1 Stori
5 Dispela em ol pikinini man bilong Ruben,+ fesbon bilong Israel. Ruben em i fesbon, tasol em i bin mekim doti* bet bilong papa bilong em,+ olsem na em i lusim dispela rait olsem fesbon pikinini. Na dispela rait i go long ol pikinini man bilong Josep,+ pikinini man bilong Israel. Em as na Ruben i no stap olsem namba 1 pikinini long lista bilong lain famili bilong Israel. 2 Tru, Juda+ i gat biknem namel long ol brata bilong em na wanpela lida bai kamap long lain bilong em,+ tasol Josep i gat dispela rait olsem fesbon pikinini. 3 Ol pikinini man bilong Ruben, fesbon bilong Israel, em Hanok, Palu, Hesron, na Karmi.+ 4 Lain bilong Joel i olsem, Joel em i papa bilong Semaia, na Semaia em i papa bilong Gok, na Gok em i papa bilong Simei. 5 Simei em i papa bilong Maika, na Maika em i papa bilong Reaia, na Reaia em i papa bilong Bal, 6 na Bal em i papa bilong Biera. Biera em i wanpela hetman bilong lain Ruben, na King Tilgat-pilneser+ bilong Asiria i bin kisim em i go olsem kalabus. 7 Lista bilong lain famili bilong ol brata bilong em i olsem, hetman bilong ol em Jeiel, Sekaraia, 8 na Bela. Bela em i pikinini man bilong Asas, na Asas em i pikinini man bilong Sima, na Sima em i pikinini man bilong Joel. Ol lain famili bilong Bela i save stap long Aroer+ i go inap long Nebo na Bal-meon.+ 9 Ol i sindaun long hap is i go inap long stat bilong ples nating klostu long Wara Yufretis,+ long wanem, ol i gat planti animal tru long graun bilong Gileat.+ 10 Long taim bilong Sol, ol i bin pait long lain Hagar na winim ol long pait. Na ol i sindaun long ol haus sel bilong ol long olgeta graun i stap long hap is bilong Gileat.
11 Lain tumbuna pikinini bilong Gat i sindaun klostu long ol long graun bilong Basan i go inap long Saleka.+ 12 Long Basan, Joel em i hetman bilong ol, Safam em i namba 2 hetman, na Jenai na Safat tu i lida bilong ol. 13 Na ol wanblut bilong ol em Maikel, Mesulam, Seba, Jorai, Jakan, Saia, na Eber, inap 7-pela olgeta. 14 Ol i pikinini man bilong Abihail. Abihail em i pikinini man bilong Huri, na Huri em i pikinini man bilong Jaroa, na Jaroa em i pikinini man bilong Gileat, na Gileat em i pikinini man bilong Maikel, na Maikel em i pikinini man bilong Jesisai, na Jesisai em i pikinini man bilong Jado, na Jado em i pikinini man bilong Bus. 15 Ahi em i hetman bilong lain bilong tumbuna papa bilong ol. Ahi em i pikinini man bilong Apdiel, na Apdiel em i pikinini man bilong Guni. 16 Ol i stap long Gileat+ na long Basan+ na ol taun i stap klostu long en. Na ol i stap long olgeta hap bilong Saron we i gat gutpela gras. 17 Ol i bin raitim nem bilong ol long lista bilong lain famili bilong ol long taim bilong King Jotam+ bilong Juda na long taim bilong King Jeroboam*+ bilong Israel.
18 Traib bilong Ruben, Gat, na hap traib bilong Manase i gat 44,760 strongpela man bilong pait long ami bilong ol. Ol dispela man i save karim hap plang bilong pait na bainat na banara, na ol i kisim trening pinis long pait. 19 Ol i go pait long ol lain Hagar,+ na Jetur, Nafis,+ na Nodap. 20 Taim ol i bin go pait long ol Hagar, ol i beten askim God long helpim ol long pait, na God i harim beten bilong ol, long wanem, ol i bilip long em.+ Na God i helpim ol long winim pait long ol Hagar na long olgeta lain i stap wantaim ol. 21 Ol i kisim ol animal bilong ol—50,000 kamel, 250,000 sipsip, na 2,000 donki—na ol i kisim tu 100,000 manmeri. 22 Ol i kilim planti manmeri tru i dai, long wanem, God tru i bin mekim dispela pait.+ Na ol i kisim ples bilong ol dispela lain na stap long dispela hap i go inap long taim ol birua i kam kisim ol i go olsem ol kalabus.+
23 Ol lain tumbuna pikinini bilong hap traib bilong Manase+ i stap long graun bilong Basan i go inap long Bal-hermon na Senir na Maunten Hermon.+ Ol i planti tru. 24 Ol hetman bilong lain bilong ol tumbuna papa bilong ol i olsem: Efer, Isi, Eliel, Esriel, Jeremaia, Hodavia, na Jadiel; ol i strongpela man bilong pait, ol i gat biknem, na ol i hetman bilong lain bilong tumbuna papa bilong ol. 25 Tasol ol i no stap gut long God bilong ol tumbuna papa bilong ol na ol i kirap lotuim ol arapela god* bilong ol manmeri long hap ol i stap long en,+ em ol manmeri God i bin pinisim ol olgeta long ai bilong ol. 26 Olsem na God bilong Israel i kirapim tingting bilong King Pul bilong Asiria+ (em King Tilgat-pilneser+ bilong Asiria) na em i kam kisim ol manmeri long traib bilong Ruben, Gat, na hap traib bilong Manase na bringim ol i go olsem ol kalabus long Hala, Habor, Hara, na Wara Gosan,+ na ol i stap long ol dispela hap i kam inap long nau.