Jeremaia
13 Jehova i tokim mi olsem: “Yu go na baim wanpela belt ol i wokim long linen, na yu mas pasim long weist bilong yu, tasol yu no ken putim dispela belt long wara.” 2 Orait mi go na mi baim dispela belt olsem Jehova i bin tokim mi, na mi pasim long weist bilong mi. 3 Orait Jehova i tokim mi gen namba 2 taim olsem: 4 “Kisim dispela belt em yu bin baim na pasim, na yu kirap na i go long hap bilong Yufretis, na haitim dispela belt long hul bilong bikpela ston.” 5 So mi go na haitim dispela belt long hap bilong Yufretis, olsem Jehova i bin tokim mi long mekim.
6 Planti de i go pinis na bihain Jehova i tokim mi olsem: “Yu kirap na go long hap bilong Yufretis na kisim dispela belt em mi bin tokim yu long haitim long hap.” 7 Orait mi go long hap bilong Yufretis na mi digim hul long ples mi bin haitim belt na mi kisim. Na mi lukim olsem dispela belt i bagarap pinis, na i no inap long mi mekim wanpela samting long en.
8 Na Jehova i tokim mi olsem: 9 “Mi Jehova, mi tok olsem, ‘Long wankain pasin, mi bai bagarapim pasin antap bilong Juda na pasin antap bilong Jerusalem i antap moa.+ 10 Ol dispela manmeri nogut i no laik harim na bihainim tok bilong mi,+ het bilong ol i strong na ol i bihainim laik bilong bel bilong ol yet.+ Ol i bihainim ol arapela god, na ol i lotuim na brukim skru long ol dispela god. Ol bai i kamap wankain olsem dispela belt em ol man i no inap mekim wok long en.’ 11 ‘Belt i save pas strong long weist bilong man, olsem tasol, mi bin mekim lain Israel na lain Juda i pas strong long mi,’ mi Jehova, mi tok olsem, ‘mi mekim olsem na ol i kamap ol manmeri bilong mi,+ na dispela i litimapim nem bilong mi,+ na preisim mi, na dispela i givim ona long mi. Tasol ol i no laik harim tok.’+
12 “Na yu mas givim dispela tok tu long ol olsem, ‘Jehova, God bilong Israel, i tok olsem: “Ol i mas pulimapim wain long olgeta bikpela sospen.”’ Na ol bai bekim tok bilong yu olsem, ‘Mipela i save pinis olsem ol i save pulimapim wain long olgeta bikpela sospen.’ 13 Orait yu mas tokim ol olsem, ‘Jehova i tok olsem: “Bai mi pulimapim wain long olgeta manmeri i stap long dispela graun inap ol i spak nogut tru,+ em ol king i sindaun long sia king bilong Devit, na ol pris na ol profet, na olgeta manmeri bilong Jerusalem. 14 Na mi bai mekim ol i bamim narapela narapela. Mi bai mekim wankain pasin long ol papa na ol pikinini man wantaim,” Jehova i tok olsem.+ “Mi no inap marimari o sori long ol, na i no gat wanpela samting bai pasim mi long bagarapim ol.”’+
15 Yupela harim na putim gut yau.
Yupela i no ken mekim pasin antap, long wanem, Jehova i mekim tok pinis.
16 Givim glori long Jehova, em God bilong yupela
Paslain long em i mekim tudak i kamap
Na paslain long yupela i pundaun taim yupela i wokabaut long ol maunten long apinun tru.
Yupela bai i laikim tumas long lait i mas kamap,
Tasol em bai mekim tudak i kamap;
Na em bai mekim ples i kamap tudak olgeta.+
17 Na sapos yupela i no laik harim tok,
Orait long pasin hait mi bai krai bikos long pasin antap bilong yupela.
Mi bai krai moa yet na aiwara bai kapsait long ai bilong mi,+
Long wanem, ol i kisim ol sipsip bilong Jehova+ i go kalabus.
18 Tokim king na mama bilong king olsem,+ ‘Yutupela i mas sindaun long ples i no gat nem,
Long wanem, naispela kraun bilong yutupela bai pundaun long het bilong yutupela.’
19 Ol taun bilong hap saut i pas,* na i no gat man i stap bilong opim ol.
Ol i kisim olgeta manmeri bilong Juda i go kalabus, yes, ol i kisim olgeta bilong ol i go.+
20 Yu* lukluk i go na lukim ol lain i lusim hap not na i kam.+
We stap ol sipsip ol i bin givim long yu? Em ol gutpela sipsip bilong yu.+
21 Sapos ol man em yu save mekim gut long ol olsem gutpela pren bilong yu, ol i mekim save long yu
Bai yu tok wanem?+
Ating bai yu pilim bikpela pen, olsem pen i kamap long meri i laik karim pikinini.+
22 Na taim yu tok long bel bilong yu yet olsem, ‘Bilong wanem na ol dispela samting i kamap long mi?’+
Orait yu mas save olsem yu mekim bikpela rong na ol i rausim sket bilong yu+
Na lek bilong yu i pilim bikpela pen.
23 Yu ting wanpela man bilong lain Kus* inap senisim kala bilong skin bilong em, o wanpela lepat inap senisim ol mak mak long skin bilong en? Nogat tru.+
Olsem tasol, yupela i no inap mekim gutpela pasin
Yupela ol lain i save mekim pasin nogut.
24 Olsem na mi bai rausim yupela i go nabaut olsem ol drai bun bilong wit samting em win bilong ples nating i karim i go.+
25 Dispela em samting bai kamap long yu.* Em samting mi makim pinis long givim long yu,” mi Jehova, mi tok olsem,
“Long wanem, yu bin lusim tingting long mi+ na yu bilipim ol tok giaman.+
26 Olsem na mi bai apim sket bilong yu i go antap na karamapim pes bilong yu,
Na ol bai lukim sem bilong yu,+
27 Pasin adaltri*+ na pasin bilong yu long bel kirap long ol man olsem hos i singaut,
Na pasin pamuk bilong yu we i nogut tru.
Antap long ol liklik maunten na long ol ples kunai,
Mi lukim pinis ol stingpela pasin bilong yu.+
Sori long yu, Jerusalem!
Yu bai i stap doti olsem i go inap long wanem taim?”+