, ol tu i kam long Devit long ples hait bilong em.+ 17 Na Devit i go bungim ol na em i tokim ol olsem: “Sapos yupela i kam wantaim bel isi bilong helpim mi, orait mi bai kamap pren bilong yupela. Tasol mi yet i no gat asua, olsem na sapos yupela i laik putim mi long han bilong ol birua bilong mi, orait God bilong ol tumbuna papa bilong yumi i ken lukim na kotim yupela.”+ 18 Na spirit bilong God i kam i stap long Amasai,+ hetman bilong 30 soldia, na em i tok:

“O Devit, pikinini man bilong Jesi, mipela i lain bilong yu, na mipela i stap long sait bilong yu.+

So Devit i kisim ol dispela man na em i makim ol olsem ol hetman bilong ol soldia bilong em.

19 Taim Devit i go wantaim ol Filistia long pait wantaim Sol, sampela soldia long lain bilong Manase i lusim Sol na ol i go joinim Devit; tasol Devit i no helpim ol Filistia, long wanem, ol bikman bilong ol Filistia+ i bin toktok namel long ol yet na ol i no larim em i go wantaim ol. Ol i tok olsem: “Em bai ranawe i go long bikman bilong em, Sol, na laip bilong yumi bai lus.”+ 20 Taim Devit i go long Siklak,+ ol dispela man long lain Manase i kam joinim em. Nem bilong ol em Etna, Josabat, Jediael, Maikel, Josabat, Elihu, na Siletai. Ol dispela man i hetman bilong planti tausen soldia bilong Manase.+ 21 Ol i helpim Devit long pait wantaim ol soldia i save kam stilim ol samting, long wanem, olgeta dispela man ol i strongpela man na ol i no save pret+ na ol i kamap kepten bilong ami. 22 Na long olgeta de ol man i wok long i kam bilong helpim Devit.+ Olsem na dispela ami i kamap planti tru olsem ami bilong God.+

23 Dispela em namba bilong ol hetman bilong ol soldia i redi long pait em ol i kam long Devit taim em i stap long Hebron,+ na ol i laik mekim em i kamap king na bai em i kisim ples bilong Sol, olsem Jehova i bin tok.+ 24 Namba bilong ol soldia bilong lain Juda em ol i karim ol bikpela hap plang bilong pait na ol spia na ol i redi long pait em inap 6,800. 25 Na long lain Simeon, namba bilong ol strongpela soldia bilong ami na ol i no save pret em inap 7,100.

26 Na long lain Livai, namba bilong ol soldia em inap 4,600. 27 Jehoiada+ em i lida bilong ol pikinini man bilong Aron.+ Na namba bilong ol soldia i kam wantaim Jehoiada em inap 3,700. 28 Na tu, Sadok,+ wanpela yangpela man i gat strong na em i no save pret. Em i kam wantaim 22 hetman bilong lain tumbuna papa bilong em.

29 Na long lain Benjamin, em lain bilong Sol,+ i gat 3,000 soldia. Pastaim planti soldia bilong dispela lain i bin helpim Sol na lain famili bilong Sol. 30 Long lain Efraim, i gat 20,800 soldia. Ol i strongpela soldia na ol i no save pret na ol i gat biknem namel long wan wan lain bilong tumbuna papa bilong ol.

31 Na long hap traib bilong Manase, i gat 18,000 soldia em ol i bin kolim nem bilong ol na makim ol long kam mekim Devit i kamap king. 32 Long traib bilong Isakar, i gat 200 hetman i bosim olgeta soldia bilong Isakar. Ol dispela hetman i save long as bilong ol samting i kamap na long wanem samting ol Israel i mas mekim. 33 Long Sebulun, i gat 50,000 soldia em ol inap insait long ami, ol i redi long pait na ol i gat olgeta samting bilong pait, olgeta i joinim Devit wantaim wanpela tingting tasol.* 34 Long Naptali, i gat 1,000 hetman wantaim 37,000 soldia i karim ol bikpela hap plang bilong pait na ol spia. 35 Long Dan, i gat 28,600 soldia i redi long pait. 36 Long Aser, i gat 40,000 soldia em ol inap insait long ami na ol i redi long pait.

37 Na long hapsait bilong Wara Jordan,+ ol Ruben, ol Gat, na hap traib bilong Manase, ol i gat 120,000 soldia. Ol dispela soldia i gat ol kain kain samting bilong pait. 38 Olgeta dispela man ol i man bilong pait na ol i kam bung bilong mekim pait; olgeta i gat wanpela tingting tasol na ol i kam long Hebron bilong mekim Devit i kamap king bilong ol Israel. Na olgeta arapela Israel i gat wanpela tingting tasol na ol i laik mekim Devit i kamap king.+ 39 Na ol i stap wantaim Devit inap 3-pela de long Hebron na ol i kaikai na dring, long wanem, ol man bilong Juda i bin redim kaikai bilong ol. 40 Na ol man i stap klostu long ol na ol man i stap long graun bilong Isakar, Sebulun, na Naptali, ol i putim ol kaikai antap long ol donki, ol kamel, ol miul,* na ol bulmakau na bringim i kam. Ol i bringim ol kaikai olsem plaua, ol fik keik* na ol resin, wain, oil, na planti bulmakau na sipsip. Na bikpela amamas tru i kamap long Israel.