Namba

28 Na Jehova i tokim Moses olsem: 2 “Yu mas tokim ol Israel olsem, ‘Yupela i mas givim ol ofa long mi. Ol dispela ofa em ol kaikai yupela i bringim i kam. Yupela i mas kukim ol dispela ofa long paia bilong kamapim gutpela smel i kam long mi na yupela i mas mekim ol dispela ofa long taim mi bin makim+ long yupela.’

3 “Na yu mas tokim ol, ‘Yupela i mas givim ol dispela ofa em yupela i kukim long paia i go long Jehova. Long olgeta de+ yupela i mas bringim 2-pela yangpela sipsip man i gat 1-pela krismas, em ol i no gat sik o bagarap long skin bilong ol. Dispela 2-pela sipsip i bilong mekim ofa bilong paia i kukim olgeta. 4 Yupela i mas ofaim wanpela sipsip man long moningtaim, na narapela sipsip man long apinun tru.*+ 5 Na yupela i mas ofaim tu 10 pesen bilong 1-pela ifa* bilong gutpela plaua em yupela i bin tanim wantaim 25 pesen bilong 1-pela hin* oil olsem ofa bilong wit samting.+ 6 Yupela i mas mekim dispela ofa bilong paia i kukim olgeta long olgeta de.+ Ol i bin kirap mekim dispela ofa long Maunten Sainai, em ofa ol i kukim long paia i go long Jehova i kamapim gutpela smel. 7 Na yupela i mas kapsaitim 25 pesen bilong 1-pela hin* wain olsem ofa bilong wain wantaim wanpela yangpela sipsip man.+ Yupela i mas kapsaitim dispela wain insait long ples holi olsem ofa bilong wain long Jehova. 8 Na yupela i mas ofaim narapela yangpela sipsip man long apinun tru* wantaim ofa bilong wit samting na ofa bilong wain olsem yupela i bin mekim long moning. Yupela i mas mekim dispela ofa em yupela i kukim long paia i kamapim gutpela smel i go long Jehova.+

9 “‘Tasol long de Sabat+ yupela i mas ofaim 2-pela yangpela sipsip man i gat 1-pela krismas na i no gat sik o bagarap long skin bilong ol. Na yupela i mas kisim gutpela plaua em skel bilong en inap 20 pesen bilong 1-pela ifa* na tanim wantaim oil, na givim olsem ofa bilong wit samting wantaim ofa bilong wain. 10 Yupela i mas mekim dispela ofa bilong paia i kukim olgeta long de Sabat. Na yupela i mas ofaim tu ol ofa bilong paia i kukim olgeta na ofa bilong wain,+ em yupela i save ofaim long olgeta de.

11 “‘Long de namba 1 bilong olgeta mun, yupela i mas mekim ofa bilong paia i kukim olgeta long Jehova. Yupela i mas ofaim 2-pela yangpela bulmakau man, wanpela sipsip man, na 7-pela yangpela sipsip man i gat 1-pela krismas em ol i no gat sik o bagarap long skin bilong ol.+ 12 Na yupela i mas mekim ofa bilong wit samting+ wantaim dispela ofa. Yupela i mas kisim 30 pesen bilong 1-pela ifa* bilong gutpela plaua em yupela i tanim wantaim oil na ofaim wantaim wan wan bulmakau. Na yupela i mas kisim 20 pesen bilong 1-pela ifa* bilong gutpela plaua em yupela i tanim wantaim oil na ofaim wantaim dispela sipsip man.+ 13 Na yupela i mas kisim 10 pesen bilong 1-pela ifa bilong gutpela plaua em yupela i bin tanim wantaim oil na ofaim olsem ofa bilong wit samting wantaim olgeta wan wan yangpela sipsip man. Dispela em ofa bilong paia i kukim olgeta. Em ofa i kamapim gutpela smel,+ we ol i kukim long paia i go long Jehova. 14 Na yupela i mas kisim 50 pesen bilong 1-pela hin* wain na kapsaitim olsem ofa wantaim wanpela bulmakau.+ Na kisim 33 pesen bilong 1-pela hin* wain na kapsaitim olsem ofa wantaim wanpela sipsip man.+ Na kisim 25 pesen bilong 1-pela hin* wain na kapsaitim olsem ofa wantaim olgeta wan wan sipsip man.+ Yupela i mas mekim dispela ofa bilong paia i kukim olgeta long wan wan mun long yia olgeta. 15 Na tu, yupela i mas ofaim long Jehova wanpela yangpela meme olsem ofa bilong tekewe sin. Yupela i mas mekim dispela ofa wantaim ofa bilong paia i kukim olgeta na ofa bilong wain em yupela i save mekim long olgeta de.

