Stat
48 Bihain ol i tokim Josep olsem: “Papa bilong yu i sik.” Taim Josep i harim olsem, em i kisim tupela pikinini man bilong em, Manase na Efraim,+ na ol i go lukim Jekop. 2 Na ol i tokim Jekop olsem: “Pikinini bilong yu, Josep, i kam bilong lukim yu.” Na Jekop i strongim em yet na kirap sindaun long bet. 3 Na Jekop i tokim Josep olsem:
“God i Gat Olgeta Strong i bin kamap long mi long Lus long graun Kenan na blesim mi.+ 4 Na em i tokim mi olsem, ‘Bai mi givim yu planti pikinini na lain pikinini bilong yu bai kamap planti tru, na ol tumbuna pikinini bilong yu bai kamap bikpela lain manmeri.+ Na bai mi givim dispela graun long lain tumbuna pikinini bilong yu na em bai stap graun bilong ol inap oltaim.’+ 5 Tupela pikinini man bilong yu em yu bin kamapim long Isip paslain long mi kam long Isip, tupela bai kamap pikinini bilong mi.+ Efraim na Manase bai stap pikinini tru bilong mi wankain olsem Ruben na Simeon.+ 6 Tasol ol pikinini yu kamapim bihain long Efraim na Manase, ol bai stap pikinini bilong yu. Ol dispela pikinini bai kisim hap graun bilong ol insait long graun bilong Efraim na Manase.+ 7 Taim mi bin lusim Padan na kam, mama bilong yu Resel, i dai+ long graun Kenan taim mi stap longwe liklik long Efrat.+ Olsem na mi bin planim em long arere bilong rot i go olsem long Efrat, narapela nem bilong en, Betlehem.”+
8 Na Israel i lukim tupela pikinini man bilong Josep na em i tok: “Husat dispela tupela pikinini?” 9 Na Josep i tokim papa bilong em olsem: “Em tupela pikinini bilong mi. God i bin givim tupela long mi taim mi stap hia long dispela ples.”+ Orait Jekop i tok: “Plis bringim tupela i kam klostu long mi na bai mi ken blesim ol.”+ 10 Jekop i lapun tru na ai bilong em i nogut na em i no inap lukluk gut. Olsem na Josep i bringim tupela pikinini i kam klostu long Jekop, na em i holimpasim tupela na givim kis long tupela. 11 Na Israel i tokim Josep olsem: “Mi bin ting mi no inap lukim yu gen.+ Tasol nau God i larim mi i lukim ol pikinini bilong yu.” 12 Na Josep i muvim tupela pikinini i go longwe liklik long lek bilong Israel, na em i brukim skru na putim pes bilong em i go daun long graun.
13 Josep i bringim tupela pikinini i go long Israel. Em i holim Efraim+ long rait han na bai em i ken sanap long left sait bilong Israel. Na em i holim Manase+ long left han na bai em i ken sanap long rait sait bilong Israel, na em i bringim tupela i go klostu long Israel. 14 Tasol Israel i putim rait han bilong em antap long het bilong Efraim, maski Efraim em i liklik brata. Na Israel i putim left han bilong em antap long het bilong Manase. Em i min long mekim olsem, maski em i save olsem Manase i fesbon.+ 15 Na em i blesim Josep na tok:+
“Dispela God tru, em tumbuna bilong mi Abraham, na papa bilong mi Aisak, i bin bihainim tok bilong em,+
Em dispela God tru husat i bin lukautim mi* long laip olgeta bilong mi i kam inap nau,+
16 Na em i dispela ensel* i bin kisim bek mi long olgeta hevi,+ em i ken blesim dispela tupela mangi.+
Tupela i ken holim nem bilong mi, na nem bilong tumbuna bilong mi Abraham, na nem bilong papa bilong mi Aisak,
Lain tumbuna pikinini bilong tupela i ken kamap planti long graun.”+
17 Taim Josep i lukim olsem rait han bilong papa i stap long het bilong Efraim, em i no amamas. Olsem na Josep i holim han bilong papa na em i laik rausim long het bilong Efraim na putim long het bilong Manase. 18 Na Josep i tokim papa: “Papa yu no ken mekim olsem, long wanem, dispela mangi em i fesbon.+ Putim rait han bilong yu long het bilong em.” 19 Tasol papa bilong Josep i no laik na em i tok olsem: “Mi save pikinini, mi save. Ol lain pikinini bilong em bai kamap wanpela lain na ol bai i gat nem. Tasol liklik brata bilong em bai i gat biknem moa winim em,+ na ol lain pikinini bilong em bai kamap bikpela lain tru olsem ol manmeri bilong planti kantri.”+ 20 Na em i blesim tupela long dispela de,+ na em i tok:
“Ol Israel i ken kolim nem bilong yu taim ol i blesim narapela narapela na tok olsem,
‘God i ken blesim yu olsem em i bin mekim long Efraim na Manase.’”
Taim em i blesim tupela, em i wok long putim Efraim i go pas long Manase.
21 Na Israel i tokim Josep olsem: “Harim, klostu nau bai mi dai.+ Tasol God bai stap wantaim yupela, na em bai bringim yupela i go bek long graun bilong ol tumbuna bilong yupela.+ 22 Mi bai givim yu wanpela hap graun moa winim ol brata bilong yu. Bipo mi bin holim bainat na banara na pait long ol Amor na mi kisim dispela graun.”