Kisim Bek

27 “Yupela i mas kisim diwai akas na wokim alta;+ longpela bilong en i mas 5-pela kiubit* na bikpela bilong en i mas 5-pela kiubit. Alta i mas skwe na go antap inap 3-pela kiubit.+ 2 Na yupela i mas wokim ol kom+ long 4-pela kona bilong en; ol kom bai stap olsem hap bilong alta. Na yupela i mas karamapim alta olgeta long kopa.+ 3 Na yupela i mas wokim ol baket bilong kisim sit bilong paia,* na ol savol na ol boul, ol fok na ol plet bilong karim paia. Yupela i mas wokim olgeta dispela samting bilong alta long kopa.+ 4 Na yupela i mas kisim sampela kopa ba na pasim wantaim na wokim i kamap waia rek. Na yupela i mas wokim 4-pela kopa ring na putim ol long 4-pela kona. 5 Yupela i mas putim dispela waia rek aninit long boda i raunim maus bilong alta. Na waia rek bai stap namel insait long alta. 6 Yupela i mas kisim diwai akas na sapim 2-pela longpela stik bilong alta. Na karamapim ol long kopa. 7 Na taim yupela i karim alta yupela i mas putim ol dispela longpela stik i go insait long ol ring i stap long 2-pela sait bilong alta.+ 8 Yupela i mas kisim ol plang na wokim alta olsem wanpela boks i no gat ai na as bilong en. Yupela i mas wokim alta i luk wankain olsem yu bin lukim long maunten.+

9 “Na yupela i mas wokim ples bung+ bilong haus lotu sel. Long saut sait i feisim hap saut, yupela i mas wokim banis long laplap ol i wokim long gutpela tret linen. Longpela bilong dispela laplap long dispela sait i mas 100 kiubit.+ 10 Yupela i mas wokim 20 pos na kisim kopa na wokim 20 soket beis. Na kisim silva na wokim ol huk bilong ol pos na ol samting bilong joinim* ol laplap na pos. 11 Na yupela i mas wokim banis long laplap long hap not. Longpela bilong en i mas 100 kiubit. Na yupela i mas wokim tu 20 pos na 20 kopa soket beis bilong ol. Na yupela i mas kisim silva na wokim ol huk bilong pos na ol samting bilong joinim* ol laplap na pos. 12 Na yupela i mas wokim banis long laplap bilong ples bung long hap wes. Longpela bilong en i mas 50 kiubit. Na wokim tu 10-pela pos na 10-pela soket beis. 13 Na longpela bilong ples bung long hap is long hap sankamap i mas 50 kiubit. 14 Na yupela i mas wokim wanpela banis long laplap long wanpela sait bilong dua bilong ples bung. Longpela bilong en i mas 15 kiubit na yupela i mas wokim 3-pela pos na 3-pela soket beis.+ 15 Na long narapela sait bilong dua bilong ples bung, longpela bilong banis yupela i wokim long laplap i mas 15 kiubit. Na yupela i mas wokim tu 3-pela pos na 3-pela soket beis.

16 “Na yupela i mas wokim wanpela keten bilong dua bilong ples bung. Longpela bilong en i mas 20 kiubit. Yupela i mas wivim blupela tret, pepol wul, retpela tret,* na gutpela tret linen+ bilong wokim dispela keten. Na yupela i mas wokim 4-pela pos na 4-pela soket beis bilong ol.+ 17 Na yupela i mas kisim silva na wokim ol huk na ol samting bilong joinim olgeta pos i raunim dispela ples bung. Tasol yupela i mas wokim ol soket beis bilong ol long kopa.+ 18 Longpela bilong banis long ples bung i mas 100 kiubit,+ na bikpela bilong en i mas 50 kiubit, na go antap 5-pela kiubit. Yupela i mas wokim dispela banis long laplap ol i wokim long gutpela tret linen. Na yupela i mas wokim ol soket beis bilong en long kopa. 19 Yupela i mas kisim kopa na wokim olgeta samting bilong mekim wok long haus lotu sel. Na yupela i mas kisim kopa+ na wokim tu ol longpela pin bilong taitim na strongim haus lotu sel na banis bilong ples bung.

20 “Yu mas tokim ol Israel long bringim gutpela oil bilong oliv i kam bilong putim long ol lam, na bai ol dispela lam i ken lait oltaim.+ 21 Aron wantaim ol pikinini man bilong em i mas go insait long haus sel bilong bung,* ausait long dispela keten i stap klostu long Bokis Kontrak,+ na ol i mas putim oil long ol lam na bai ol lam i lait long apinun i go inap long moningtaim long ai bilong Jehova.+ Yupela ol Israel wantaim ol pikinini bilong yupela i kamap bihain i mas bihainim dispela lo inap oltaim oltaim.+