16 “‘Long namba 14 de bilong namba 1 mun, yupela i mas mekim bung bilong Pasova bilong Jehova.+ 17 Na long namba 15 de bilong dispela mun, yupela i mas mekim bikpela bung. Na yupela i mas kaikai bret i no gat yis inap 7-pela de.+ 18 Long namba 1 de, yupela i mas mekim wanpela bung holi. Na yupela i no ken mekim wok bilong yupela. 19 Yupela i mas kisim 2-pela yangpela bulmakau man, wanpela sipsip man, na 7-pela yangpela sipsip man em ol i gat wanpela krismas. Ol dispela animal i no ken i gat sik o bagarap long skin bilong ol.+ Na yupela i mas mekim ofa bilong paia i kukim olgeta long Jehova em ofa yupela i kukim long paia. 20 Yupela i mas ofaim ol dispela animal wantaim ofa bilong wit samting. Yupela i mas kisim 30 pesen bilong 1-pela ifa* bilong gutpela plaua em yupela i tanim wantaim oil+ na ofaim wantaim wanpela bulmakau man, na kisim 20 pesen bilong 1-pela ifa* bilong gutpela plaua em yupela i tanim wantaim oil na ofaim wantaim wanpela sipsip man. 21 Yupela i mas kisim 10 pesen bilong 1-pela ifa bilong gutpela plaua em yupela i tanim wantaim oil na ofaim wantaim olgeta wan wan bilong ol 7-pela yangpela sipsip man. 22 Na tu, yupela i mas ofaim wanpela meme olsem ofa bilong tekewe sin. Na dispela ofa bai karamapim sin bilong yupela. 23 Yupela i mas mekim ol dispela ofa, na tu, yupela i mas mekim ofa bilong paia i kukim olgeta em yupela i save mekim long ol moning, em hap bilong ofa bilong paia i kukim olgeta yupela i save mekim long olgeta de. 24 Yupela i mas bihainim wankain pasin long mekim ol dispela ofa long olgeta wan wan de long ol dispela 7-pela de. Yupela i mas mekim ol dispela ofa olsem kaikai* ol i kukim long paia na i kamapim gutpela smel i go long Jehova. Yupela i mas mekim ol dispela ofa wantaim ol ofa bilong paia i kukim olgeta na ofa bilong wain em yupela i save mekim long olgeta de. 25 Long de namba 7 yupela i mas mekim wanpela bung holi.+ Yupela i no ken mekim wok bilong yupela.+

26 “‘Yupela i mas givim ofa bilong nupela wit samting long Jehova+ long taim ol namba 1 kaikai i redi long gaden.+ Yupela i mas mekim wanpela bung holi taim yupela i mekim bung bilong amamas long kisim kaikai long gaden.+ Na yupela i no ken mekim wok bilong yupela.+ 27 Yupela i mas kisim 2-pela yangpela bulmakau man, 1-pela sipsip man, na 7-pela yangpela sipsip man em ol i gat wanpela krismas.+ Na yupela i mas ofaim ol olsem ofa bilong paia i kukim olgeta i kamapim gutpela smel i go long Jehova. 28 Na yupela i mas mekim ofa bilong wit samting wantaim dispela ofa. Yupela i mas kisim 30 pesen bilong 1-pela ifa* bilong gutpela plaua em yupela i tanim wantaim oil na ofaim wantaim wan wan bulmakau. Na yupela i mas kisim 20 pesen bilong 1-pela ifa* bilong gutpela plaua em yupela i bin tanim wantaim oil na ofaim wantaim dispela sipsip man. 29 Na yupela i mas kisim 10 pesen bilong 1-pela ifa bilong gutpela plaua em yupela i bin tanim wantaim oil na ofaim wantaim olgeta wan wan bilong dispela 7-pela yangpela sipsip man, 30 na tu, wanpela yangpela meme bilong karamapim sin bilong yupela.+ 31 Ol dispela animal yupela i ofaim, ol i no ken i gat sik o bagarap long skin bilong ol.+ Yupela i mas mekim ol dispela ofa wantaim ol narapela ofa bilong paia i kukim olgeta na ofa bilong wit samting na ofa bilong wain, em yupela i save mekim long olgeta de.