Kisim Bek

38 Bihain em i kisim diwai akas na wokim alta bilong mekim ofa bilong paia i kukim olgeta. Alta i skwe, na longpela bilong en inap 5-pela kiubit,* bikpela bilong en inap 5-pela kiubit, na em i go antap inap 3-pela kiubit.+ 2 Em i wokim ol kom long 4-pela kona bilong en. Ol kom i hap bilong alta. Na em i karamapim long kopa.+ 3 Bihain em i wokim olgeta samting bilong alta. Em i wokim ol baket bilong kisim sit bilong paia, ol savol, ol boul, ol fok, na ol plet bilong karim paia. Em i wokim olgeta dispela samting long kopa. 4 Em i kisim sampela kopa ba na pasim wantaim na wokim waia rek bilong alta. Na em i putim aninit long boda i raunim maus bilong alta. Na waia rek i stap namel insait long alta. 5 Na em i wokim 4-pela ring long 4-pela kona bilong alta, klostu long kopa waia rek. Ol dispela ring i bilong holim ol longpela stik. 6 Bihain em i kisim diwai akas na sapim 2-pela longpela stik na karamapim ol long kopa. 7 Na em i putim ol dispela longpela stik i go insait long ol ring i stap long 2-pela sait bilong alta bilong karim alta. Em i wokim alta olsem wanpela boks.

8 Bihain em i wokim dis na tebol bilong dis long kopa.+ Bilong mekim olsem, em i kisim ol mira* long ol meri i mekim wok long dua bilong haus sel bilong bung.

9 Bihain em i wokim ples bung.+ Long saut sait bilong ples bung i feisim hap saut, em i wokim banis long laplap ol i wokim long gutpela tret linen. Longpela bilong laplap em inap 100 kiubit.+ 10 Na em i wokim 20 pos na 20 kopa soket beis. Na em i kisim silva na wokim ol huk bilong ol pos na ol samting bilong joinim* ol laplap na pos. 11 Na tu, long hap not em i wokim banis long laplap. Longpela bilong en inap 100 kiubit. Em i wokim 20 pos na 20 soket beis long kopa. Na em i kisim silva na wokim ol huk bilong pos na ol samting bilong joinim* ol laplap na pos. 12 Tasol long hap wes, longpela bilong banis ol i wokim long laplap em 50 kiubit. Em i wokim 10-pela pos na 10-pela soket beis. Na em i kisim silva na wokim ol huk bilong ol pos na ol samting bilong joinim* ol laplap na pos. 13 Long hap is long hap sankamap, longpela bilong banis em 50 kiubit. 14 Long wanpela sait bilong dua bilong ples bung, longpela bilong banis ol i wokim long laplap em 15 kiubit. Na i gat 3-pela pos na 3-pela soket beis. 15 Na long narapela sait bilong dua bilong ples bung, longpela bilong banis ol i wokim long laplap em 15 kiubit. Na i gat 3-pela pos na 3-pela soket beis. 16 Em i wokim olgeta laplap bilong banis bilong raunim ples bung long gutpela tret linen. 17 Em i wokim ol soket beis bilong ol pos long kopa, na em i kisim silva na wokim ol huk bilong ol pos na ol samting bilong joinim* ol laplap na pos. Na em i karamapim het bilong ol pos long silva. Na em i wokim tu ol samting bilong joinim olgeta pos bilong ples bung long silva.+

18 Em i kisim blupela tret, pepol wul, retpela tret,* na gutpela tret linen, na em i wivim wantaim na wokim keten bilong dua bilong ples bung. Longpela bilong en inap 20 kiubit na em i go antap inap 5-pela kiubit wankain olsem ol laplap long banis bilong ples bung.+ 19 Em i kisim kopa na wokim 4-pela pos na 4-pela soket beis bilong ol. Na em i wokim ol huk na ol samting bilong joinim* ol pos long silva, na em i karamapim het bilong ol pos long silva. 20 Em i kisim kopa+ na wokim olgeta longpela pin bilong taitim na strongim haus sel na banis bilong ples bung.

21 Moses i tokim ol long kaunim namba bilong ol samting i stap long haus lotu sel, em haus sel i gat Bokis Kontrak.+ Ol Livai+ i mekim dispela wok, na Itamar,+ pikinini man bilong pris Aron i bosim dispela wok. 22 Besalel,+ pikinini man bilong Uri, em tumbuna pikinini bilong Hur long traib bilong Juda, i mekim olgeta samting olsem Jehova i bin tokim Moses. 23 Besalel i wok wantaim Oholiap,+ em pikinini man bilong Ahisamak long traib bilong Dan. Oholiap em i saveman bilong wokim ol samting na em i save yusim tret long wokim ol piksa long ol laplap. Na em i man bilong wivim blupela tret, pepol wul, retpela tret, na gutpela linen.

24 Olgeta gol ol i yusim bilong wokim olgeta samting bilong ples holi em ol gol ol manmeri i bin givim olsem ofa bilong mekim i go i kam.+ Hevi bilong olgeta gol em inap 29 talen* na 730 sekel* na dispela i stret wantaim mak bilong sekel bilong ples holi.* 25 Ol man em ol i bin rejistaim nem bilong ol na ol i bin kisim ol silva i kam, hevi bilong ol dispela silva em inap 100 talen na 1,775 sekel. Dispela i stret wantaim mak bilong sekel bilong ples holi.* 26 Namba bilong ol man em ol i bin rejistaim na ol i gat 20 krismas na i go antap+ em 603,550.+ Olgeta wan wan i givim hap sekel i stret wantaim mak bilong sekel bilong ples holi.*

27 Ol i yusim 100 talen bilong wokim ol soket beis bilong ples holi na bilong ol pos i stap klostu long keten bilong haitim Rum Holi Tru. Mak bilong wokim 100 soket beis em 100 talen, 1-pela talen bilong 1-pela soket beis.+ 28 Na em i yusim 1,775 silva sekel bilong wokim ol huk bilong ol pos na bilong karamapim het bilong ol pos na joinim ol wantaim.

29 Hevi bilong kopa ol i givim olsem ofa* em inap 70 talen na 2,400 sekel. 30 Na em i yusim olgeta dispela kopa bilong wokim ol soket beis bilong dua bilong haus sel bilong bung, na kopa alta, kopa waia rek bilong alta, olgeta samting bilong alta, 31 ol soket beis bilong ples bung insait long banis, na ol soket beis bilong dua bilong ples bung, na ol longpela pin bilong taitim na strongim haus sel+ na banis i raunim haus sel.