Jop
23 Orait Jop i bekim tok olsem:
2 “Harim. Nau tu mi laik toktok planti long hevi bilong mi.+
Mi wari tumas long ol samting i painim mi na dispela i pinisim strong bilong mi.
3 Sori tumas, sapos mi save long ples God i save stap long en,+
Mi bai go stret long ples bilong em!+
4 Na mi bai bringim kot bilong mi i go long ai bilong em
Na mi bai mekim planti toktok bilong helpim kot bilong mi;
5 Na mi bai putim yau long tok em bai bekim long mi,
Na mi bai tingim tok em i mekim long mi.
6 Yu ting em bai birua long mi na daunim mi long bikpela strong bilong em, a?
Nogat tru, em bai putim yau long tok bilong mi.+
7 Stretpela man inap bringim kot bilong em i go long ai bilong em na stretim,
Na Jas bilong mi bai harim tok bilong mi, na tokaut olsem mi no gat asua long wanpela samting.
8 Mi go painim em long hap is, tasol em i no stap,
Na mi go painim em long hap wes, tasol mi no lukim em.
9 Em i save mekim wok long hap not, tasol mi no lukim em,
Na em* i tanim i go long hap saut, tasol mi no lukim em tu.
10 Em i save long olgeta wokabaut bilong mi.+
Na taim em i traim mi pinis, em bai lukim mi i kamap gutpela tru olsem gutpela gol.+
11 Oltaim mi save bihainim gut lek mak bilong em,
Mi no bin lusim rot bilong em na bihainim narapela rot.+
12 Mi no bin sakim wanpela tok i kam long maus bilong em. Nogat tru.
Mi laikim tumas ol tok bilong em+ na mi bihainim olgeta tok em i bin givim mi.*
13 Sapos em i tingting long mekim wanpela samting, orait husat inap pasim em?+
Taim em i laik mekim wanpela samting, em i save mekim tasol.+
14 Na ol samting em i bin tingting long mekim* long mi, em bai mekim.
Em i tingim kain kain samting olsem bilong mekim long mi.
15 Olsem na bel bilong mi i no stap isi,
Mi tingim ol pasin bilong em na dispela i mekim mi i pret moa yet.
16 God i pinisim strong bilong mi,
Na God i Gat Olgeta Strong i mekim mi i pret nogut tru.
17 Tasol bikpela tudak i no pasim mi long toktok,
Maski em i karamapim pes bilong mi.