1 Stori
10 Ol Filistia i wok long pait long ol Israel. Na ol Israel i ranawe long ol Filistia, na ol Filistia i kilim i dai planti bilong ol long Maunten Gilboa.+ 2 Na ol Filistia i wok long ranim Sol na ol pikinini man bilong em. Na ol i kilim i dai Jonatan, Abinadap, na Malki-sua,+ em ol pikinini man bilong Sol. 3 Na ol Filistia i pait strong tru na ol man bilong sut long banara i sutim ol banara na banara i kisim Sol na em i kisim bagarap.+ 4 Na Sol i tokim man i save karim ol samting bilong em long pait olsem: “Kisim bainat bilong yu na kilim mi i dai, nogut ol dispela man i no katim skin* i kam na mekim nogut+ long mi.” Tasol dispela man i pret nogut tru na em i no laik mekim samting em Sol i tok long en. Olsem na Sol i holim bainat na pundaun antap long sap bilong en.+ 5 Taim dispela man i lukim olsem Sol i dai, orait em tu i pundaun antap long sap bilong bainat bilong em yet na em i dai. 6 Olsem na long dispela de, Sol wantaim 3-pela pikinini man bilong em, na olgeta lain long famili bilong Sol em ol i bin stap wantaim em long dispela taim, ol i dai.+ 7 Ol manmeri bilong Israel i stap long veli* i harim olsem olgeta man i ranawe. Na ol i harim olsem Sol na ol pikinini man bilong em i dai pinis. Olsem na ol i lusim ol taun bilong ol na ranawe; na ol Filistia i kam sindaun long ol dispela taun.
8 Long neks de, ol Filistia i go bilong kisim ol samting bilong ol soldia bilong ol Israel em ol i dai pinis. Na ol i lukim bodi bilong Sol na ol pikinini man bilong em i stap long Maunten Gilboa.+ 9 Orait ol i kisim ol samting bilong Sol na ol klos pait bilong em na ol i katim na rausim het bilong em. Na ol i salim tok long dispela samting i go long olgeta hap bilong Filistia na long ol haus bilong ol imis bilong ol+ na long ol manmeri bilong ol. 10 Na ol i putim ol klos pait bilong Sol long haus* bilong god bilong ol na nilim het bilong em long haus bilong god Dagon.+
11 Taim ol manmeri bilong taun Jabes+ long Gileat i harim tok long olgeta dispela samting ol Filistia i bin mekim long Sol,+ 12 ol strongpela soldia bilong ol i go na kisim bodi bilong Sol na bodi bilong ol pikinini man bilong em. Na ol i bringim bodi bilong ol i go bek long Jabes na planim ol bun bilong ol aninit long bikpela diwai long Jabes.+ Na ol i tambu long kaikai inap 7-pela de.
13 Sol i dai, long wanem, em i no stap gut long Jehova na em i sakim tok bilong Jehova.+ Na tu, em i bin go toktok wantaim wanpela meri i save toktok wantaim ol daiman,+ 14 na em i no kisim tingting bilong Jehova. So God i kilim em i dai na God i givim wok king i go long Devit, pikinini man bilong Jesi.+