Jeremaia
15 Orait Jehova i tokim mi olsem: “Maski sapos Moses na Samuel i sanap long ai bilong mi,+ bai mi i no inap mekim gut long ol dispela manmeri. Rausim ol i go longwe long mi. Na larim ol i go. 2 Na sapos ol i tokim yu olsem, ‘Mipela bai i go we?’ Orait yu mas tokim ol olsem, ‘Jehova i tok olsem:
“Sampela bilong yupela bai i dai long bikpela sik!
Na sampela bilong yupela bai i dai long bainat!+
Na sampela bilong yupela bai i dai long bikpela hangre!
Na sampela bilong yupela bai i go kalabus!”’+
3 “‘Na mi bai makim 4-pela hevi* long painim ol,’+ mi Jehova, mi tok olsem, ‘mi bai makim bainat bilong kilim ol i dai, na ol dok bilong pulim ol bodi bilong ol i go. Na mi bai makim ol pisin na ol animal long kaikai ol na bagarapim ol.+ 4 Mi bai mekim na ol manmeri bilong ol kantri long graun bai i pret nogut tru taim ol i lukim samting i kamap long ol,+ bikos long pasin em Manase, pikinini man bilong Hesekia, em king bilong Juda, i bin mekim long Jerusalem.+
5 Jerusalem, husat bai sori long yu?
Na husat bai wari long yu?
Na husat bai kam na askim yu sapos yu i stap gut o nogat?’
6 ‘Yu bin lusim mi,’ Jehova i tokaut olsem.+
‘Na planti taim yu bin givim baksait long mi.*+
Olsem na mi bai putim han bilong mi i go na bagarapim yu.+
Planti taim mi bin sori long yu, tasol nau mi les pinis.
7 Mi bai rausim ol long ol taun* bilong dispela kantri, olsem man i yusim fok na rausim ol pipia bilong wit samting.
Mi bai rausim ol pikinini bilong ol i go na bai ol i no gat ol pikinini.+
Mi bai bagarapim ol manmeri bilong mi,
Long wanem, ol i no laik lusim ol pasin nogut bilong ol.+
8 Ol wido bilong ol bai kamap planti tru olsem wesan bilong nambis.
Long belo mi bai bringim man bilong bagarapim ol samting i kam na em bai bagarapim ol. Em bai bagarapim ol mama na ol yangpela man.
Na wantu tasol, mi bai mekim ol i wari na pret nogut tru.
9 Meri i bin karim 7-pela pikinini, strong bilong em bai pinis;
Em bai taitim bun long pulim win.
San bilong em i go daun pinis long taim bilong san yet,
Dispela i mekim em i sem nogut tru.’*
‘Na liklik hap lain bilong ol i stap yet
Mi bai givim ol long ol birua bilong ol na ol bai kilim ol i dai long bainat,’ Jehova i tokaut olsem.”+
10 Sori long mi, wai na mama bilong mi i bin karim mi?+
Mi kamap man em ol i save kros na tok pait wantaim long dispela kantri.
Mi no bin dinau long narapela man o ol i no bin dinau long mi;
Tasol olgeta bilong ol i tok long bagarap i ken painim mi.
11 Jehova i tok: “Mi bai sapotim yu.
Long taim yu gat hevi, mi bai helpim yu,
Na long taim ol birua i kam bilong pait long yu, mi bai helpim yu.
12 Olsem wanem? Wanpela man inap brukim ain i go liklik liklik?
Na brukim ain tu i kam long hap not na brukim kopa i go liklik liklik?
13 Mi bai givim olgeta mani na ol gutpela samting bilong yu long han bilong ol birua bilong yu,+
Ol bai kisim nating ol dispela samting, long wanem, yu bin mekim planti sin long olgeta hap bilong kantri bilong yu.
14 Mi bai givim ol dispela samting long ol birua bilong yu
Na ol bai kisim ol dispela samting i go long kantri yu no save long en.+
Long wanem, belhat bilong mi i kirapim wanpela paia,
Na em bai kukim yupela.”+
15 Jehova, yu save long hevi bilong mi,
Yu mas tingim mi na helpim mi.
Yu mas bekim bek pasin bilong ol man i mekim nogut long mi.+
Nogut yu isi long ol na laip bilong mi i lus.*
Yu save, mi mekim wok bilong yu na ol i tok nogut long mi.+
16 Yu givim ol tok bilong yu long mi, na mi putim long bel bilong mi;*+
Na ol tok bilong yu i mekim mi i amamas na belgut,
Jehova God, bosman bilong bikpela lain ami,* nem bilong yu i stap long mi.
17 Mi no save sindaun wantaim ol man bilong amamas na lap.+
Mi sindaun wanpis, long wanem, han bilong yu i stap antap long mi,
Na yu mekim belhat i pulap long mi.+
18 Bilong wanem pen bilong mi i stap oltaim na bagarap mi kisim long ol i paitim mi i no inap pinis?
Em i no laik kamap orait.
Olsem wanem? Yu kamap olsem wara i drai
Na i no inap helpim mi?
19 Orait Jehova i tok olsem:
“Sapos yu kam bek long mi, mi bai orait long yu.
Na yu bai sanap long ai bilong mi.
Sapos yu rausim ol rabis samting na holim tasol ol samting i dia tumas,
Orait yu bai kamap olsem maus bilong mi.*
Ol bai kam long yu,
Tasol yu no gat wok long tokim ol long mekim olsem.”
20 “Mi bai mekim yu i sanap strong olsem strongpela kopa banis namel long ol dispela manmeri.+
Tru tumas, ol bai pait long yu,
Tasol ol bai i no inap long winim yu,*+
Long wanem, mi stap wantaim yu, na mi bai helpim yu na kisim bek yu,” Jehova i tokaut olsem.
21 “Na mi bai kisim bek yu long han bilong ol man nogut
Na mi bai kisim bek* yu long han bilong ol man i no save marimari liklik.”